ਕੋਲਕਾਤਾ— ਪੱਛਮੀ ਬੰਗਾਲ ਦੇ ਹਾਵੜਾ ਜ਼ਿਲੇ 'ਚ ਪਦਮਪੁਕੁਰ ਰੇਲਵੇ ਸਟੇਸ਼ਨ ਨੇੜੇ ਐਤਵਾਰ ਨੂੰ ਇਕ ਵੱਡਾ ਰੇਲ ਹਾਦਸਾ ਵਾਪਰ ਗਿਆ। ਇਸ ਘਟਨਾ ਵਿਚ ਤਿਰੂਪਤੀ ਐਕਸਪ੍ਰੈਸ ਦੇ ਦੋ ਖਾਲੀ ਡੱਬੇ ਪਾਰਸਲ ਵੈਨ ਨਾਲ ਟਕਰਾ ਕੇ ਪਟੜੀ ਤੋਂ ਉਤਰ ਗਏ। ਇਸ ਬਾਰੇ ਦੱਖਣ ਪੂਰਬੀ ਰੇਲਵੇ ਦੇ ਅਧਿਕਾਰੀ ਨੇ ਦੱਸਿਆ ਕਿ ਹਾਵੜਾ ਸਟੇਸ਼ਨ ਤੋਂ ਕੁਝ ਦੂਰੀ 'ਤੇ ਵਾਪਰੀ ਇਸ ਘਟਨਾ 'ਚ ਕਿਸੇ ਦੇ ਜ਼ਖਮੀ ਹੋਣ ਦੀ ਕੋਈ ਖਬਰ ਨਹੀਂ ਹੈ।
ਉਨ੍ਹਾਂ ਦੱਸਿਆ ਕਿ ਰੇਲਗੱਡੀ ਦੇ ਖਾਲੀ ਡੱਬੇ ਪਦਮਪੁਕੁਰ ਤੋਂ ਸ਼ਾਲੀਮਾਰ ਯਾਰਡ ਵੱਲ ਲਿਜਾਏ ਜਾ ਰਹੇ ਸਨ ਕਿ ਪਾਰਸਲ ਵੈਨ ਨੇ ਡੱਬਿਆਂ ਨੂੰ ਟੱਕਰ ਮਾਰ ਦਿੱਤੀ, ਜਿਸ ਕਾਰਨ ਰੇਲਗੱਡੀ ਪਟੜੀ ਤੋਂ ਉਤਰ ਗਈ। ਅਧਿਕਾਰੀ ਨੇ ਦੱਸਿਆ ਕਿ ਪਦਮਪੁਕੁਰ ਸਟੇਸ਼ਨ 'ਤੇ ਇਕ ਐਕਸਪ੍ਰੈਸ ਟਰੇਨ ਦੇ ਦੋ ਖਾਲੀ ਡੱਬਿਆਂ ਨਾਲ ਪਾਰਸਲ ਵੈਨ ਟਕਰਾ ਗਈ, ਜਿਨ੍ਹਾਂ ਨੂੰ ਰੇਲਵੇ ਸਾਈਡਿੰਗ 'ਤੇ ਲਿਜਾਇਆ ਜਾ ਰਿਹਾ ਸੀ ।
ਅਧਿਕਾਰੀ ਨੇ ਕਿਹਾ ਕਿ ਇਸ ਗੱਲ ਦੀ ਜਾਂਚ ਕੀਤੀ ਜਾ ਰਹੀ ਹੈ ਕਿ ਪਾਰਸਲ ਵੈਨ ਅੱਧ ਵਿਚਕਾਰ ਡੱਬਿਆਂ ਦੇ ਰਸਤੇ ਵਿੱਚ ਕਿਵੇਂ ਆ ਗਈ ਅਤੇ ਟ੍ਰੈਕ ਬਦਲਦੇ ਹੋਏ ਖਾਲੀ ਡੱਬਿਆਂ ਨਾਲ ਟਕਰਾ ਗਈ ਅਤੇ ਕੀ ਉਕਤ ਪਾਰਸਲ ਵੈਨ ਦੇ ਡਰਾਈਵਰ ਨੇ ਸਿਗਨਲ ਨੂੰ ਨਜ਼ਰ ਅੰਦਾਜ਼ ਕੀਤਾ। ਹਾਲਾਂਕਿ, ਇਹ ਕੋਈ ਵੱਡੀ ਘਟਨਾ ਨਹੀਂ ਸੀ ਅਤੇ ਸ਼ਾਲੀਮਾਰ-ਸੰਤਰਾਗਾਚੀ ਮਾਰਗ 'ਤੇ ਰੇਲ ਆਵਾਜਾਈ ਸਿਰਫ 20 ਮਿੰਟ ਲਈ ਅੰਸ਼ਕ ਤੌਰ 'ਤੇ ਵਿਘਨ ਪਈ ਸੀ।
ਉਨ੍ਹਾਂ ਕਿਹਾ ਕਿ ਪਦਮਪੁਕੁਰ ਨੇੜੇ ਸਾਈਡਿੰਗ ਲਾਈਨ 'ਤੇ ਦੋ ਖਾਲੀ ਡੱਬੇ ਪਟੜੀ ਤੋਂ ਉਤਰ ਗਏ ਅਤੇ ਨਾਲ ਲੱਗਦੇ ਮੁੱਖ ਟ੍ਰੈਕ ਦੇ ਕੁਝ ਹਿੱਸੇ ਨੂੰ ਰੋਕ ਦਿੱਤਾ, ਜਿਸ ਨਾਲ ਰੇਲ ਆਵਾਜਾਈ ਨੂੰ ਅੰਸ਼ਕ ਤੌਰ 'ਤੇ ਵਿਘਨ ਪਿਆ। ਉਨ੍ਹਾਂ ਕਿਹਾ ਕਿ ਪਟੜੀਆਂ ਨੂੰ ਸਾਫ਼ ਕਰਨ ਅਤੇ ਰੇਲ ਆਵਾਜਾਈ ਨੂੰ ਪੂਰੀ ਤਰ੍ਹਾਂ ਬਹਾਲ ਕਰਨ ਦਾ ਕੰਮ ਚੱਲ ਰਿਹਾ ਹੈ। ਅਧਿਕਾਰੀ ਨੇ ਕਿਹਾ, "ਇਹ ਕੋਚ ਸਾਈਡਿੰਗ 'ਤੇ ਲਿਜਾਏ ਜਾ ਰਹੇ ਸਨ ਅਤੇ ਕਿਸੇ ਖਾਸ ਲੰਬੀ ਦੂਰੀ ਦੀ ਰੇਲਗੱਡੀ ਨਾਲ ਜੁੜੇ ਨਹੀਂ ਸਨ ।
