ଡ୍ରଗ୍ସ ବିକ୍ରି ନେଇ ପୋଲିସ-ସାମ୍ବାଦିକ ମାରପିଟ୍‌, ଭିଡିଓ ଭାଇରାଲ

ଲୁଧିଆନା: ପଞ୍ଜାବରେ ଦିନକୁ ଦିନ ଧଳାଜହର ଜନିତ ମୃତ୍ୟୁ ସଂଖ୍ୟା ବୃଦ୍ଧିପାଇବାରେ ଲାଗିଛି । ନବଗଠିନ ଭଗୱନ୍ତ ମାନଙ୍କ ସରକାର ଡ୍ରଗ୍ସ ବିରୁଦ୍ଧରେ ଏକ ବଡ ସଚେତନତା କାର୍ଯ୍ୟକ୍ରମ ଲଞ୍ଚ୍‌ କରୁଥିବା ଘୋଷଣା କରିଛି । ତେବେ ଲୁଧିଆନା ଅଞ୍ଚଳର ଏକ ଭିଡିଓ ସୋସିଆଲ ମିଡିଆରେ ବେଶ ଭାଇରାଲ ହେବାରେ ଲାଗିଛି । ଭିଡିଓରେ ଜଣେ ସାମ୍ବାଦିକ ଓ ଜଣେ ପୋଲିସ ଅଫିସରଙ୍କ ମଧ୍ୟରେ ମାରପିଟ୍‌ ହେଉଛି ଓ ଉଭୟ ଉଭୟଙ୍କ ଉପରେ ବ୍ରାଉନସୁଗାର ବ୍ୟବସାୟ କରୁଥିବାର ଅଭିଯୋଗ ଆଣୁଛନ୍ତି । ଭିଡିଓରେ ସାମ୍ବାଦିକ ଜଣଙ୍କ ପୋଲିସ ଅଧିକାରୀଙ୍କ ବିରୁଦ୍ଧରେ ସଙ୍ଗୀନ ଅଭିଯୋଗ ଆଣୁଥିବାବେଳେ, ଅଧିକାରୀ ଜଣଙ୍କ ନିଜଗାଡିରୁ ଡ୍ରଗ୍ସର ଏକ ପ୍ୟାକେଟ୍‌ ବାହାର କରି ଅଭିଯୋଗ କରୁଛନ୍ତି ଯେ, ଏହି ପ୍ୟାକେଟ୍‌ ସେ ସାମ୍ବାଦିକଙ୍କ ଠାରୁ ଜବତ କରିଛନ୍ତି । ଏହି ଆଧାରରେ ତାଙ୍କ ବିରୁଦ୍ଧରେ ମାମଲା ମଧ୍ୟ ରୁଜୁ ହୋଇଛି ଓ ସେ ତାଙ୍କୁ ଗିରଫ କରୁଛନ୍ତି ବୋଲି କହୁଛନ୍ତି । ଅନ୍ୟପଟେ ସାମ୍ବାଦିକ ଜଣଙ୍କ ଭିଡିଓରେ କହୁଛନ୍ତି ଯେ, ପୂର୍ବରୁ ଏହି ପୋଲିସ ଅଧିକାରୀଙ୍କ ବିରୁଦ୍ଧରେ ଡ୍ରଗ୍ସ ବ୍ୟବସାୟ କରୁଥିବାର ଅଭିଯୋଗ ରହିଛି ।