Holi Celebration: ଜୁନାଗଡ ବିଧାୟକଙ୍କ ଘରେ ଉଡିଲା ଫଗୁ, ହୋଲି ଖେଳିଲେ ବିଜେଡି ନେତା

ଭବାନୀପାଟଣା: ଫଗୁଣର ଫଗୁ ବର୍ଷାରେ ଭିଜୁଛି ଗାଁଠୁ ସହର  । ଚାରିଆଡେ ଚାଲିଛି ହୋଲି ସେଲିବ୍ରେସନ  । ବାଜା ବଜାଇ, ନାଚି ଗାଇ, ମିଠା ଖୁଆଇ ଲୋକମାନେ ପରସ୍ପରକୁ ରଙ୍ଗ ବୋଳୁଛନ୍ତି  । କୋରୋନା ମାହାମାରୀ ପାଇଁ ଦୁଇ ବର୍ଷ ହେଲା ହୋଲି ଫିକା ପଡିଥିବାବେଳେ ଏଥର କଟକଣା ନଥିବାରୁ ସବୁଠି ଜମୁଛି ରଙ୍ଗ ଖେଳ  । କଳାହାଣ୍ଡି ଜିଲ୍ଲାରେ ସକାଳୁ ଧୁମଧାମରେ ହୋଲି ପର୍ବ ପାଳନ ହେଉଛି । ଜିଲ୍ଲାରେ ବିଜେଡି ଶିବିରରେ ବି ହୋଲି ସେଲିବ୍ରେସନ ଦେଖିବାକୁ ମିଳିଛି । ଜୁନାଗଡ଼ ବିଧାୟକ ଦିବ୍ୟଶଙ୍କର ମିଶ୍ରଙ୍କ ବାସଭବନରେ ଜିଲ୍ଲା ବିଜେଡି ରଙ୍ଗର ପର୍ବ ପାଳନ କରୁଛି । ବିଧାୟକଙ୍କ ସହ ଅନ୍ୟାନ୍ୟ ରାଜନେତାମାନେ ପରସ୍ପରକୁ ଅବିର ଲଗାଇ ରଙ୍ଗ ଖେଳରେ ମସଗୁଲ ହୋଇଛନ୍ତି । ଏହି ଅବସରରେ ବିଧାୟକ କ୍ୟାପଟେନ ଦିବ୍ୟଶଙ୍କର ମିଶ୍ର ଜିଲ୍ଲାବାସୀଙ୍କୁ ହୋଲିର ଶୁଭେଚ୍ଛା ଜଣାଇଛନ୍ତି । ପ୍ରେମ, ଭାଇଚାରାର ଏହି ହୋଲି ପର୍ବରେ ପୂର୍ବ ରାଗ ଅଭିମାନ ପାଶୋରି ସମାଜ ପାଇଁ କାମ କରିବାକୁ ଜନ ସାଧାରଣଙ୍କୁ ନିବେଦନ କରିଛନ୍ତି ବିଧାୟକ  ।

ଇଟିଭି ଭାରତ, କଳାହାଣ୍ଡି