ନ୍ୟୁୟର୍କ: ଚା, ଚିଆ ସିଡ୍ସ, ଆପଲ୍ ଏବଂ ଡାର୍କ ଚକୋଲେଟ୍ ପରି ଫ୍ଲାଭାନୋଲରେ ଭରପୂର ଖାଦ୍ୟ ଖାଇବା ଦ୍ୱାରା ବୟସ ସମ୍ବନ୍ଧୀୟ ସ୍ମୃତି ଶକ୍ତି ହ୍ରାସ ହେବାର ଆଶଙ୍କା ଦୂର ହୋଇପାରେ । ଅର୍ଥାତ ପରିଣତ ବୟସରେ ମଧ୍ୟ ବଜାୟ ରହିବ ସ୍ମରଣ ଶକ୍ତି । ଏନେଇ ଏକ ରିପୋର୍ଟରେ ପ୍ରକାଶିତ ହୋଇଛି । କଲମ୍ବିଆ ଏବଂ ବ୍ରିଗମ୍ ଏବଂ ମହିଳା ହସପିଟାଲ୍ ହାଭାର୍ଡର ଅନୁସନ୍ଧାନକାରୀଙ୍କ ନେତୃତ୍ୱରେ ହୋଇଥିବା ଏହି ଅଧ୍ୟୟନରେ ଦର୍ଶାଯାଇଛି, ଯେ 60 ବର୍ଷରୁ ଅଧିକ ବୟସର ଫ୍ଲାଭାନୋଲ୍ ଅଭାବୀ ବୟସ୍କମାନଙ୍କୁ ଏହି ଖାଦ୍ୟକୁ ଦିଆଯିବା ଦ୍ବାରା ସ୍ମୃତିଶକ୍ତିରେ ଉନ୍ନତି ଦେଖାଗଲା ।
ଏନେଇ କଲମ୍ବିଆ ୟୁନିଭରସିଟି ଭେଜେଲୋସ୍ କଲେଜ୍ ଅଫ୍ ଫିଜିସିଆନ୍ସ ଆଣ୍ଡ ସର୍ଜନର ନ୍ୟୁରୋସାଇକୋଲୋଜି ପ୍ରଫେସର ଆଡାମ ବ୍ରିକମ୍ୟାନ କହିଛନ୍ତି, କମ୍ ଫ୍ଲାଭାନୋଲ୍ ଡାଏଟ୍ ସହିତ ଅଧ୍ୟୟନର ଅଂଶଗ୍ରହଣକାରୀଙ୍କ ମଧ୍ୟରେ ଉନ୍ନତି ଯଥେଷ୍ଟ ଥିଲା ଏବଂ ବୟସ୍କମାନଙ୍କ ମଧ୍ୟରେ ସ୍ମୃତିଶକ୍ତିରେ ଉନ୍ନତି ଆଣିବା ପାଇଁ ଫ୍ଲାଭାନୋଲ୍ ଡାଏଟ୍ ଅଧିକ କାର୍ଯ୍ୟକ୍ଷମ ଅଟେ ।
ନ୍ୟାସନାଲ୍ ଏକାଡେମୀ ଅଫ୍ ସାଇନ୍ସେସ୍ ପ୍ରୋସିଡିଙ୍ଗ୍ ପକ୍ଷରୁ ମଧ୍ୟ ଏହି ଅଧ୍ୟୟନକୁ ସମର୍ଥନ କରାଯାଇଛି । ବୃଦ୍ଧାବସ୍ଥାରେ ମସ୍ତିଷ୍କ ପାଇଁ ପୃଷ୍ଟକର ଖାଦ୍ୟ ଖାଇବା ଆବଶ୍ୟକ । ଫଳରେ ଯେଉଁ ବୟସରେ ସ୍ମରଣ ଶକ୍ତି ହ୍ରାସ ହେବା କଥା ତାହାକୁ ବିଳମ୍ବ କରିଥାଏ । ଚିଆ ସିଡ୍ସ, ଆପଲ, ଡାର୍କ ଚକୋଲେଟରେ ଏହି ସବୁ ଗୁଣ ଭରପୁର ହୋଇ ରହିଛି । ଅନ୍ୟପଟେ କଲମ୍ବିଆର ନ୍ୟୁରୋଲୋଜି ପ୍ରଫେସର ସ୍କଟ ସ୍ମାଲଙ୍କ କହିବା ଅନୁସାରେ, ଯେଉଁ ଶତାବ୍ଦୀରେ ଆମେ ବଞ୍ଚିଛୁ, ଅନୁସନ୍ଧାନରୁ ଜଣାପଡିଛି ଯେ ବାର୍ଦ୍ଧକ୍ୟ ସମୟରେ ସ୍ମରଣ ଶକ୍ତିକୁ ବୃଦ୍ଧି କରିବା ପାଇଁ ପୋଷକ ତତ୍ତ୍ବର ଆବଶ୍ୟକତା ରହିଛି । ତେଣୁ ଏହି ସବୁ ଖାଦ୍ୟ ସ୍ବାସ୍ଥ୍ୟ ପକ୍ଷେ ଉପଯୋଗୀ ଅଟେ ।
ଏହା ମଧ୍ୟ ପଢନ୍ତୁ: ବ୍ୟାୟାମ ଦ୍ବାରା ମହିଳାଙ୍କ କ୍ଷେତ୍ରରେ ପାର୍କିନ୍ସନ ବିପଦ 25 ପ୍ରତିଶତ କମିପାରେ: ରିପୋର୍ଟ
