ହାଇଦ୍ରାବାଦ: ଆଜିକାଲି ପିଠି ଯନ୍ତ୍ରଣା, କାନ୍ଧରେ ଯନ୍ତ୍ରଣା, ହାତ-ପାଦରେ ଯନ୍ତ୍ରଣା ଏବଂ ଶରୀରରେ କଠିନତା ଭଳି ସମସ୍ୟା ପ୍ରତ୍ୟେକ ବର୍ଗର ଲୋକଙ୍କ କ୍ଷେତ୍ରରେ ଦେଖାଯାଉଛି । ଏହାକୁ ମାଂସପେଶୀ ସମସ୍ୟା କୁହାଯାଏ । ମାତ୍ର ପୂର୍ବରୁ ଏହି ରୋଗ କେବଳ ବୃଦ୍ଧମାନଙ୍କ କ୍ଷେତ୍ରରେ ଦେଖାଯାଉଥିଲା । ବର୍ତ୍ତମାନ ପ୍ରତ୍ୟେକ ବର୍ଗର ଲୋକଙ୍କ କ୍ଷେତ୍ରରେ ଏପରି ସମସ୍ୟା ଦେଖାଯିବାର ମୁଖ୍ୟ କାରଣ ଜୀବନଶୈଳୀରେ ପରିବର୍ତ୍ତନ । ଅର୍ଥୋପେଡିକ୍ ବିଶେଷଜ୍ଞ ଏବଂ ଫିଜିଓଥେରାପିଷ୍ଟମାନେ କହନ୍ତି ଯେ, କେବଳ ରୋଗ କିମ୍ବା କୌଣସି ସ୍ବାସ୍ଥ୍ୟ ସମସ୍ୟା କାରଣରୁ ନୁହେଁ ବରଂ ଅଳସୁଆ, ଜୀବନଶୈଳୀ କାରଣରୁ ଏପରି ସମସ୍ୟା ଦେଖାଯାଉଛି ।
ବର୍ତ୍ତମାନର ସମୟ ଦ୍ରୁତଗତିରେ ପରିବର୍ତ୍ତିତ ହେଉଛି ବୋଲି କୁହାଯାଉଛି । ହେଲେ ଏହାର ଅର୍ଥ ନୁହେଁ ଆମ ଜୀବନଶୈଳୀ ଦ୍ରୁତ ହୋଇଯାଇଛି, କହିବାକୁ ଗଲେ ବାସ୍ତବରେ ଆମ ଜୀବନର ଶୈଳୀ ବଞ୍ଚିବାର ମାଧ୍ୟମ ଧୀର ହୋଇଯାଇଛି । ଅର୍ଥାତ୍ ଟେକ୍ନୋଲୋଜିର ଉଦ୍ଭାବନ, କମ୍ପୁଟରରେ କାର୍ଯ୍ୟ ସମସ୍ତ କାର୍ଯ୍ୟକୁ ସହଜ-ସୁଗମ କରିଦେଇଛି ସତ ହେଲେ ଆମ ମାନବକୁ ଧୀର କରିଦେଇଛି । ଏସବୁ ବ୍ୟବହାର ଫଳରେ ଆମର ଶାରୀରିକ ପରିଶ୍ରମ ହ୍ରାସ ପାଇଛି । ଫଳରେ ନାନା ରୋଗ ସୃଷ୍ଟି ହୋଇଛି । ଏସବୁ ମଧ୍ୟରୁ ମାଂସପେଶୀ ଯନ୍ତ୍ରଣା ଅନ୍ୟତମ ।
ଏହାର କାରଣ କଣ ?
ଇନ୍ଦୋର କେୟାର ସେଣ୍ଟରର ଫିଜିଓଥେରାପିଷ୍ଟ ଡକ୍ଟର ସନ୍ଧ୍ୟା ନାବାନି କହନ୍ତି ଯେ, ଆଜିକାଲି ସବୁ ବୟସର ଲୋକଙ୍କଠାରେ ମାଂସପେଶୀ ଯନ୍ତ୍ରଣା ଏବଂ କଠିନତା ଭଳି ସମସ୍ୟା ଦେଖାଯାଉଛି । ଏହି ସମସ୍ୟା ଅଧିକାଂଶ ଲୋକଙ୍କୁ ସକାଳ ସମୟରେ ଅଧିକ କଷ୍ଟ ଦେଇଥାଏ । ଏପରି ପରିସ୍ଥିତିରେ, ଯେତେବେଳେ ଜଣେ ବ୍ୟକ୍ତି ସକାଳେ ଉଠେ, ସେତେବେଳେ ତାଙ୍କ କାନ୍ଧ, ଅଣ୍ଟା, ବେକ କିମ୍ବା ଗୋଡର ମାଂସପେଶୀରେ ବହୁତ କଠିନତା କିମ୍ବା ଯନ୍ତ୍ରଣା ହୁଏ । ଏପରିକି ବେଳେବେଳେ ସମସ୍ୟା ଏତେ ଗମ୍ଭୀର ହୋଇଯାଏ ଯେ, ସକାଳୁ ଶଯ୍ୟାତ୍ୟାଗ କରିବା କିମ୍ବା ନିତ୍ୟକର୍ମ କରିବା କଷ୍ଟକର ହୋଇପଡେ ।
