ହାଇଦ୍ରାବାଦ: ବିଶ୍ବର ଜନସଂଖ୍ୟା ପ୍ରାୟ 8 ବିଲିୟନ। ତେବେ ଦିନକୁ ଦିନ ଏହି ସଂଖ୍ୟା ହ୍ରାସ ପାଇବା ପରିବର୍ତ୍ତେ ଦ୍ରୁତ ଗତିରେ ବୃଦ୍ଧି ପାଇବାରେ ଲାଗିଛି । ଏହାକୁ ରୋକିବା ପାଇଁ ଅନେକ ସରକାର ଏବଂ ବହୁ ଆନ୍ତର୍ଜାତୀୟ ସଂଗଠନ କ୍ରମାଗତ ଭାବରେ ସଚେତନତା ସୃଷ୍ଟି କରୁଛନ୍ତି । ଏଥିସହ ଗର୍ଭନିରୋଧକ ପଦ୍ଧତି ବାବଦରେ ସଚେତନତା କରିବା ସହ ଯୌନଗତ ଓ ପ୍ରଜନନ ସ୍ୱାସ୍ଥ୍ୟ ସମ୍ପର୍କରେ ଅବଗତ କରାଇବା ପାଇଁ ସାରା ବିଶ୍ବରେ ପ୍ରତିବର୍ଷ ସେପ୍ଟେମ୍ବର 26 ତାରିଖରେ 'ବିଶ୍ୱ ଗର୍ଭନିରୋଧକ ଦିବସ' ପାଳନ କରାଯାଏ ।
ପ୍ରଥମେ 2007 ମସିହାରେ ପ୍ରଥମେ ଗର୍ଭନିରୋଧକ ଦିବସ ପାଳନ କରାଯାଇଥିଲା । ଅନେକ ରିପୋର୍ଟରୁ ଜଣାପଡ଼ିଛି ଯେ ବହୁ ସଂଖ୍ୟକ ଲୋକ ଗର୍ଭନିରୋଧକ ବ୍ୟବହାର କରନ୍ତି ନାହିଁ । ଗର୍ଭନିରୋଧକ ବଟିକା ବିଷୟରେ ସମସ୍ତେ ଶୁଣିଥିବେ । କିନ୍ତୁ ଅନେକ ଲୋକ ପ୍ରଶ୍ନ କରନ୍ତି ଯେ ଗର୍ଭନିରୋଧକ ଔଷଧ ବ୍ୟବହାର କରିବା ପ୍ରକୃତରେ ସୁରକ୍ଷିତ କି ?
ଗର୍ଭନିରୋଧକର ଅର୍ଥ କଣ?: ବିଶେଷଜ୍ଞଙ୍କ ଅନୁଯାୟୀ, ପରିବାର ଯୋଜନା କିମ୍ବା ଗର୍ଭନିରୋଧ ପାଇଁ ବ୍ୟବହୃତ ପଦ୍ଧତିକୁ ଗର୍ଭନିରୋଧକ କୁହାଯାଏ । ଆଜି ମଧ୍ୟ ବହୁ ସଂଖ୍ୟକ ଲୋକଙ୍କର ଏହି ବିଷୟରେ ଅବଗତ ନାହାନ୍ତି । ଏହା ଏକ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ପ୍ରସଙ୍ଗ, ଯାହା ବିଷୟରେ ସଚେତନତା ପ୍ରସାର କରାଯିବା ଉଚିତ । ସ୍ତ୍ରୀ ରୋଗ ବିଶେଷଜ୍ଞଙ୍କ ପରାମର୍ଶ ପରେ ପରିବାର ଯୋଜନା ପାଇଁ ଗର୍ଭନିରୋଧକ ଏକ ଭଲ ଏବଂ ନିରାପଦ ବିକଳ୍ପ ହୋଇପାରେ । ବୟସ ଏବଂ ଶରୀରର ଅବସ୍ଥା ଉପରେ ଆଧାର କରି ଲୋକଙ୍କୁ ଏହା ପରାମର୍ଶ ଦିଆଯାଇଥାଏ ।
ଗର୍ଭ ନିରୋଧକର ପ୍ରକାର: ମୁଖ୍ୟତଃ ଗର୍ଭନିରୋଧକ 4 ପ୍ରକାରର ଅଟେ । ଅର୍ଥାତ 4ଟି ଉପାୟରେ ଗର୍ଭଧାରଣକୁ ରୋକିପାରିବେ । ପ୍ରଥମଟି ହେଉଛି ଗର୍ଭନିରୋଧକ ଏକ ପ୍ରତିବନ୍ଧକ ପଦ୍ଧତି, ଯେଉଁଥିରେ ଗର୍ଭଧାରଣକୁ ଏଡ଼ାଇବା ପାଇଁ ପୁରୁଷ କଣ୍ଡୋମ ବ୍ୟବହାର କରିପାରିବେ । ଦ୍ୱିତୀୟ ପଦ୍ଧତି ହେଉଛି ଗର୍ଭନିରୋଧକ ଔଷଧ, ଯାହାକୁ ହରମୋନାଲ ଗର୍ଭନିରୋଧକ ମଧ୍ୟ କୁହାଯାଏ । ତୃତୀୟ ପଦ୍ଧତି ହେଉଛି