ସର୍ବ ଭାରତୀୟ ପୋଲିସ ବଡି ବିଲ୍ଡିଂ ପ୍ରତିଯୋଗିତାରେ ଗଞ୍ଜାମର ବଲାଲ ଖାନଙ୍କୁ ସ୍ୱର୍ଣ୍ଣ ପଦକ

ବ୍ରହ୍ମପୁର: ୭୨ତମ ସର୍ବ ଭାରତୀୟ ପୋଲିସ ବଡି ବିଲ୍ଡିଂ ପ୍ରତିଯୋଗିତାରେ ଗଞ୍ଜାମ ଜିଲ୍ଲା ଛତ୍ରପୁରର ବଲାଲ ଖାନଙ୍କୁ ମିଳିଲା ସ୍ୱର୍ଣ୍ଣ ପଦକ । ପ୍ରତିଯୋଗିତାରେ ୭୫ କିଲୋ ବର୍ଗରେ ବଲାଲ ପ୍ରଥମ ସ୍ଥାନ ଅଧିକାର କରିଛନ୍ତି । ଅକ୍ଟୋବର ୪ରୁ ୮ ତାରିଖ ପର୍ଯ୍ୟନ୍ତ ହରିୟାଣାର କର୍ଣ୍ଣଲ ଠାରେ ଏହି ପ୍ରତିଯୋଗିତା ଅନୁଷ୍ଠିତ ହୋଇଥିଲା । ଏଥିରେ ଓଡ଼ିଶାର ଛଅ ଜଣ ପ୍ରତିଯୋଗୀ ଅଂଶଗ୍ରହଣ କରିଥିଲେ ।  ତେବେ ଏହି ପ୍ରତିଯୋଗିତାରେ ମୋଟ ୧୮ ଜଣଙ୍କ ମଧ୍ୟରେ ବଲାଲ ଖାନ ପ୍ରଥମ ସ୍ଥାନ ଅଧିକାର କରି ଏଭଳି ସ୍ଵର୍ଣ୍ଣପଦକ ହାସଲ କରିଛନ୍ତି । 

ପୂର୍ବରୁ ବଲାଲ ଗତ ଜୁଲାଇ ମାସରେ ଦକ୍ଷିଣ ଏସିଆ ସୁନ୍ଦର ସ୍ୱାସ୍ଥ୍ୟ ପ୍ରତିଯୋଗିତାରେ ସ୍ଵର୍ଣ୍ଣ ପଦକ ପାଇଥିଲେ । ସେ ବର୍ତ୍ତମାନ ଗଞ୍ଜାମ ଜିଲ୍ଲାରେ କନେଷ୍ଟବଳ ଭାବେ କାର୍ଯ୍ୟରତ ରହିଥିବା ବେଳେ ଏହି ସଫଳତା ପାଇବା ପରେ ବିଭିନ୍ନ ମହଲରୁ ତାଙ୍କୁ ଶୁଭେଚ୍ଛା ଜଣାଯାଇଛି । ପୂର୍ବରୁ ବଡି ବିଲ୍ଡିଂ ପ୍ରତିଯୋଗିତାରେ ବଲାଲ୍ ରାଜ୍ୟ ଠାରୁ ଆରମ୍ଭ କରି ଜାତୀୟ ଓ ଆନ୍ତର୍ଜାତୀୟ ସ୍ତରରେ ଅନେକ ସୁନାମ ଆଣିଥିବା ବେଳେ ବର୍ତ୍ତମାନର ଏହି ସଫଳତା ପରେ ସର୍ବ ଭାରତୀୟ ପୋଲିସ ସୁନ୍ଦର ସ୍ୱାସ୍ଥ୍ୟ ପ୍ରତିଯୋଗିତାରେ ଆଉ ଏକ ରେକର୍ଡ ସୃଷ୍ଟି କରିଛି । 

ଇଟିଭି ଭାରତ, ବ୍ରହ୍ମପୁର