ସେ କହିଛନ୍ତି ଯେ, ସବୁଠୁ ବଡ କଥା ହେଉଛି ଏପରି ସମସ୍ୟା କୌଣସି ଆଘାତ କିମ୍ବା ଦୁର୍ଘଟଣା କାରଣରୁ ହୋଇନଥାଏ । ଆଜିକାଲି ବିନା କାରଣରୁ ସମସ୍ତ ବର୍ଗର ବ୍ୟକ୍ତିଙ୍କଠାରେ ଏପରି ସମସ୍ୟା ଦେଖାଯାଉଛି । ବିଶେଷକରି ମେଟ୍ରୋ ସହରରେ ରହୁଥିବା ଲୋକଙ୍କ ଠାରେ ଏହି ସମସ୍ୟା ବହୁତ ଅଧିକ । ଡକ୍ଟର ସନ୍ଧ୍ୟା କହିଛନ୍ତି ଯେ ସାଧାରଣ ଲୋକଙ୍କ କ୍ଷେତ୍ରରେ ଏହିପରି ସମସ୍ୟା ବୃଦ୍ଧି ପାଇଁ ଖରାପ ଜୀବନଶୈଳୀ ବହୁ ପରିମାଣରେ ଦାୟୀ ହୋଇପାରେ । ଆଜିର ସମୟରେ, ଅଧିକାଂଶ ଲୋକ କାମ କିମ୍ବା ଅନ୍ୟାନ୍ୟ କାରଣରୁ ବିଳମ୍ବରେ ଶୋଇଥା'ନ୍ତି । ଶୋଇବା ଏବଂ ଖାଇବାରେ ମଧ୍ୟ ଅବହେଳା କରନ୍ତି । ଏହି କାରଣରୁ କ୍ୟାଲସିୟମ, ଭିଟାମିନ୍-ଡି ଏବଂ ଅନ୍ୟାନ୍ୟ ଜରୁରୀ ପୋଷକ ତତ୍ତ୍ୱର ଅଭାବ ଅନେକ ଲୋକଙ୍କ ଠାରେ ଦେଖାଯାଏ ।
ଏହା ବ୍ୟତୀତ, ଯେତେବେଳେ ଅନେକ ଲୋକ ଚାକିରି, ଅଧ୍ୟୟନ କିମ୍ବା ଅନ୍ୟାନ୍ୟ କାର୍ଯ୍ୟ ହେତୁ ଦୀର୍ଘ ସମୟ ଧରି ଛିଡା ହୋଇ କାମ କରନ୍ତି କିମ୍ବା ମୋବାଇଲ୍, ଲାପଟପ୍, କମ୍ପ୍ୟୁଟରରେ କାମ କରିବା କାରଣରୁ ମାଂସପେଶୀରେ ଯନ୍ତ୍ରଣା ହୁଏ । ବିଶେଷକରି ସକାଳେ ଉଠିବା ପରେ ଯେତେବେଳେ ଶୋଇବା ସମୟରେ ଶରୀର ଆବଶ୍ୟକ ପରିମାଣର ବିଶ୍ରାମ ନ ପାଏ, ଯନ୍ତ୍ରଣା, କଠିନତା କିମ୍ବା ମାଂସପେଶୀରେ ସମସ୍ୟା ଅଧିକ ଅନୁଭବ ହୁଏ ।
ଜୀବନଶୈଳୀ ସଂଶୋଧନ ଆବଶ୍ୟକ
ଡ. ସନ୍ଧ୍ୟା ପରାମର୍ଶ ଦିଅନ୍ତି ଯେ, ଏହାକୁ ଏଡାଇବା ପାଇଁ ବ୍ୟାୟାମ ନିହାତି ଆବଶ୍ୟକ । ବର୍ତ୍ତମାନର ଜୀବନଶୈଳୀକୁ ଦୃଷ୍ଟିରେ ରଖିଲେ ଲୋକଙ୍କ ନିତ୍ୟକର୍ମକୁ ସମ୍ପୂର୍ଣ୍ଣ ରୂପେ ବଦଳାଇବା ସମ୍ଭବ ନୁହେଁ, କିନ୍ତୁ କିଛି ଅଭ୍ୟାସ ଗ୍ରହଣ କରି ଦିନକୁ ବ୍ୟାୟାମରୁ ଆରମ୍ଭ କରି ସକାଳର ଶରୀରରେ ଯନ୍ତ୍ରଣା ଏବଂ କଠିନତା କିଛି ପରିମାଣରେ ହ୍ରାସ ହୋଇପାରିବ । ଏହି ଅଭ୍ୟାସଗୁଡ଼ିକ ମଧ୍ୟରୁ କେତେକ ନିମ୍ନରେ ଦିଆଯାଇଛି...
