Watch Video: ହାତୀ ହାବୁଡରେ ପଡିଗଲେ ଦୁଇ ଯୁବକ, ଏମିତି ବଞ୍ଚାଇଲେ ଜୀବନ

ଥିରୁଅନନ୍ତପୁରମ: ବାଇକରେ ଯାଉଥିବାବେଳେ ସାମ୍ନାକୁ ଆସିଗଲା ଦନ୍ତା । ଦନ୍ତାହାତୀ ମୁହଁରୁ ଅଳ୍ପକେ ବର୍ତ୍ତିଲା ଦୁଇ ଯୁବକଙ୍କ ଜୀବନ । ତାମିଲନାଡୁ ନୀଳଗିରି ମୁଦୁମଲାଇରେ ହାତୀ ହାବୁଡରେ ପଡିଥିବା ଦୁଇ ଜଣ ବାଇକ ଆରୋହୀ ଅଳ୍ପକେ ରକ୍ଷା ପାଇବାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେଉଛି । ଏହି ଭିଡିଓଟି ଗତ ୧୩ ତାରିଖର । ଏଥିରେ ଦେଖାଯାଇଛି ଦୁଇ ଜଣ ଯୁବକ ମୁଦୁମଲାଇ ଅଭୟାରଣ୍ୟ ଦେଇ ବାଇକରେ ଯାଉଛନ୍ତି । ରାସ୍ତାରେ ଏକ ଟ୍ରକ ଛିଡା ହୋଇଥିବାବେଳେ ଏତିକି ବେଳେ ଗୋଟିଏ ଦନ୍ତା ଗାଡି ଆଡକୁ ଚାଲି ଚାଲି ଆସୁଛି । ହାତୀକୁ ଦେଖି ବାଇକ ଆରୋହୀ ଟ୍ରକ ବାମ ପାର୍ଶ୍ବକୁ ଚାଲି ଯାଉଛନ୍ତି । ହାତୀଟି ଟ୍ରକ ଡାହାଣ ପାର୍ଶ୍ବରେ ରହିଛି  । ଏହାଦେଖି ଟ୍ରକ ଚାଳକ ତୁରନ୍ତ ନିଜ ଗାଡିର ଡୋର୍ ଖୋଲି ଦୁଇ ଯୁବକଙ୍କୁ ଭିତରକୁ ଆସିବାକୁ କହୁଛନ୍ତି । ଦୁଇ ଜଣଯାକ ଗାଡି ଭିତରେ ପଶିବାକୁ ଚେଷ୍ଟା କରିବା ମାତ୍ରେ ହାତୀଟି ତାଙ୍କ ଆଡକୁ ଚାଲି ଆସୁଛି । ହେଲେ ହାତୀ ଆକ୍ରମଣ କରିବା ପୂର୍ବରୁ ସୌଭାଗ୍ୟବଶତଃ ଦୁହେଁ ଗାଡି ଭିତରକୁ ଚାଲିଯାଇଥିଲେ  ।

ଏହାଦେଖି ହାତୀଟି ସେଠାରେ କିଛି ସମୟ ରହିବା ପରେ ଚାଲି ଯାଉଛି । ମିଳିଥିବା ସୂଚନା ଅନୁସାରେ ଦୁଇ ବାଇକ ଆରୋହୀଙ୍କ ଘର କେରଳରେ । ତେବେ ମଝିରେ ଟ୍ରକ ନଥିଲେ ସେମାନଙ୍କ ଅବସ୍ଥା କ'ଣ ହୋଇଥାନ୍ତା ଭିଡିଓ ଦେଖିଲେ ତାହା ଜଣାପଡୁଛି । ବାଇକ ଆରୋହୀଙ୍କ ପଛରେ କାରରେ ଯାଉଥିବା ଆଉ କିଛି କେରଳର ଯୁବକ ଏହି ଭିଡିଓଟି ଉତ୍ତୋଳନ କରିଛନ୍ତି । ଯାହା ଏବେ ସୋସିଆଲ ମିଡିଆରେ ଖୁବ୍ ଭାଇରାଲ ହେବାରେ ଲାଗିଛି ।  

ବ୍ୟୁରୋ ରିପୋର୍ଟ, ଇଟିଭି ଭାରତ