ਜੱਬਲਪੁਰ (ਮੱਧ ਪ੍ਰਦੇਸ਼): ਸਾਬਕਾ ਮਿਸ ਵਰਲਡ ਟੂਰਿਜ਼ਮ ਅਤੇ ਅਦਾਕਾਰਾ ਇਸ਼ੀਕਾ ਤਨੇਜਾ ਨੇ ਗਲੈਮਰ ਨੂੰ ਪਿੱਛੇ ਛੱਡ ਕੇ ਅਧਿਆਤਮਿਕ ਮਾਰਗ ਅਪਣਾਉਣ ਦਾ ਫੈਸਲਾ ਕੀਤਾ ਹੈ। ਹਾਲ ਹੀ ਵਿੱਚ ਉਨ੍ਹਾਂ ਨੇ ਮੱਧ ਪ੍ਰਦੇਸ਼ ਦੇ ਜੱਬਲਪੁਰ 'ਚ ਸ਼ੰਕਰਾਚਾਰੀਆ ਸਵਾਮੀ ਸਦਾਨੰਦ ਸਰਸਵਤੀ ਜੀ ਦੀ ਅਗਵਾਈ 'ਚ ਗੁਰੂ ਦੀਕਸ਼ਾ ਲਈ। ਇਸ ਮੌਕੇ ਇਸ਼ਿਕਾ ਨੇ ਅੱਜ ਦੇ ਨੌਜਵਾਨਾਂ ਨੂੰ ਧਰਮ ਨਾਲ ਜੁੜਨ ਅਤੇ ਅਧਿਆਤਮਿਕਤਾ ਦੇ ਮਾਰਗ 'ਤੇ ਚੱਲਣ ਦੀ ਅਪੀਲ ਕੀਤੀ।
2017 ਵਿੱਚ ਮਿਸ ਵਰਲਡ ਟੂਰਿਜ਼ਮ ਇੰਡੀਆ ਬਣੀ ਸੀ ਅਦਾਕਾਰਾ
ਇਸ਼ਿਕਾ ਨੂੰ 2017 ਵਿੱਚ ਮਿਸ ਵਰਲਡ ਟੂਰਿਜ਼ਮ (ਇੰਡੀਆ) ਦਾ ਤਾਜ ਪਹਿਨਾਇਆ ਗਿਆ ਸੀ ਅਤੇ ਮਲੇਸ਼ੀਆ ਦੇ ਮੇਲਾਕਾ ਵਿੱਚ ਹੋਏ ਮੁਕਾਬਲੇ ਦੌਰਾਨ ਬਿਜ਼ਨਸ ਵੂਮੈਨ ਆਫ ਦਾ ਵਰਲਡ ਦਾ ਖਿਤਾਬ ਪ੍ਰਾਪਤ ਕੀਤਾ ਸੀ, ਉਸ ਨੂੰ ਭਾਰਤ ਦੀਆਂ 100 ਸਫ਼ਲ ਔਰਤਾਂ ਵਿੱਚੋਂ ਇੱਕ ਵਜੋਂ ਰਾਸ਼ਟਰਪਤੀ ਪੁਰਸਕਾਰ ਨਾਲ ਵੀ ਸਨਮਾਨਿਤ ਕੀਤਾ ਗਿਆ ਹੈ। ਹਾਲਾਂਕਿ, ਹੁਣ ਉਸਨੇ ਸੁੰਦਰਤਾ ਅਤੇ ਗਲੈਮਰ ਦੀ ਦੁਨੀਆ ਨੂੰ ਛੱਡ ਦਿੱਤਾ ਹੈ ਅਤੇ ਆਪਣੀ ਪੂਰੀ ਜ਼ਿੰਦਗੀ ਅਧਿਆਤਮਿਕਤਾ ਨੂੰ ਸਮਰਪਿਤ ਕਰ ਦਿੱਤੀ ਹੈ।
ਨੌਜਵਾਨਾਂ ਨੂੰ ਕੀਤੀ ਇਹ ਬੇਨਤੀ
ਇਸ ਸਮਾਗਮ ਦੌਰਾਨ ਸਾਧਵੀ ਬਣੀ ਇਸ਼ਿਕਾ ਨੇ ਧਰਮ ਨਾਲ ਆਪਣੇ ਸੰਬੰਧਾਂ ਬਾਰੇ ਦੱਸਿਆ। ਉਨ੍ਹਾਂ ਕਿਹਾ, 'ਬਚਪਨ ਤੋਂ ਹੀ ਮੇਰਾ ਝੁਕਾਅ ਅਧਿਆਤਮਿਕਤਾ ਵੱਲ ਰਿਹਾ ਹੈ, ਚਾਹੇ ਇਹ ਧਿਆਨ ਹੋਵੇ ਜਾਂ ਇੰਟਰਨੈਸ਼ਨਲ ਸੋਸਾਇਟੀ ਫਾਰ ਕ੍ਰਿਸ਼ਨਾ ਚੇਤਨਾ (ਇਸਕੋਨ) ਅਤੇ ਸ਼੍ਰੀ ਸ਼੍ਰੀ ਰਵੀ ਸ਼ੰਕਰ ਜੀ ਨਾਲ ਮੇਰੀ ਸਾਂਝ। ਪਰ ਹੁਣ ਮੈਨੂੰ ਲੱਗਦਾ ਹੈ ਕਿ ਧਰਮ ਨੂੰ ਪੂਰੀ ਤਰ੍ਹਾਂ ਸਮਰਪਿਤ ਕਰਨ ਦਾ ਸਮਾਂ ਆ ਗਿਆ ਹੈ। ਅੱਜ ਦੇ ਨੌਜਵਾਨਾਂ ਕੋਲ ਊਰਜਾ ਅਤੇ ਸਮਾਂ ਹੈ ਅਤੇ ਉਨ੍ਹਾਂ ਨੂੰ ਇਸ ਦੀ ਵਰਤੋਂ ਅਧਿਆਤਮਿਕਤਾ ਨਾਲ ਜੁੜਨ ਲਈ ਕਰਨੀ ਚਾਹੀਦੀ ਹੈ।'
ਗਲੈਮਰ ਦੀ ਦੁਨੀਆਂ ਛੱਡ ਸਾਧਵੀ ਬਣੀ ਇਸ਼ਿਕਾ
ਆਪਣੀ ਅਧਿਆਤਮਿਕ ਯਾਤਰਾ ਲਈ ਜੱਬਲਪੁਰ ਨੂੰ ਚੁਣਨ ਬਾਰੇ ਇਸ਼ਿਕਾ ਨੇ ਕਿਹਾ, 'ਮੈਨੂੰ ਪਤਾ ਲੱਗਿਆ ਕਿ ਸ਼ੰਕਰਾਚਾਰੀਆ ਜੀ ਜੱਬਲਪੁਰ ਵਿੱਚ ਸਨ ਅਤੇ ਉਨ੍ਹਾਂ ਦੀ ਸਲਾਹ 'ਤੇ ਮੈਂ ਇੱਥੇ ਗੁਰੂ ਦੀਕਸ਼ਾ ਲੈਣ ਦਾ ਫੈਸਲਾ ਕੀਤਾ। ਉਨ੍ਹਾਂ ਦੇ ਆਸ਼ੀਰਵਾਦ ਨਾਲ ਮੈਂ ਹੁਣ ਇਸ ਰਸਤੇ 'ਤੇ ਚੱਲ ਪਈ ਹਾਂ।' ਸ਼ੰਕਰਾਚਾਰੀਆ ਸਵਾਮੀ ਸਦਾਨੰਦ ਸਰਸਵਤੀ ਜੀ ਮਹਾਰਾਜ ਨੇ ਗੁਰੂ ਦੀਕਸ਼ਾ ਦੇ ਮਹੱਤਵ ਨੂੰ ਉਜਾਗਰ ਕਰਦੇ ਹੋਏ ਕਿਹਾ, 'ਇਹ ਅਧਿਆਤਮਿਕ ਬਲ ਪ੍ਰਦਾਨ ਕਰਦਾ ਹੈ ਅਤੇ ਚੇਤਨਾ ਨੂੰ ਜਗਾਉਂਦਾ ਹੈ ਅਤੇ ਲੋਕਾਂ ਨੂੰ ਚੰਗੇ ਉਦੇਸ਼ ਦੀ ਪੂਰਤੀ ਲਈ ਮਾਰਗਦਰਸ਼ਨ ਵੀ ਪ੍ਰਦਾਨ ਕਰਦਾ ਹੈ।'
ਇਸ਼ਿਕਾ ਨੇ ਜੱਬਲਪੁਰ ਵਿੱਚ ਲਈ ਗੁਰੂ ਦੀਕਸ਼ਾ
ਆਪਣੇ ਕਰੀਅਰ 'ਚ ਇਸ਼ਿਕਾ ਨੇ ਮਧੁਰ ਭੰਡਾਰਕਰ ਦੀ ਫਿਲਮ 'ਇੰਦੂ ਸਰਕਾਰ', ਵੈੱਬ ਸੀਰੀਜ਼ 'ਹੱਦ' ਅਤੇ ਕਈ ਇਸ਼ਤਿਹਾਰਾਂ 'ਚ ਕੰਮ ਕੀਤਾ ਹੈ। ਉਹ ਖੇਡ ਸਮਾਗਮਾਂ ਦੀ ਐਂਕਰਿੰਗ ਵੀ ਕਰ ਚੁੱਕੀ ਹੈ। ਹਾਲਾਂਕਿ ਹੁਣ ਉਨ੍ਹਾਂ ਨੇ ਆਸਥਾ ਅਤੇ ਅਧਿਆਤਮਿਕਤਾ ਦਾ ਰਾਹ ਚੁਣ ਕੇ ਆਪਣੀ ਜ਼ਿੰਦਗੀ ਦਾ ਨਵਾਂ ਅਧਿਆਏ ਸ਼ੁਰੂ ਕੀਤਾ ਹੈ।
ਇਹ ਵੀ ਪੜ੍ਹੋ:
