Oscars 2023: ଓସ୍କାର ମଞ୍ଚରେ ନାଟୁ ନାଟୁକୁ ପରିଚିତ କଲେ ଦୀପିକା, କରତାଳିରେ କମ୍ପିଲା ଚତୁର୍ଦ୍ଦିଗ

ଲସ୍‌ ଆଞ୍ଜେଲସ୍‌: ଓସ୍କାର ମଞ୍ଚରେ ଉପସ୍ଥାପିକା ଭାବେ ପୁଣି ନିଜର କରିସ୍ମା ଦେଖାଇଛନ୍ତି ବଲିଉଡ ଅଭିନେତ୍ରୀ ଦୀପିକା ପାଦୁକୋନ । ସେପଟେ ୯୫ତମ ଏକାଡେମୀ ଆୱାର୍ଡରେ ନାଟୁ ନାଟୁ ଗୀତ ଓସ୍କାର ଜିତିଥିବାରୁ ଏହି ମଞ୍ଚରେ ନାଟୁ ନାଟୁ ନୃତ୍ୟ ପରିବେଷଣ ହୋଇଛି । ବିଦେଶୀ ନୃତ୍ୟଶିଳ୍ପୀ ଅବିକଳ ନାଟୁ ନାଟୁ ନୃତ୍ୟ ପରିବେଷଣ କରିଛନ୍ତି । ବେଷ୍ଟ ଓରିଜିନାଲ ସଙ୍ଗ କାଟେଗୋରୀରେ ଓସ୍କାର ଜିତିଥିବା ଏହି ଲୋକପ୍ରିୟ ଗୀତକୁ ବିଶ୍ବସ୍ତରୀୟ ମଞ୍ଚରେ ପରିଚିତ କରାଇଛନ୍ତି ବଲିଉଡର ହଟ ଅଭିନେତ୍ରୀ ଦୀପିକା । ସେ ନାଟୁ ନାଟୁ ସମ୍ପର୍କରେ ଉପସ୍ଥିତ ଅତିଥିଙ୍କୁ ପରିଚିତ କରିବା ପରେ ମଞ୍ଚରେ ହୋଇଥିଲା ନୃତ୍ୟ ପରିବେଷଣ । ଆଉ କରତାଳିରେ ଫାଟି ପଡ଼ିଥିଲା ଆୱାର୍ଡ ମହୋତ୍ସବ । ଯେତେବେଳେ ଦୀପିକା ନାଟୁ ନାଟୁର ନାମ ଉଚ୍ଚାରଣ କରିଥିଲେ ସେତେବେଳେ ଦର୍ଶକଙ୍କ ମଧ୍ୟରେ ଏକ ଅଭୂତପୂର୍ବ ଉତ୍ସାହ ଦେଖିବାକୁ ମିଳିଥିଲା । ଏହି ଉତ୍ସବରେ ଦୀପିକା ଏକ ବ୍ଲାକ ଗାଉନରେ ନଜର ଆସିଥିଲେ । ଦୀପିକା ୩ୟ ଭାରତୀୟ ଭାବେ ଓସ୍କାରରେ ଉପସ୍ଥାପିକା ଭାବେ ନଜର ଆସିଛନ୍ତି । ତାଙ୍କ ପୂର୍ବରୁ ପରସିସ ଖମ୍ବାତା ଓ ଗ୍ଲୋବାଲ ଆଇକନ ପ୍ରିୟଙ୍କା ଚୋପ୍ରା ଓସ୍କାରରେ ନଜର ଆସିଥିଲେ ।