ପ୍ରତିଦିନ ସକାଳେ ଉଠିବା ପରେ ଏକ ଗ୍ଲାସ୍ ପାଣି ପିଅନ୍ତୁ ଏବଂ ଦିନସାରା ଆବଶ୍ୟକ ପରିମାଣର ପାଣି ପିଅନ୍ତୁ ।
ଖାଦ୍ୟରୁ ପୂର୍ବ ଯୋଜନା କରନ୍ତୁ, ଯାହାଦ୍ୱାରା ଠିକ୍ ସମୟରେ ପୁଷ୍ଟିକର ଖାଦ୍ୟ ଗ୍ରହଣ କରିପାରିବେ । ଫଳ, ପନିପରିବା ଏବଂ ଡାଲି ସହ ଖାଦ୍ୟରେ ଡ୍ରାଏ ଫ୍ରୁଟ୍ସ, ସିଡ୍ସ ଭଳି ଶକ୍ତି(ଏନର୍ଜି) ଯୋଗାଉଥିବା ଖାଦ୍ୟ ଖାଆନ୍ତୁ ।
ଯଦି ସକାଳୁ ଉଠିବା ସମୟରେ ମାଂସପେଶୀରେ ଅସ୍ୱାଭାବିକତା ଦେଖାଯାଏ, ଅଣ୍ଟା ଉପରେ ସିଧା ବସିବା ପରିବର୍ତ୍ତେ କିଛି ସମୟ ପାଇଁ ବିଛଣାରେ ରୁହନ୍ତୁ, ତା'ପରେ ହାତ ଏବଂ ପାଦର ସାମାନ୍ୟ ବ୍ୟାୟାମ କରିବା ପରେ ଶଯ୍ୟାତ୍ୟାଗ କରନ୍ତୁ । ଏହା ଦ୍ୱାରା ମାଂସପେଶୀ ଆଘାତ କିମ୍ବା ଷ୍ଟ୍ରେନ୍ ହେବାର ଆଶଙ୍କା କମିଯାଏ ।
ଯଦି ବସି ରହିବା କିମ୍ବା ଛିଡା ହୋଇ କାର୍ଯ୍ୟ କରୁଛନ୍ତି ତେବେ କିଛି ସମୟର ବିରତି ନିଅନ୍ତୁ ।
କାର୍ଯ୍ୟ ସମୟରେ ମଧ୍ୟ, ଯଦି ଶରୀରରେ କଠିନତା ଅନୁଭବ କରୁଛନ୍ତି, ତେବେ ଷ୍ଟ୍ରେଚିଂ ବ୍ୟାୟାମ କରିପାରିବେ ।
ଚାଲିବା, ଠିଆ ହେବା କିମ୍ବା ବସିବା ସମୟରେ ସ୍ଥିତିର ଯତ୍ନ ନିଅନ୍ତୁ ।
ମୋବାଇଲ୍ କିମ୍ବା ଲାପଟପ୍ରେ କାମ କରିବାବେଳେ ଆଖି ଠାରୁ ଦୂରତା ବଜାୟ ରଖନ୍ତୁ ।
ପ୍ରତିଦିନ ଅତି କମରେ 20 ରୁ 30 ମିନିଟ୍ ବ୍ୟାୟାମ କିମ୍ବା ଷ୍ଟ୍ରେଚ୍ କରିବା ଆବଶ୍ୟକ ।
ଯଦି ବହୁତ ବ୍ୟସ୍ତ ରୁଟିନ୍ ଅଛି, ତେବେ ବ୍ୟାୟାମ କରିବା ଅଧିକ ଗୁରୁତ୍ୱପୂର୍ଣ୍ଣ ହୋଇଯାଏ କାରଣ ଏହା ମାଂସପେଶୀକୁ ସକ୍ରିୟ, ନମନୀୟ କରିଥାଏ ଏବଂ ଶରୀରକୁ ଶକ୍ତି ମଧ୍ୟ ଦେଇଥାଏ ।
ଯେକୌଣସି ପ୍ରକାର ବ୍ୟାୟାମ ଟ୍ରେନର୍ ବା ପ୍ରଶିକ୍ଷକଙ୍କ ନିର୍ଦ୍ଦେଶରେ କରନ୍ତୁ ।
ସବୁଠୁ ଗୁରୁତ୍ବପୂର୍ଣ୍ଣ ହେଉଛି ନିଦ, ପର୍ଯ୍ୟାପ୍ତ ଶୋଇବାକୁ ଚେଷ୍ଟା କରନ୍ତୁ ।
ଡକ୍ଟର ସନ୍ଧ୍ୟା କହିଛନ୍ତି ଯେ ଯଦି ସକାଳେ ଉଠିବା ପରେ କିମ୍ବା ଦିନସାରା ସାଧାରଣ ଅବସ୍ଥାରେ ଯନ୍ତ୍ରଣା, କଠିନତା କିମ୍ବା ମାଂସପେଶୀ, ଗଣ୍ଠି କିମ୍ବା ହାଡରେ ଅସ୍ୱାଭାବିକତା ଅଧିକ ଅନୁଭବ ହୁଏ, ତେବେ ଏହାକୁ ଅଣଦେଖା କରିବା ପରିବର୍ତ୍ତେ ଡାକ୍ତରଙ୍କ ସହିତ ପରାମର୍ଶ କରନ୍ତୁ ।
