କଣ୍ଠଶିଳ୍ପୀ ଶାନ୍ତିଲତାଙ୍କ ଆରୋଗ୍ୟ କାମନା, ମହାପ୍ରଭୁଙ୍କ ନିକଟରେ ଦୀପଦାନ

ପୁରୀ: କଣ୍ଠଶିଳ୍ପୀ ଶାନ୍ତିଲତା ବାରିକଙ୍କ ଆରୋଗ୍ୟ କାମନା କରି ମହାପ୍ରଭୁଙ୍କ ନିକଟରେ ଦୀପଦାନ କଲେ ଶୁଭେଚ୍ଛୁ ଓ ସମ୍ପର୍କୀୟ । ଓଡ଼ିଶାର ସୁନାମଧନ୍ୟ କଣ୍ଠଶିଳ୍ପୀ ଶାନ୍ତିଲତା ବାରିକ କର୍କଟ ରୋଗରେ ଆକ୍ରାନ୍ତ ହୋଇ ଗୁରୁତର ଅବସ୍ଥାରେ ଭୁବନେଶ୍ଵରରେ ଏକ ଘରୋଇ ହସ୍ପିଟାଲରେ ଚିକିତ୍ସିତ ହେଉଛନ୍ତି । ଶ୍ରୀମନ୍ଦିର ସିଂହ ଦ୍ଵାର ସମ୍ମୁଖରେ ଏହି ସମୂହ ଦୀପ ଦାନ କରାଯାଇଥିଲା । ମହାପ୍ରଭୁ ଶାନ୍ତିଲତାଙ୍କୁ ଭଲ କରିଦିଅନ୍ତୁ ବୋଲି ତାଙ୍କର ଶୁଭେଚ୍ଛୁ  ପ୍ରାର୍ଥନା କରିଥିଲେ। କଣ୍ଠଶିଳ୍ପୀ ଶାନ୍ତିଲତା ବାରିକ ପ୍ରତ୍ଯେକ ଓଡିଆଙ୍କ ହୃଦୟରେ ସ୍ଵତନ୍ତ୍ର ସ୍ଥାନ ହାସଲ କରିଛନ୍ତି । ବିଶେଷ କରି ଶାନ୍ତିଲତା ବୋଲି ଥିବା ମହାପ୍ରଭୁ ଶ୍ରୀଜଗନ୍ନାଥଙ୍କ ଭଜନ ଆଜି ବି ପ୍ରତ୍ଯେକ ଓଡିଆଙ୍କୁ ଭାବ ବିହ୍ବଳିତ କରିଥାଏ । ଏଣୁ ଶାନ୍ତିଲତା ବାରିକଙ୍କ ଅସୁସ୍ଥତା ଖବର ଶୁଣି ତାଙ୍କର ଶୁଭେଚ୍ଛୁଙ୍କ ମଧ୍ୟରେ ଉଦବେଗ ପ୍ରକାଶ ପାଇଛି। ଶାନ୍ତିଲତାଙ୍କ ଆଶୁ ଆରୋଗ୍ୟ କାମନା କରି ସମସ୍ତେ ମହାପ୍ରଭୁଙ୍କ ନିକଟରେ ପ୍ରାର୍ଥନା କରୁଛନ୍ତି ।

ଇଟିଭି ଭାରତ, ପୁରୀ