ହୋଲିରେ ଅଘଟଣ, ପୋଖରୀରେ ବୁଡି ଯୁବକ ମୃତ

ବଲାଙ୍ଗୀର: ହୋଲିରେ ଅଘଟଣ । ହୋଲି ଖେଳି ପୋଖରୀକୁ ଗାଧୋଇବାକୁ ଯାଇ ପାଣିରେ ବୁଡି ଯୁବକ ମୃତ। ଏଭଳି ଏକ ଅଭାବନୀୟ ଘଟଣା ଘଟିଛି ବଲାଙ୍ଗୀର ସହର କନ୍ଧପାଳିପଡାରେ । କନ୍ଧପାଳି ପଡ଼ାର ଯୁବକ ମାନେ ଆଜି ଧୂମଧାମରେ ରଙ୍ଗ ଖେଳି ପରେ ସମସ୍ତେ ସାଙ୍ଗ ହୋଇ ପଡ଼ାରେ ଥିବା ପୋଖରୀକୁ ଗାଧୋଇବାକୁ ଯାଇଥିଲେ । ଗାଧୋଉଥିବା ସମୟରେ ରାହୁଲ ଭାଟି ନାମକ 21 ବର୍ଷର ଜଣେ ଯୁବକ ପାଣି ଭିତରୁ ଆଉ ବାହାରକୁ ବାହାରି ପାରିନଥିଲେ । ପୋଖରୀରେ ପକାଯାଇଥିବା ମାଛ ଧରା ଜାଲ କିମ୍ବା ଅନ୍ୟ କୌଣସି ବସ୍ତୁରେ ଗୋଡ ଲାଗିଯାଇ ସେ ପାଣି ଭିତରୁ ବାହାରିପାରିନଥିବା ଅନୁମାନ କରାଯାଉଛି । ସାଙ୍ଗମାନେ ପାଣି ଭିତରୁ ରାହୁଳକୁ କାଢିଥିଲେ | କିନ୍ତୁ ସେତେବେଳକୁ ରାହୁଲଙ୍କ ଜୀବନ ଚାଲିଯାଇଥିଲା । ଟାଉନ ପୋଲିସ ଆସି ମୃତଦେହ ଜବତ କରିବା ସହିତ ବ୍ୟବଚ୍ଛେଦ ପାଇଁ ବି. ବି. ଏମ. ସି. ହସ୍ପିଟାଲକୁ ପଠାଇ ଦେଇଛି । ଏଥିସହ ଟାଉନ ପୋଲିସ ଘଟଣାର ଅଧିକ ତଦନ୍ତ ଜାରି ରଖିଛି । 

ଇଟିଭି ଭାରତ, ବଲାଙ୍ଗୀର