ରାଜସ୍ଥାନ ରାଜନୀତି: ଉପମୁଖ୍ୟମନ୍ତ୍ରୀ ପଦରୁ ହଟିଲେ ସଚିନ ପାଇଲଟ

ଜୟପୁର: ରାଜସ୍ଥାନର କ୍ଷମତା ଯୁଦ୍ଧ ଭିତରେ ସଚିନ ପାଇଲଟଙ୍କୁ ଉପମୁଖ୍ୟମନ୍ତ୍ରୀ ପଦରୁ ହଟାଇଲା କଂଗ୍ରେସ । ଏହାସହ ତାଙ୍କୁ ରାଜ୍ୟ କଂଗ୍ରେସ ସଭାପତି ପଦରୁ ମଧ୍ୟ ହଟାଇଲା ଦଳ । ଏନେଇ ସାମ୍ବାଦିକ ସମ୍ମିଳନୀରେ ସୂଚନା ଦେଲେ କଂଗ୍ରେସର ରାଷ୍ଟ୍ରୀୟ ମୁଖପାତ୍ର ରଣଦୀପ ସୁରଜେୱାଲା । ଏହାସହ ସଚିନଙ୍କ ସହ ଥିବା ମନ୍ତ୍ରୀ ରମେଶ ମୀନା ଓ ବିଶ୍ବେନ୍ଦ୍ର ସିଂହଙ୍କୁ ମଧ୍ୟ ମନ୍ତ୍ରୀ ପଦରୁ ହଟାଯାଇଛି । ସେହିପରି ରାଜ୍ୟ କଂଗ୍ରେସ ସଭାପତି ପଦରୁ ସଚିନଙ୍କୁ ହଟାଯାଇ ତାଙ୍କ ସ୍ଥାନରେ ଗୋବିନ୍ଦ ଡୋଟାସରାଙ୍କୁ ପିସିସି ସଭାପତି ଦାୟିତ୍ବ ଦିଆଯାଇଥିବା ସେ ଦର୍ଶାଇଛନ୍ତି । ସେହିପରି ଗଣେଶ ଗୋଗ୍ରାଙ୍କୁ ରାଜସ୍ଥାନର ନୂଆ ଯୁବ କଂଗ୍ରେସ ସଭାପତି ଓ ହେମ ସିଂ ଶେଖାୱତଙ୍କୁ ସେବା ଦଳର ଅଧ୍ୟକ୍ଷ ଭାବେ ଦଳ ଚୟନ କରିଥିବା ରଣଦୀପ କହିଛନ୍ତି ।