ହାଇଦ୍ରାବାଦ: ପ୍ରତିବର୍ଷ 18 ରୁ 24 ନଭେମ୍ବର ମଧ୍ୟରେ ବିଶ୍ବବ୍ୟାପୀ ଆଣ୍ଟିମାଇକ୍ରୋବାୟଲ୍ ସଚେତନତା ସପ୍ତାହ(World Antimicrobial Awareness Week) ପାଳନ କରାଯାଏ । ଆଣ୍ଟିମାଇକ୍ରୋବାୟଲ୍ ପ୍ରତିରୋଧ ଯଥା ଆଣ୍ଟିବାୟୋଟିକ୍ ପ୍ରତିରୋଧ, ଏହାର କାରଣ ଏବଂ ବିଭିନ୍ନ ସମସ୍ୟା ବିଷୟରେ ସଚେତନ କରାଇବା ଏହି ଦିବସ ପାଳନର ଉଦ୍ଦେଶ୍ୟ ।
ଆଣ୍ଟିବାୟୋଟିକ୍ ଏବଂ ଆଣ୍ଟିମାଇକ୍ରୋବାୟଲ୍ ପ୍ରତିରୋଧ(AMR)ର ସଠିକ୍ ବ୍ୟବହାର ବିଷୟରେ ବିଶ୍ବସ୍ତରରେ ସଚେତନତା ସୃଷ୍ଟି କରିବା, ସାଧାରଣ ଜନତା ଏବଂ ସ୍ୱାସ୍ଥ୍ୟ କର୍ମୀଙ୍କୁ ଡ୍ରଗ୍ ପ୍ରତିରୋଧକ ସଂକ୍ରମଣକୁ ନିୟନ୍ତ୍ରଣ କରିବା ପାଇଁ ପ୍ରତିବର୍ଷ ଏକ ପ୍ଲାଟଫର୍ମ ସୃଷ୍ଟି କରିବା ପାଇଁ ଏହି ଦିବସ ପାଳନ କରାଯାଉଛି । ଚଳିତ ବର୍ଷ ବିଶ୍ୱ ଆଣ୍ଟି ମାଇକ୍ରୋବାୟଲ୍ ସଚେତନତା ସପ୍ତାହ ଆଣ୍ଟି ମାଇକ୍ରୋବାୟଲ୍ ପ୍ରତିରୋଧକୁ ରୋକିବା ପାଇଁ ଏକାଠି ହେବା(Preventing Anti Microbial Resistance Together) ଥିମ୍ ଉପରେ ପାଳନ କରାଯାଉଛି । ଏହା ସହିତ ବିଶ୍ୱ ସ୍ୱାସ୍ଥ୍ୟ ସଂଗଠନ ଦ୍ୱାରା ଏହି କାର୍ଯ୍ୟକ୍ରମ ପାଇଁ "ଗୋ ବ୍ଲୁ ଅଭିଯାନ"(go blue campaign) ମଧ୍ୟ ପରିଚାଳିତ ହେଉଛି ।
ଉଦ୍ଦେଶ୍ୟ ଏବଂ ଇତିହାସ
ସମସ୍ତେ ଜାଣନ୍ତି ଯେ, ଆଣ୍ଟିବାୟୋଟିକ୍ କୋଟି କୋଟି ଲୋକଙ୍କ ଜୀବନ ରକ୍ଷା କରିଛି ଏବଂ ସେମାନଙ୍କ ସ୍ୱାସ୍ଥ୍ୟରେ ଉନ୍ନତି ଆଣିଛି, କିନ୍ତୁ ଗତ କିଛି ବର୍ଷ ମଧ୍ୟରେ ଏଥିପାଇଁ ଔଷଧ ପ୍ରତିରୋଧକତା ବୃଦ୍ଧି ହେବାର ଚର୍ଚ୍ଚା ହେଉଛି । ଯଦି ଏପରି ହୁଏ, ତେବେ ଅନେକ ସାଧାରଣ ଏବଂ ଜଟିଳ ରୋଗ ଚିକିତ୍ସାରେ ସମସ୍ୟା ହୋଇପାରେ । ଏଥି ସହିତ ଚିକିତ୍ସା ସମ୍ବନ୍ଧରେ ଡାକ୍ତରଙ୍କ ପାଇଁ ଚ୍ୟାଲେଞ୍ଜ ମଧ୍ୟ ବଢିପାରେ । ପ୍ରତିବର୍ଷ ଏହି କାରଣରୁ 7 ଲକ୍ଷରୁ ଅଧିକ ଲୋକ ପ୍ରାଣ ହରାଉଥିବା ଜଣାପଡିଛି । ତେବେ ଔଷଧ ପ୍ରତିରୋଧକତା ହେଉଛି, ଆଣ୍ଟିମାଇକ୍ରୋବାୟଲ୍ର ମାତ୍ରାଧିକ ବ୍ୟବହାର କାରଣରୁ ଶରୀରରେ ଅନ୍ୟାନ୍ୟ ଔଷଧର ପ୍ରଭାବ ପଡିପାରୁ ନାହିଁ, ଫଳରେ ଜଟିଳ ରୋଗର ଚିକିତ୍ସା କଠିନ ହେଉଛି ।
