ହାଇଦ୍ରାବାଦ: କୋରୋନା ମହାମାରୀ ପରେ ବୃଦ୍ଧି ପାଇଛି ହୃଦଘାତର ଆଶଙ୍କା । ଯଦି ଦୁଇ ବର୍ଷର ତଥ୍ୟକୁ ଦେଖାଯାଏ, ତାହେଲେ ଜଣା ପଡିଛି ଯେ ସର୍ବଭାରତୀୟ ସ୍ତରରେ ହଠାତ୍ ହୃଦଘାତ ମାମଲାରେ ବୃଦ୍ଧି ଦେଖାଯାଇଛି । ଚିନ୍ତାଜନକ ବିଷୟ ହେଉଛି ଏଥିରେ ରହିଥିବା ଅଧିକାଂଶ ପୀଡିତ ବ୍ୟକ୍ତି ହେଉଛନ୍ତି 25-44 ବର୍ଷ ବୟସର । ତେବେ ପାର୍ଟିରେ ନାଚିବା କିମ୍ବା କାମ କରିବା ସମୟରେ ହଠାତ୍ ହୃଦଘାତର ଅନେକ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି । ତେବେ ଏହା ପଛର ପ୍ରକୃତ କାରଣ କଣ ? ଅନୁସନ୍ଧାନକାରୀମାନେ ଏକ ଅଧ୍ୟୟନରେ ବଡ ଖୁଲାସା କରିଛନ୍ତି ।
ଇଣ୍ଡିଆନ୍ କାଉନସିଲ୍ ଅଫ୍ ମେଡିକାଲ୍ ରିସର୍ଚ୍ଚ (ଆଇସିଏମ୍ଆର୍)ର ବିଶେଷଜ୍ଞମାନେ ନିକଟରେ ହୋଇଥିବା ଏକ ଅଧ୍ୟୟନରେ କହିଛନ୍ତି ଯେ, କୋଭିଡ-19 ପରେ ହଠାତ୍ ହୃଦଘାତର ଘଟଣା ଦ୍ରୁତ ଗତିରେ ବୃଦ୍ଧି ପାଇଛି । ସଂକ୍ରମଣର ପାର୍ଶ୍ୱ ପ୍ରତିକ୍ରିୟା ଯୋଗୁଁ ଯୁବକମାନେ ମଧ୍ୟ ଏହାର ଶିକାର ହୋଇଛନ୍ତି । ଏହାର ବିପଦ କୋଭିଡର ପୀଡିତ କିମ୍ବା ଯେଉଁମାନେ ସଂକ୍ରମଣର ଶିକାର ହୋଇନାହାନ୍ତି ସେମାନଙ୍କ ଠାରେ ମଧ୍ୟ ଦେଖାଯାଉଛି ।
କୋରୋନା ହୃଦୟ-ଫୁସଫୁସକୁ ପ୍ରଭାବିତ କରିଛି: ଅନୁସନ୍ଧାନକାରୀମାନେ ହୃଦଘାତର କାରଣ ଜାଣିବା ପାଇଁ ହୃଦଘାତରେ ମୃତ୍ୟୁବରଣ କରିଥିବା 100ରୁ ଅଧିକ ଲୋକଙ୍କୁ ନେଇ ଅନୁସନ୍ଧାନ କରିଥିଲେ । ତେବେ ହୃଦଘାତର ଶିକାର ହୋଇଥିବା ଅଧିକାଂଶ ଲୋକ ମହାମାରୀ ସମୟରେ ସଂକ୍ରମଣର ଶିକାର ହୋଇଥିବା ଜଣାପଡିଥିଲା । ମୃତ ଶରୀରର ଏମଆରଆଇ ପରୀକ୍ଷା କୋରୋନା କାରଣରୁ ହୃଦୟ-ଫୁସଫୁସ ସମସ୍ୟା ଦେଖାଦେଇଥିବା ଜଣାପଡିଥିଲା । ପୂର୍ବ ଅଧ୍ୟୟନରେ ଏହା ମଧ୍ୟ ସ୍ପଷ୍ଟ କରାଯାଇଥିଲା ଯେ କୋରୋନା ଭୂତାଣୁ ହାର୍ଟ ସମସ୍ୟା ବୃଦ୍ଧିର ପ୍ରଥମ କାରଣ ।
