ସ୍ୟାଣ୍ଡ ଆନିମେସନରେ ‘ଶ୍ରୀମନ୍ଦିର ପରିକ୍ରମା ପ୍ରକଳ୍ପ’: ଦେଖନ୍ତୁ ଶିଳ୍ପୀ ମାନସଙ୍କ କଳାକୃତି

Shrimandir Parikrama project in sand animation: ପୁରୀ: ଆସନ୍ତାକାଲି ଲୋକାର୍ପିତ ହେବାକୁ ଥିବା ‘ଶ୍ରୀମନ୍ଦିର ପରିକ୍ରମା ପ୍ରକଳ୍ପ’କୁ ନେଇ ସବୁଠି ଉତ୍ସାହ । ଏହି ଅବସରରେ ଅନ୍ତର୍ଜାତୀୟ ସ୍ୟାଣ୍ଡ ଆନିମେସନ ଶିଳ୍ପୀ ମାନସ କୁମାର ସାହୁ ଶ୍ରୀମନ୍ଦିର ପରିକ୍ରମା ପ୍ରକଳ୍ପର ଲୋକାର୍ପିତ ଉତ୍ସବକୁ ସ୍ୟାଣ୍ଡ ଆନିମେସନରେ ଅତି ସୁନ୍ଦର ନିଖୁଣ ଭାବରେ ପ୍ରଦର୍ଶିତ କରିଛନ୍ତି ।

ମାନସଙ୍କ ଆନିମେସନ କଳାକୃତିରେ ପ୍ରକଳ୍ପର ଲୋକାର୍ପଣ ଉତ୍ସବ ବିଭିନ୍ନ ନୀତିକାନ୍ତି ଓ ବିଧି ପ୍ରଦର୍ଶିତ ହୋଇଛି । ମହାରାଜ ଶ୍ରୀ ଦିବ୍ୟସିଂହ ଦେବ ଗୁଆ-ଚାଉଳ ଦେଇ ରାଜଗୁରୁଙ୍କୁ ବରଣ କରୁଛନ୍ତି, ରାଜଗୁରୁ ପରିକ୍ରମା ପର୍ବକୁ ବିଧିପୂର୍ଣ ଭାବେ ସମ୍ପୂର୍ଣ ଯଜ୍ଞାନୁଷ୍ଠାନକୁ ଆଗେଇ ନେବା ପାଇଁବ୍ରାହ୍ମଣ ସମାଜଙ୍କୁ ଦାୟିତ୍ୱ ଦେଉଛନ୍ତି । ସେହିପରି ବ୍ରାହ୍ମଣମାନଙ୍କ ଦ୍ୱାରା ଅଙ୍କୁର ରୋପଣ କିପରି କରାଯାଉଛି ଏବଂ ତ୍ରିଦେବଙ୍କ ଆବାହନ କରାଯାଉଛି । ତ୍ରିଦେବ ଏବଂ ପ୍ରଭୁଙ୍କ ଦର୍ଶନର ଦୃଶ୍ୟ ଏହି ସବୁକୁ ଅତିସୁନ୍ଦର ଭାବରେ ମାନସ ସାହୁ ତାଙ୍କ ବାଲୁକା ଆନିମେସନରେ ଦେଖାଇଛନ୍ତି ।

ପୁଣି ମହାରାଜ ଦିବ୍ୟସିଂହ ଦେବଙ୍କ ଦ୍ୱାରା ଯଜ୍ଞର ପୂର୍ଣ୍ଣାହୁତି ଦେବା ସହିତ ମୁଖ୍ୟମନ୍ତ୍ରୀ ଶ୍ରୀଯୁକ୍ତ ନବୀନ ପଟନାୟକଙ୍କ ହାତରେ ଶ୍ରୀମନ୍ଦିର ପରିକ୍ରମା ପ୍ରକଳ୍ପକୁ ଲୋକାର୍ପଣ କରିବାର ଦୃଶ୍ୟ ମଧ୍ୟ୍ୟ ସେ ତାଙ୍କ ଆନିମେସନ ରେ ଦେଖାଇଛନ୍ତି । ଏହି ଆନିମେସନ ଭିଡିଓଟି ୩ ମିନିଟି ୩୯ ସେକେଣ୍ଡର ହୋଇଥିବା ବେଳେ ଏହାକୁ ନିର୍ମାଣ କରିବାକୁ ମାନସଙ୍କୁ ପ୍ରାୟ ୧୫ ଘଣ୍ଟା ସମୟ ଲାଗିଛି ।

ଇଟିଭି ଭାରତ, ପୁରୀ