ବିଶ୍ବ ସ୍ୱାସ୍ଥ୍ୟ ସଂଗଠନ ଅନୁଯାୟୀ, ଜୀବାଣୁ, ଭୂତାଣୁ, କବକ ଏବଂ ପରଜୀବୀ ସମୟ ସହିତ ପରିବର୍ତ୍ତନ ହେବାସହ ଔଷଧ ପ୍ରତି ପ୍ରତିକ୍ରିୟା ନକଲେ ଆଣ୍ଟିମାଇକ୍ରୋବାୟଲ୍ ପ୍ରତିରୋଧ(Antimicrobial Resistance, AMR) ହୁଏ । ଏହି କାରଣରୁ ସଂକ୍ରମଣର ଚିକିତ୍ସା କଷ୍ଟସାଧ୍ୟ ହୋଇଯାଏ, ବେଳେବେଳେ ଗୁରୁତର ରୋଗ ହେବାର ଆଶଙ୍କା ମଧ୍ୟ ବଢିଥାଏ । ଏହି ସମସ୍ତ ବିଷୟକୁ ଧ୍ୟାନରେ ରଖି ଆଣ୍ଟିବାୟୋଟିକ୍ ପ୍ରତିରୋଧ ବିଷୟରେ ସାଧାରଣ ଲୋକଙ୍କ ମଧ୍ୟରେ ସଚେତନତା ବୃଦ୍ଧି କରିବାର ଆବଶ୍ୟକତାକୁ ସ୍ୱୀକାର କରି ବିଶ୍ୱ ସ୍ୱାସ୍ଥ୍ୟ ସଂଗଠନ 2015 ରେ ବିଶ୍ୱ ଆଣ୍ଟିବାୟୋଟିକ୍ ସଚେତନତା ସପ୍ତାହ ବା ବିଶ୍ୱ ଆଣ୍ଟିମାଇକ୍ରୋବାୟଲ୍ ସଚେତନତା ସପ୍ତାହ ପାଳନ କରିବା ଆରମ୍ଭ କଲା ।
ୟୁରୋପୀୟ ସରକାର 2011 ମସିହାରେ ଆଣ୍ଟିବାୟୋଟିକ୍ ପ୍ରତିରୋଧ ଉପରେ ଏକ କାର୍ଯ୍ୟ ଯୋଜନା ପ୍ରସ୍ତୁତ କରିବା ପରେ ଏହି ପଦକ୍ଷେପ ନିଆଯାଇଥିଲା । ମେ' 2015 ରେ, ବିଶ୍ୱ ସ୍ୱାସ୍ଥ୍ୟ ସଭା ଆଣ୍ଟିବାୟୋଟିକ୍ ଏବଂ ଅନ୍ୟାନ୍ୟ ଆଣ୍ଟିମାଇକ୍ରୋବାୟଲ୍ ଔଷଧ ପ୍ରତିରୋଧର ବଢୁଥିବା ସମସ୍ୟାର ସମାଧାନ ପାଇଁ ଏକ ବିଶ୍ୱସ୍ତରୀୟ କାର୍ଯ୍ୟ ଯୋଜନାକୁ ଅନୁମୋଦନ କରିଥିଲା । ଏହାର ଏକ ମୁଖ୍ୟ ଉଦ୍ଦେଶ୍ୟ ହେଉଛି ପ୍ରଭାବଶାଳୀ ଯୋଗାଯୋଗ ମାଧ୍ୟମରେ ଲୋକଙ୍କ ମଧ୍ୟରେ "AMR" ର ସଚେତନତା ଏବଂ ବୁଝାମଣାକୁ ଉନ୍ନତ କରିବା । ସେବେଠାରୁ ବିଶ୍ୱ ଆଣ୍ଟିମାଇକ୍ରୋବାୟଲ୍ ସଚେତନତା ସପ୍ତାହ ପ୍ରତିବର୍ଷ ବିଶ୍ୱସ୍ତରୀୟ ଅଭିଯାନ ଭାବେ ପାଳନ କରାଯାଏ ।
ଅଭିଯାନ:-