ଇଣ୍ଟ୍ରାଟେରାଇନ୍ ଗର୍ଭନିରୋଧକ, ଯାହା ଜଣେ ଡାକ୍ତରଙ୍କ ଦ୍ବାରା ଜରାୟୁରେ କିଛି ସାମଗ୍ରୀ ରଖାଯାଏ । ପ୍ରତିଦିନ ଏହା ସ୍ୱଳ୍ପ ପରିମାଣର ପ୍ରୋଜେଷ୍ଟିନ ରିଲିଜ କରିଥାଏ, ଯାହା କି ଗର୍ଭଧାରଣରୁ ମହିଳାଙ୍କୁ ଦୂରେଇ ରଖେ । ଚତୁର୍ଥ ପଦ୍ଧତି ହେଉଛି ସର୍ଜିକାଲ୍ ଗର୍ଭନିରୋଧକ, ଯାହା ସର୍ଜିକାଲ୍ ଷ୍ଟେରିଲାଇଜେସନ୍ ସହିତ ଜଡିତ ।
ଏହା ମଧ୍ୟ ପଢନ୍ତୁ: Pregnancy Test: ଘରେ ଗର୍ଭ ପରୀକ୍ଷା କରୁଛନ୍ତି କି? ଜାଣନ୍ତୁ ସଠିକ ପ୍ରକ୍ରିୟା
ଗର୍ଭନିରୋଧକ ଔଷଧ ବ୍ୟବହାର କରିବା ନିରାପଦ କି ?: ବିଶେଷଜ୍ଞମାନେ କହିଛନ୍ତି ଯେ, ଡାକ୍ତରଙ୍କ ପରାମର୍ଶ ବିନା ଗର୍ଭନିରୋଧକ ବଟିକା ବ୍ୟବହାର କରାଯିବା ଉଚିତ ନୁହେଁ । ଅନେକ ଲୋକ ଡାକ୍ତରଙ୍କ ପରାମର୍ଶ ନକରି ଜରୁରୀକାଳୀନ ଗର୍ଭନିରୋଧକ ଔଷଧ ବ୍ୟବହାର କରନ୍ତି, ଯାହା ବିପଦଜନକ ହୋଇପାରେ । ଜରୁରୀକାଳୀନ ବଟିକାକୁ ଜୀବନରେ ଥରେ କିମ୍ବା ଦୁଇଥରରୁ ଅଧିକ ଗ୍ରହଣ କରାଯିବା ଉଚିତ ନୁହେଁ ଅନ୍ୟଥା ଗୁରୁତର ପାର୍ଶ୍ବ ପ୍ରତିକ୍ରିୟା ହୋଇପାରେ । ଡାକ୍ତରଙ୍କ ପରାମର୍ଶ ନେଇ ଔଷଧ ଗ୍ରହଣ କରିବା ନିଦାପଦ ବୋଲି ବିଶେଷଜ୍ଞମାନେ ପରାମର୍ଶ ଦେଇଛନ୍ତି ।
ପାର୍ଶ୍ବପ୍ରତିକ୍ରିୟାରେ କଣ ହୁଏ: ବିଶେଷଜ୍ଞଙ୍କ ଅନୁଯାୟୀ, ଗର୍ଭନିରୋଧକ ବଟିକାର ଅତ୍ୟଧିକ ବ୍ୟବହାର ଦ୍ୱାରା ଷ୍ଟ୍ରୋକ୍ ହୋଇଥାଏ । ଏଥିରୁ ରକ୍ଷା ପାଇବା ପାଇଁ ଏହି ବଟିକା କେବଳ ସ୍ତ୍ରୀ ରୋଗ ବିଶେଷଜ୍ଞଙ୍କ ପରାମର୍ଶରେ ବ୍ୟବହାର କରାଯିବା ଉଚିତ୍ । ବଟିକାର ଅତ୍ୟଧିକ ବ୍ୟବହାର ହାଇପରକୋଲେଷ୍ଟେରୋମିଆ, ରକ୍ତ ଜମାଟ ସମସ୍ୟା ଏବଂ ହରମୋନ୍ ସମସ୍ୟା ମଧ୍ୟ ସୃଷ୍ଟି କରିପାରେ । ଏହା ବିଭିନ୍ନ ଲୋକଙ୍କ ଉପରେ ଭିନ୍ନ ପ୍ରଭାବ ପକାଇପାରେ । ତେଣୁ ବ୍ୟବହାର ପୂର୍ବରୁ ଡାକ୍ତରଙ୍କ ପରାମର୍ଶ ନେବା ଆବଶ୍ୟକ ଅଟେ ।
ବିଶ୍ବ ଗର୍ଭନିରୋଧକ ଦିବସର ଥିମ୍ : ଚଳିତ ବର୍ଷ ବିଶ୍ୱ ଗର୍ଭନିରୋଧକ ଦିବସ 2023ର ବିଷୟବସ୍ତୁ ହେଉଛି The Power of Options, ଯାହାକି ଗର୍ଭନିରୋଧକ ବିକଳ୍ପଗୁଡ଼ିକ ସେମାନଙ୍କର ପ୍ରଜନନ ସ୍ବାସ୍ଥ୍ୟକୁ ନିୟନ୍ତ୍ରଣ କରିବାରେ ଗୁରୁତ୍ୱପୂର୍ଣ୍ଣ ଭୂମିକାକୁ ଦର୍ଶାଇଥାଏ ।
ବ୍ୟୁରୋ ରିପୋର୍ଟ, ଇଟିଭି ଭାରତ