ଅଧ୍ୟୟନରେ ବୟସ ସମ୍ବନ୍ଧୀୟ ସ୍ମୃତି କ୍ଷୟକୁ ଡେଣ୍ଟେଟ୍ ଗାଇରସରେ ପରିବର୍ତ୍ତନ ସହିତ ଯୋଡିବା ଉପରେ ଧ୍ୟାନ ଦିଆଯାଇଥିଲା । ମସ୍ତିଷ୍କର ହିପୋକାମ୍ପସ୍ ମଧ୍ୟରେ ଏକ ନିର୍ଦ୍ଦିଷ୍ଟ କ୍ଷେତ୍ର ରହିଛି, ଯାହା କି ମସ୍ତିଷ୍କର ସ୍ମୃତିଶକ୍ତି ଉପରେ କାର୍ଯ୍ୟ କରିଥାଏ, ପ୍ଲାଭୋନୋଲ ଦ୍ବାରା ଏଥିରେ ଉନ୍ନତି ଆସିଥିବା ଦେଖାଦେଇଛି । ଏହା ପୂର୍ବରୁ ମୂଷାମାନଙ୍କୁ ନେଇ ମଧ୍ୟ ଏକ ପରୀକ୍ଷା କରାଯାଇଥିଲା । ଏଥରୁ ଜଣାପଡିଥିଲା ଯେ, ଫ୍ଲାଭାନୋଲରେ ଏପିକାଟେସିନ୍ ନାମକ ଏକ ପଦାର୍ଥ ରହିଛି ଯାହାକି ନ୍ୟୁରନ୍, ରକ୍ତକଣିକା ଏବଂ ସ୍ମରଣ ଶକ୍ତି ବୃଦ୍ଧି କରିବାରେ ସହାୟକ ହୋଇଥାଏ ।
ନୂତନ ଅଧ୍ୟୟନରେ, 3500ରୁ ଅଧିକ ସୁସ୍ଥ ବୟସ୍କ ବୟସ୍କଙ୍କୁ ତିନି ବର୍ଷ ପାଇଁ ଦୈନିକ ଫ୍ଲାଭାନୋଲ୍ ସପ୍ଲିମେଣ୍ଟ (ବଟିକା) ଖାଇବାକୁ ଦିଆଯାଇଥିଲା । ସପ୍ଲିମେଣ୍ଟରେ 500 ମିଲିଗ୍ରାମ ଫ୍ଲାଭାନୋଲ ରହିଥିଲା, ଯେଉଁଥିରେ 80 ମିଗ୍ରା ଏପିକାଟେଚିନ୍ ଅନ୍ତର୍ଭୁକ୍ତ, ଯାହା ପରିଣତ ବୟସ୍କଙ୍କୁ ଖାଇବା ପାଇଁ ମଧ୍ୟ ପରାମର୍ଶ ଦିଆଯାଇଛି ।
ହିପୋକାମ୍ପସ୍ ଦ୍ୱାରା ପରିଚାଳିତ ସ୍ୱଳ୍ପ ମିଆଦି ସ୍ମୃତିର ପ୍ରକାରର ମୂଲ୍ୟାଙ୍କନ କରିବାକୁ ଅଂଶଗ୍ରହଣକାରୀମାନେ ନିଜ ନିଜ ଘରେ ୱେବ୍-ଆଧାରିତ କାର୍ଯ୍ୟକଳାପର ଏକ ଶୃଙ୍ଖଳା ପ୍ରଦର୍ଶନ କରିଥିଲେ । ତିନି ବର୍ଷ ପରେ ପରୀକ୍ଷା ତଥ୍ୟ ପ୍ରକାଶ କରାଯାଇଥିଲା । ପ୍ରଚୁର ଫ୍ଲାଭାନୋଲ ସହିତ ଏକ ସୁସ୍ଥ ଖାଦ୍ୟ ଖାଉଥିବା ଲୋକଙ୍କ କ୍ଷେତ୍ରରେ ସ୍ମୃତି ଶକ୍ତିରେ ଉନ୍ନତି ଆସିଥିଲା । କିନ୍ତୁ ଅଂଶଗ୍ରହଣକାରୀମାନେ ଯେଉଁମାନେ ଏକ ଖରାପ ଖାଦ୍ୟ ଖାଉଥିବାର ରିପୋର୍ଟ କରିଥିଲେ ଏବଂ ଫ୍ଲାଭାନୋଲର ବେସ୍ ଲାଇନ୍ ସ୍ତର କମ ଥିଲା, ସେମାନଙ୍କ ସ୍ମୃତି ସ୍କୋର ହାରାହାରି 10.5 ପ୍ରତିଶତ କମିଯାଇଥିଲା । ଫ୍ଲାଭାନୋଲ ଯୁକ୍ତ ଖାଦ୍ୟ ଖାଉଥିବା ଲୋକଙ୍କ କ୍ଷତ୍ରରେ ସ୍ମୃତି ଶକ୍ତି ସାମାନ୍ୟ ବୃଦ୍ଧି ହୋଇଥିଲା। ତେବେ ପରୀକ୍ଷଣ ବା ଅଧ୍ୟୟନରୁ ଏହା ଜଣାପଡିଥିଲା ଯେ, ଫ୍ଲାଭାନୋଲର ଅଭାବ ବୟସ ସମ୍ବନ୍ଧୀୟ ସ୍ମୃତି ଶକ୍ତି ହ୍ରାସର କାରଣ ହୋଇପାରେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
