ਤਿਰੂਵਨੰਤਪੁਰਮ: ਕੇਰਲ ਦੇ ਤਿਰੂਵਨੰਤਪੁਰਮ ਜ਼ਿਲ੍ਹੇ ਵਿੱਚ ਪੰਜ ਲੋਕਾਂ ਦੇ ਕਤਲ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਪੁਲਿਸ ਦਾ ਕਹਿਣਾ ਹੈ ਕਿ ਇੱਕ 23 ਸਾਲਾ ਨੌਜਵਾਨ ਨੇ ਸੋਮਵਾਰ ਦੇਰ ਸ਼ਾਮ ਜ਼ਿਲ੍ਹੇ ਦੇ ਵੈਂਜਾਰਾਮੂਡੂ ਪੁਲਿਸ ਸਟੇਸ਼ਨ ਨਾਲ ਸੰਪਰਕ ਕੀਤਾ। ਉੱਥੇ ਉਸ ਨੇ ਦਾਅਵਾ ਕੀਤਾ ਕਿ ਉਸ ਨੇ 6 ਲੋਕਾਂ ਨੂੰ ਮਾਰਿਆ ਹੈ। ਹਾਲਾਂਕਿ, ਬਾਅਦ ਵਿੱਚ ਇਹ ਖੁਲਾਸਾ ਹੋਇਆ ਕਿ 6 ਪੀੜਤਾਂ ਵਿੱਚੋਂ ਇੱਕ ਉਸ ਦੀ ਮਾਂ, ਬਚ ਗਈ ਸੀ। ਹਾਲਾਂਕਿ, ਉਹ ਗੰਭੀਰ ਰੂਪ ਵਿੱਚ ਜ਼ਖਮੀ ਹੈ ਅਤੇ ਹਸਪਤਾਲ ਵਿੱਚ ਦਾਖਲ ਹੈ।
6 ਲੋਕਾਂ ਨੂੰ ਮਾਰਨ ਤੋਂ ਬਾਅਦ ਜ਼ਹਿਰ ਖਾ ਲਿਆ
ਪੁਲਿਸ ਅਨੁਸਾਰ ਮੁਲਜ਼ਮ ਨੌਜਵਾਨ ਦੀ ਪਛਾਣ ਅਫਾਨ ਵਜੋਂ ਹੋਈ ਹੈ। ਅਫਾਨ ਨੂੰ ਵੀ ਇਸ ਸਮੇਂ ਹਸਪਤਾਲ ਵਿੱਚ ਦਾਖਲ ਕਰਵਾਇਆ ਗਿਆ ਹੈ। ਪੁਲਿਸ ਅਧਿਕਾਰੀ ਨੇ ਕਿਹਾ ਕਿ ਆਪਣਾ ਅਪਰਾਧ ਕਬੂਲ ਕਰਨ ਤੋਂ ਬਾਅਦ, ਅਫਾਨ ਨੇ ਦਾਅਵਾ ਕੀਤਾ ਕਿ ਉਸ ਨੇ 6 ਲੋਕਾਂ ਨੂੰ ਮਾਰਨ ਤੋਂ ਬਾਅਦ ਖੁਦ ਵੀ ਜ਼ਹਿਰ ਖਾ ਲਿਆ ਸੀ। ਇਸ ਲਈ, ਸਾਵਧਾਨੀ ਦੇ ਤੌਰ 'ਤੇ, ਉਸ ਨੂੰ ਪੁਲਿਸ ਸੁਰੱਖਿਆ ਹੇਠ ਹਸਪਤਾਲ ਵਿੱਚ ਦਾਖਲ ਕਰਵਾਇਆ ਗਿਆ ਹੈ। ਮੀਡੀਆ ਨਾਲ ਗੱਲ ਕਰਦੇ ਹੋਏ, ਤਿਰੂਵਨੰਤਪੁਰਮ ਦਿਹਾਤੀ ਦੇ ਐਸਪੀ ਕੇ ਐਸ ਸੁਦਰਸ਼ਨ ਨੇ ਕਿਹਾ ਕਿ ਪੰਜ ਲੋਕਾਂ ਦੀ ਮੌਤ ਦੀ ਪੁਸ਼ਟੀ ਹੋ ਗਈ ਹੈ। ਇੱਕ ਗੰਭੀਰ ਜ਼ਖਮੀ ਹੈ। ਉਨ੍ਹਾਂ ਕਿਹਾ ਕਿ ਇਸ ਘਟਨਾ ਦੇ ਸਬੰਧ ਵਿੱਚ ਦੋ ਥਾਣਿਆਂ ਵਿੱਚ ਤਿੰਨ ਮਾਮਲੇ ਦਰਜ ਕੀਤੇ ਗਏ ਹਨ।