ହାର୍ଟ ଉପରେ କୋରୋନାର ପ୍ରଭାବ: ଡିସେମ୍ବର 2022ରେ କରାଯାଇଥିବା ଏକ ଅନୁସନ୍ଧାନରେ ବୈଜ୍ଞାନିକମାନେ ଏକ ରିପୋର୍ଟରେ କହିଛନ୍ତି, କୋରୋନା ଉଭୟ ହୃଦୟ ଏବଂ ଫୁସଫୁସକୁ କ୍ଷତି ପହଞ୍ଚାଏ । ଏହି ଭୂତାଣୁ ସାଧାରଣତଃ ଫୁସଫୁସକୁ ପ୍ରଭାବିତ କରିଥାଏ କିନ୍ତୁ ଏହା ହୃଦଘାତର ଗୁରୁତର ସମସ୍ୟା ମଧ୍ୟ ସୃଷ୍ଟି କରିପାରେ । କୋରୋନା ଭାଇରସ ଦ୍ବାରା ଫୁସଫୁସର କ୍ଷତି ହେତୁ ଅମ୍ଳଜାନ ପର୍ଯ୍ୟାପ୍ତ ପରିମାଣରେ ହୃଦୟ ମାଂସପେଶୀରେ ପହଞ୍ଚେ ନାହିଁ, ଯାହା ପରବର୍ତ୍ତୀ ସମୟରେ ହୃତପିଣ୍ଡକୁ ନଷ୍ଟ କରିଥାଏ । ଏହା ବ୍ୟତୀତ ଧମନୀରେ କୋରୋନାର ପାର୍ଶ୍ୱ ପ୍ରତିକ୍ରିୟା ବିଷୟରେ ମଧ୍ୟ ଏକ ସତର୍କ ସୂଚନା ଦିଆଯାଇଥିଲା, ଯାହା ସିଧାସଳଖ ହୃଦଘାତର କାରଣ ଅଟେ ବୋଲି ଜଣାପଡିଥିଲା ।
ଆହୁରି ମଧ୍ୟ କୁହାଯାଇଛି ଯେ, କୋରୋନା ଭାଇରସ ଲୋକଙ୍କୁ ଗୁରୁତର ଭାବରେ ସଂକ୍ରମିତ କରିଥିଲା, ଏହି କାରଣରୁ ଥକ୍କା-ଦୁର୍ବଳତା ହେତୁ ଲୋକଙ୍କ ମଧ୍ୟରେ ଶାରୀରିକ ନିଷ୍କ୍ରିୟତା ବୃଦ୍ଧି ପାଇଲା ଏବଂ ଖାଦ୍ୟ ଅଭ୍ୟାସରେ ବ୍ୟାଘାତ ମଧ୍ୟ ଦେଖାଗଲା, ଯାହାଫଳରେ ହୃଦଘାତର ଆଶଙ୍କା ବୃଦ୍ଧି ପାଇଥିଲା ।
ଏହା ବ୍ୟତୀତ, ଯେଉଁମାନେ ସଂକ୍ରମଣରୁ ସୁରକ୍ଷିତ ଥିଲେ, ତଥାପି ସେମାନେ ହୃଦଘାତର ଶିକାର ହୋଇଥିଲେ। ଏହାର ମୁଖ୍ୟ କାରଣ ଦୀର୍ଘ ସମୟ ଧରି ବସି ରହିବା ଏବଂ ସେହି ଅନୁଯାୟୀ ବ୍ୟାୟାମ କିମ୍ବା ଶାରୀରିକ ନିଷ୍କ୍ରିୟତା ହ୍ରାସ ପାଇଥିଲା। ଲକଡାଉନ୍ ଅବସ୍ଥାରେ ବ୍ୟାୟାମ କିମ୍ବା ଶାରୀରିକ ପରିଶ୍ରମର ଅଭାବ ଦେଖାଗଲା ଯାହା ଲୋକଙ୍କ ସ୍ୱାସ୍ଥ୍ୟ ଉପରେ ପ୍ରଭାବ ପକାଇଲା ।
ଟୀକାକରଣ ସହ ହୃଦଘାତର ସମ୍ପର୍କ: କେତେକ ରିପୋର୍ଟରେ କୁହାଯାଇଛି, କୋଭିଡ ଟୀକାକରଣର ପାର୍ଶ୍ୱ ପ୍ରତିକ୍ରିୟା ମଧ୍ୟ ହୃଦଘାତର ଆଶଙ୍କା ବଢାଇ ଦେଇଛି । ଯଦିଓ ଏହାର ସମ୍ପର୍କ ଆଇସିଏମଆର ଅନୁସନ୍ଧାନରେ ମିଳିନାହିଁ । ଅନୁସନ୍ଧାନକାରୀମାନେ କହିଛନ୍ତି ଯେ, ପୂର୍ବ ଅଧ୍ୟୟନ ଗୁଡ଼ିକ ମଧ୍ୟ ହୃଦଘାତ ସହ କୋରୋନାର ପାର୍ଶ୍ୱ ପ୍ରତିକ୍ରିୟାକୁ ନିଶ୍ଚିତ କରିଛି, ଯଦିଓ ଟୀକାକରଣ ହେତୁ ଏହା ବୃଦ୍ଧି ପାଇଛି ବୋଲି କୁହାଯାଇପାରିବ ନାହିଁ ।
ବ୍ୟୁରୋ ରିପୋର୍ଟ, ଇଟିଭି ଭାରତ
