Watch Video: ବରଯାତ୍ରୀରେ ନାଚୁ ନାଚୁ ଟଳିପଡିଲେ ଯୁବକ

ଲକ୍ଷ୍ନୌ: ଡିଜେ ବାଜୁଥିଲା । ବରଯାତ୍ରୀରେ ଧୂଳିଉଡା ଡ୍ୟାନ୍ସ କରୁଥିଲେ ଯୁବକ । ହେଲେ ନାଚୁ ନାଚୁ ହଠାତ୍ ଉଡିଗଲା ପ୍ରାଣବାୟୁ । ବରଯାତ୍ରୀ କନ୍ୟା ଘରେ ପହଞ୍ଚିବା ପୂର୍ବରୁ ହୃଦଘାତରେ ଟଳିପଡିଲେ ଯୁବକ । ଯାହାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଘଟଣାଟି ଉତ୍ତରପ୍ରଦେଶ ଶାହଜହାନପୁରର । ମୃତ ଯୁବକଙ୍କ ନାମ ସଞ୍ଜୁ । ସେ ନିଜ ଭାଇ ଶାଳକ ବାହାଘରରେ ବରଯାତ୍ରୀ ଯାଇଥିଲେ । ଶାହଜହାନପୁର ଗୋକୁଳପୁର ଅଞ୍ଚଳରେ ବାହାଘର ଥିଲା । ଭିଡିଓରେ ଦେଖାଯାଇଛି, ଡିଜେ ବାଜୁଥିବା ବେଳେ ଅନ୍ୟ ବରଯାତ୍ରୀଙ୍କ ସହ ସଞ୍ଜୁ ନାଚରେ ମସଗୁଲ ଥିଲେ । ହେଲେ ନାଚୁ ନାଚୁ ହଠାତ୍ ତଳେ ପଡିଯାଇଥିଲେ  ।  

ଲୋକଙ୍କୁ ଲାଗିଲା ସେ ଅଭିନୟ କରୁଛନ୍ତି । ହେଲେ କିଛି ସମୟ ପରେ ଯେତେବେଳ ସଞ୍ଜୁ ନଉଠିଲେ ତାଙ୍କୁ ଉଠାଇବାକୁ ପ୍ରୟାସ କରାଗଲା । କିନ୍ତୁ ସେତେବେଳକୁ ତାଙ୍କ ଶରୀରରେ ଆଉ କୌଣସି ହଲଚଲ୍ ନଥିଲା  । ଏହାପରେ ସଙ୍ଗେ ସଙ୍ଗେ ତାଙ୍କୁ ହସ୍ପିଟାଲ ନିଆଯାଇଥିଲା । ହେଲେ ଡାକ୍ତର ମୃତ ଘୋଷଣା କରିଥିଲେ  । ଯାହାପରେ ବିବାହର ଖୁସିରେ ଦୁଃଖର ବାଦଲ ଘୋଟି ଆସିଥିଲା । ପ୍ରାଥମିକ ତଦନ୍ତରୁ ହୃଦଘାତରେ ଯୁବକଙ୍କ ମୃତ୍ୟୁ ଘଟିଥିବା ଜଣାପଡିଛି । ତାଙ୍କର ମୃତ୍ୟୁ ବେଳର ଭିଡିଓ ସୋସିଆଲ ମିଡିଆରେ ଖୁବ୍ ଭାଇରାଲ ହେଉଛି  ।

କୋରୋନା କାଳ ପରେ ହୃଦଘାତ ମାମଲା ଦ୍ରୁତଗତିରେ ବୃଦ୍ଧି ପାଉଛି  । ମୁଖ୍ୟତଃ ଯୁବବର୍ଗ ଅଧିକ ହୃଦଘାତର ଶିକାର ହେଉଛନ୍ତି । ବିଗତ କିଛି ଦିନରେ ସୋସିଆଲ ମିଡିଆରୁ ଅନେକ ଭିଡିଓ ସାମ୍ନାକୁ ଆସିଥିଲା, ଯେଉଁଥିରେ ଲୋକେ ନାଚୁଥିବା ବେଳେ ନଚେତ୍ ହଠାତ୍ ହୃଦଘାତରେ ଟଳି ପଡୁଥିବାର ଦେଖିବାକୁ ମିଳିଥିଲା  ।  

ବ୍ୟୁରୋ ରିପୋର୍ଟ, ଇଟିଭି ଭାରତ