ଉପଦ୍ରବ କରି ଚାଲିଛନ୍ତି ହାତୀ, ଖୋଲା ଆକାଶ ତଳେ ୧୦ ପରିବାର

ଭବାନୀପାଟଣା: କଳାହାଣ୍ଡି ଜିଲ୍ଲା ଲାଞ୍ଜିଗଡ଼ ବ୍ଲକ ଅଞ୍ଚଳରେ ଦିର୍ଘଦିନ ହେଲା ଜଙ୍ଗଲି ହାତୀଙ୍କ ଉପଦ୍ରବ ବୃଦ୍ଧି ପାଇବାରେ ଲାଗିଛି । କୁଲେରକୁଚା ଜଙ୍ଗଲରୁ ୧୬ ଟିକିଆ ହାତୀପଲ ଆସି ରଙ୍ଗଗୁଡା ଗାଁର ୭ ଟି ଘର ଭାଙ୍ଗିବା ସହ ଧାନ, ଚାଉଳ, ମାଣ୍ଡିଆ ଆଦି ସାମଗ୍ରୀ ଖାଇ ନଷ୍ଟ କରି ଦେଇଛନ୍ତି । ଗାଁର ୧୦ ଟି ପରିବାର ର ୪୦ ରୁ ଊର୍ଦ୍ଧ୍ବ ସଦସ୍ୟ ଏବେ ଖୋଲା ଆକାଶ ତଳେ ଜୀବନଯାପନ କରୁଛନ୍ତି । ଏନେଇ ଖବର ପାଇ ଘଟଣାସ୍ଥଳରେ ବନ କର୍ମଚାରୀ ପହଞ୍ଚି କ୍ଷୟକ୍ଷତିର ଆକଳନ କରିବା ପରେ ସରକାରୀ ସହାୟତା ଯୋଗାଇ ଦିଆଯିବ ବୋଲି ସୂଚନା ଦେଇଛନ୍ତି । ଜଙ୍ଗଲ କ୍ଷୟ ହେବା କାରଣରୁ ଦିନକୁ ଦିନ ଜଙ୍ଗଲୀ ହାତୀ ଜନବସତୀ ମୁହାଁ ହେଉଥିଲେ ମଧ୍ୟ ବନ ବିଭାଗ ଏହାକୁ ରୋକିବାରେ ବିଫଳ ହୋଇଥିବା ଅଭିଯୋଗ ହୋଇଛି । କଳାହାଣ୍ଡିରୁ ଅଜିତ କୁମାର ସିଂ, ଇଟିଭି ଭାରତ