ਪੁਲਿਸ ਮਾਮਲੇ ਦੀ ਜਾਂਚ ਕਰ ਰਹੀ
ਐਸਪੀ ਕੇ ਐਸ ਸੁਦਰਸ਼ਨ ਨੇ ਕਿਹਾ ਕਿ ਮੁਲਜ਼ਮ ਦੇ ਬਿਆਨ ਦਰਜ ਕਰਨ ਤੋਂ ਬਾਅਦ ਹੀ ਇਸ ਦੇ ਮਕਸਦ ਦਾ ਪਤਾ ਲੱਗੇਗਾ। ਸ਼ੁਰੂਆਤੀ ਜਾਂਚ ਵਿੱਚ ਮਾਮਲਾ ਪੈਸਿਆਂ ਨਾਲ ਜੁੜਿਆ ਜਾਪਦਾ ਹੈ। ਕੁਝ ਸੋਨਾ ਗਾਇਬ ਹੋਣ ਦੀ ਵੀ ਖ਼ਬਰ ਹੈ। ਹਾਲਾਂਕਿ, ਇਸ ਵੇਲੇ ਯਕੀਨ ਨਾਲ ਕੁਝ ਨਹੀਂ ਕਿਹਾ ਜਾ ਸਕਦਾ। ਅਧਿਕਾਰੀ ਨੇ ਕਿਹਾ ਕਿ ਪੁਲਿਸ ਹਰ ਪਹਿਲੂ ਤੋਂ ਮਾਮਲੇ ਦੀ ਜਾਂਚ ਕਰ ਰਹੀ ਹੈ। ਦਿਹਾਤੀ ਐਸਪੀ ਨੇ ਦੱਸਿਆ ਕਿ ਮੌਕੇ ਤੋਂ ਇੱਕ ਹਥੌੜਾ ਬਰਾਮਦ ਕੀਤਾ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਮੁੱਢਲੀ ਜਾਂਚ ਤੋਂ ਪਤਾ ਚੱਲਿਆ ਹੈ ਕਿ ਕਤਲ ਸਵੇਰੇ 10 ਵਜੇ ਤੋਂ ਸ਼ਾਮ 6 ਵਜੇ ਦੇ ਵਿਚਕਾਰ ਹੋਏ ਸਨ।
13 ਸਾਲ ਦੇ ਛੋਟੇ ਭਰਾ ਦਾ ਵੀ ਕੀਤਾ ਕਤਲ
ਪੁਲਿਸ ਦੇ ਅਨੁਸਾਰ, ਅਫਾਨ ਨੇ ਸਭ ਤੋਂ ਪਹਿਲਾਂ ਸਵੇਰੇ ਆਪਣੀ ਦਾਦੀ ਸਲਮਾ ਬੀਵੀ, ਜੋ ਕਿ ਪੰਗੋਡੇ ਦੀ ਰਹਿਣ ਵਾਲੀ ਸੀ, ਦਾ ਕਤਲ ਕੀਤਾ। ਬਾਅਦ ਵਿੱਚ ਉਹ ਇੱਕ ਹੋਰ ਪਿੰਡ, ਐਸਐਨ ਪੁਰਮ ਚਲਾ ਗਿਆ, ਜਿੱਥੇ ਉਸ ਨੇ ਆਪਣੇ ਪਿਤਾ ਰਹੀਮ ਦੇ ਭਰਾ ਲਤੀਫ਼ ਅਤੇ ਉਸ ਦੀ ਪਤਨੀ ਸ਼ਾਹਿਦਾ ਨੂੰ ਮਾਰ ਦਿੱਤਾ। ਉਸ ਨੇ ਕਥਿਤ ਤੌਰ 'ਤੇ ਸ਼ਾਮ ਨੂੰ ਪੁਲਮਪਾਰਾ ਵਿੱਚ ਸ਼ੱਕੀ ਦੇ ਘਰ ਕਤਲ ਕੀਤੇ। ਉਸ ਨੇ ਆਪਣੇ 13 ਸਾਲ ਦੇ ਛੋਟੇ ਭਰਾ ਅਫਸਾਨ ਅਤੇ ਇੱਕ ਹੋਰ ਔਰਤ ਫ਼ਰਸਾਨਾ ਨੂੰ ਮਾਰ ਦਿੱਤਾ। ਦੱਸਿਆ ਜਾ ਰਿਹਾ ਹੈ ਕਿ ਫਰਸਾਨਾ ਉਸ ਦੀ ਕਰੀਬੀ ਦੋਸਤ ਸੀ। ਬਾਅਦ ਵਿੱਚ ਉਸ ਨੇ ਆਪਣੀ ਮਾਂ 'ਤੇ ਵੀ ਹਮਲਾ ਕੀਤਾ, ਜੋ ਕੈਂਸਰ ਤੋਂ ਪੀੜਤ ਹੈ, ਜੋ ਕਿ ਜਖ਼ਮੀ ਹੈ।