ବିଶ୍ୱ ଆଣ୍ଟିମାଇକ୍ରୋବାୟଲ୍ ସଚେତନତା ସପ୍ତାହ ଅବସରରେ, AMR ର ସଚେତନତା ଏବଂ ବୁଝାମଣାରେ ଉନ୍ନତି ଆଣିବା ପାଇଁ ସାଧାରଣ ଜନତା, ସ୍ୱାସ୍ଥ୍ୟ ବୃତ୍ତିଗତ ତଥା ନୀତି ନିର୍ଣ୍ଣୟକାରୀଙ୍କ ମଧ୍ୟରେ ଆଲୋଚନା ପାଇଁ ବିଭିନ୍ନ ଅଭିଯାନର ଆୟୋଜନ କରାଯାଇଛି । ଚଳିତ ବର୍ଷ ସମସ୍ତ ଅଭିଯାନ ସହିତ ବିଶ୍ୱ ସ୍ୱାସ୍ଥ୍ୟ ସଂଗଠନ ମଧ୍ୟ ଏହି କାର୍ଯ୍ୟକ୍ରମ ପାଇଁ ଏକ ରଙ୍ଗ ସ୍ଥିର କରିଛି । ଏହି ସଂଗଠନ ଦ୍ୱାରା ଚଳିତ ବର୍ଷ "ଗୋ ବ୍ଲୁ ଅଭିଯାନ" ଆୟୋଜନ କରାଯାଉଛି, ଯେଉଁଥିରେ ସଚେତନତା ସପ୍ତାହ ସହ ଜଡିତ କାର୍ଯ୍ୟକ୍ରମରେ ଅଂଶଗ୍ରହଣ କରୁଥିବାବେଳେ ଫିକା ନୀଳ ରଙ୍ଗର ପୋଷାକ ପିନ୍ଧିବାକୁ ଲୋକଙ୍କୁ ନିବେଦନ କରାଯାଇଛି ।
ଏହା ବ୍ୟତୀତ ସାଧାରଣ ଜନତାଙ୍କୁ ସେମାନଙ୍କର ସୋସିଆଲ ମିଡିଆ ପ୍ରୋଫାଇଲକୁ ନୀଳ ରଙ୍ଗରେ ରଖିବା ସହ ସେମାନଙ୍କ ବନ୍ଧୁ, ପରିବାର ଏବଂ ସହକର୍ମୀଙ୍କୁ ମଧ୍ୟ ସମାନ କାର୍ଯ୍ୟ କରିବାକୁ ପ୍ରେରଣା ଦେବାକୁ, ସୋସିଆଲ ମିଡିଆରେ ନିଜର କିମ୍ବା ଗ୍ରୁପ୍ ଫଟୋ ପୋଷ୍ଟ କରିବାକୁ ସୋସିଆଲ ମିଡିଆରେ ପୋଷ୍ଟ କରିବାକୁ କୁହାଯାଇଛି । ଏହାର ମୁଖ୍ୟ କାରଣ ହେଉଛି, ଯେଉଁମାନେ ଏ ବାବଦରେ ଜାଣିନଥିବେ ସେମାନଙ୍କ ନିକଟରେ ସଚେତନତା ବାର୍ତ୍ତା ପହଞ୍ଚିବ ।
ଗୁରୁତ୍ୱ
ଆଣ୍ଟିବାୟୋଟିକ୍ ପ୍ରତିରୋଧର ବଢିଥିବା ସମସ୍ୟାର ସମାଧାନ ପାଇଁ ସଚେତନତା ଏବଂ ନୀତି ପ୍ରସ୍ତୁତ କରିବାରେ ବିଶ୍ୱ ଆଣ୍ଟିମାଇକ୍ରୋବାୟଲ୍ ସଚେତନତା ସପ୍ତାହ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥାଏ । ଏଥିପାଇଁ ପ୍ରତିବର୍ଷ ଏକ ବିଶ୍ୱସ୍ତରୀୟ କାର୍ଯ୍ୟ ଯୋଜନା ପାଳନ କରାଯାଏ । ଏହି ସଚେତନତା ସପ୍ତାହ କେବଳ ଡ୍ରଗ୍ ପ୍ରତିରୋଧ ଏବଂ ଏହା ହେତୁ ଉପୁଜୁଥିବା ସମସ୍ୟା ଉପରେ ସଚେତନତା ଅଭିଯାନର ଆୟୋଜନ କରିବାର ଏକ ସୁଯୋଗ ପ୍ରଦାନ କରେ ନାହିଁ, ଏହା ମଧ୍ୟ ଆଣ୍ଟିବାୟୋଟିକ୍ର ମୌଳିକ ନୀତି ଏବଂ ଏହାର ମୁକାବିଲା ପାଇଁ ପ୍ରେରଣା ଯୋଗାଇଥାଏ । ଏହା ମଧ୍ୟ କାର୍ଯ୍ୟକ୍ରମ ଆୟୋଜନ ପାଇଁ ପ୍ରେରଣା ଯୋଗାଇଥାଏ ।