ਕਤਲ ਦੀ ਵਜ੍ਹਾ ਤਲਾਸ਼ ਰਹੀ ਪੁਲਿਸ
ਤਿਰੂਵਨੰਤਪੁਰਮ ਜ਼ਿਲ੍ਹਾ ਪੰਚਾਇਤ ਮੈਂਬਰ ਬੀਨੂ ਐਸ ਨਾਇਰ ਨੇ ਕਿਹਾ ਕਿ ਸ਼ੱਕੀ ਦੇ ਘਰੋਂ ਮਿਲੀਆਂ ਲਾਸ਼ਾਂ ਦੇ ਸਿਰਾਂ 'ਤੇ ਡੂੰਘੇ ਜ਼ਖ਼ਮ ਸਨ। ਹਾਲਾਂਕਿ, ਕਤਲਾਂ ਦੇ ਪਿੱਛੇ ਦਾ ਕਾਰਨ ਅਜੇ ਪਤਾ ਨਹੀਂ ਲੱਗ ਸਕਿਆ ਹੈ। ਸਥਾਨਕ ਨਿਵਾਸੀ ਸ਼ਾਜੀ ਨੇ ਮੀਡੀਆ ਨੂੰ ਦੱਸਿਆ ਕਿ ਅਫਾਨ ਦੀ ਦੋਸਤ ਫਰਸਾਨਾ ਪਿਛਲੇ ਦੋ ਦਿਨਾਂ ਤੋਂ ਘਰ ਸੀ ਅਤੇ ਅਜਿਹਾ ਲੱਗਦਾ ਹੈ ਕਿ ਇਸ ਮਾਮਲੇ ਨੂੰ ਲੈ ਕੇ ਪਰਿਵਾਰ ਵਿੱਚ ਕੁਝ ਮਸਲੇ ਸਨ। ਉਸ ਨੇ ਕਿਹਾ ਕਿ ਅਫਾਨ ਦਾ ਕੋਈ ਅਪਰਾਧਿਕ ਜਾਂ ਨਸ਼ੀਲੇ ਪਦਾਰਥਾਂ ਦਾ ਰਿਕਾਰਡ ਨਹੀਂ ਹੈ।
ਦੋਸ਼ੀ ਦੇ ਪਿਤਾ ਅਬਦੁਲ ਰਹੀਮ, ਜੋ ਸਾਊਦੀ ਅਰਬ ਵਿੱਚ ਕੰਮ ਕਰਦੇ ਹਨ, ਨੇ ਇੱਕ ਟੀਵੀ ਚੈਨਲ ਨੂੰ ਦੱਸਿਆ ਕਿ ਉਨ੍ਹਾਂ ਨੂੰ ਵਿੱਤੀ ਸਮੱਸਿਆਵਾਂ ਸਨ, ਪਰ ਇਹ ਉਨ੍ਹਾਂ ਦੇ ਪੁੱਤਰ ਲਈ ਚਿੰਤਾ ਦਾ ਵਿਸ਼ਾ ਨਹੀਂ ਸੀ। ਉਹ ਛੇ ਮਹੀਨਿਆਂ ਲਈ ਵਿਜ਼ਿਟਿੰਗ ਵੀਜ਼ੇ 'ਤੇ ਸਾਊਦੀ ਗਿਆ ਸੀ ਅਤੇ ਖੁਸ਼ੀ ਨਾਲ ਵਾਪਸ ਆਇਆ। ਉਸਨੇ ਕਿਹਾ ਕਿ ਉਹ ਜਾਇਦਾਦ ਵੇਚ ਕੇ ਕਰਜ਼ਾ ਚੁਕਾਉਣ ਦੇ ਵਿਰੁੱਧ ਨਹੀਂ ਹੈ। ਉਸਨੇ ਕਿਹਾ ਕਿ ਉਸਨੂੰ ਰਿਸ਼ਤੇਦਾਰਾਂ ਤੋਂ ਅਫਾਨ ਅਤੇ ਫਰਸਾਨਾ ਦੇ ਰਿਸ਼ਤੇ ਬਾਰੇ ਜਾਣਕਾਰੀ ਮਿਲੀ ਸੀ। ਉਹ ਇਸ ਰਿਸ਼ਤੇ ਦੇ ਵਿਰੁੱਧ ਨਹੀਂ ਸੀ।
