ହାଇଦ୍ରାବାଦ: ମଦ୍ୟପାନ ଶରୀର ପକ୍ଷେ କ୍ଷତିକାରକ । ଏହି ବିଷୟକୁ ଜନସାଧାରଣଙ୍କ ମଧ୍ୟରେ ଅବଗତ କରିବା ପାଇଁ ଅନେକ କାର୍ଯ୍ୟକ୍ରମ କରାଯାଉଛି । ତଥାପି ଆଜି ବି ସମାଜ ଉପରେ ଏହାର ଏତେଟା ପ୍ରଭାବ ପଡୁନଥିବା ଦେଖିବାକୁ ମିଳିଛି । କହିବାକୁ ଗଲେ ମଦ୍ୟପାନ ଆଜିକା ସମୟରେ ଏକ ପ୍ରକାର ଟ୍ରେଣ୍ଡ ପାଲଟିଛି । ପିଲାଠୁ ବୁଢା ସମସ୍ତେ ମଦ୍ୟପାନ କରୁଛନ୍ତି । ତେବେ ଏନେଇ ଏକ ଚିନ୍ତାଜନକ ରିପୋର୍ଟ ପ୍ରକାଶ ପାଇଛି । ଦୈନିକ ମଦ୍ୟପାନ ଦ୍ବାରା ରକ୍ତଚାପ ବଢେ ବୋଲି କୁହାଯାଇଛି ।
ଆମେରିକୀୟ ହାର୍ଟ ଆସୋସିଏସନ ଜର୍ଣ୍ଣାଲ ହାଇପରଟେନ୍ସରେ ପ୍ରକାଶିତ ରିପୋର୍ଟ ଅନୁଯାୟୀ, ପ୍ରତିଦିନ ମଦ୍ୟପାନ କରୁଥିବା ବ୍ୟକ୍ତି ଉଚ୍ଚ ରକ୍ତଚାପର ଶିକାର ହୋଇପାରନ୍ତି । ଅନୁସନ୍ଧାନରୁ ଜଣାପଡିଛି ଯେ, ବୟସ୍କମାନଙ୍କ କ୍ଷେତ୍ରରେ ମଧ୍ୟ ଦୈନିକ ମଦ୍ୟପାନ ଦ୍ୱାରା ରକ୍ତଚାପ ବଢିପାରେ ବୋଲି କୁହାଯାଇଛି ।
ମଦ୍ୟପାନ କରୁଥିବା ଲୋକଙ୍କୁ ନେଇ ଏହି ରିସର୍ଚ୍ଚ କରାଯାଇଥିଲା । ଯେଉଁମାନେ ଦୈନିକ କମରୁ ମଧ୍ୟମ ଧରଣର ମଦ୍ୟପାନ କରୁଥିଲେ ସେମାନଙ୍କ ନିକଟରେ ମଧ୍ୟ ଉଚ୍ଚ ରକ୍ତଚାପ ପରିଲକ୍ଷିତ ହୋଇଥିଲା । ମଦ୍ୟପାନର ନିମ୍ନ ସ୍ତର ମଧ୍ୟ ଉଚ୍ଚ ରକ୍ତଚାପ ଏବଂ ହୃଦ୍ରୋଗର ଆଶଙ୍କା ସୃଷ୍ଟି କରିପାରେ । ଇଟାଲୀର ମୋଡେନା ଏବଂ ରେଜିଓ ଏମିଲିଆ ବିଶ୍ୱବିଦ୍ୟାଳୟର ମେଡିକାଲ୍ ସ୍କୁଲର ଏପିଡେମୋଲୋଜି ଏବଂ ଜନସ୍ୱାସ୍ଥ୍ୟ ବିଭାଗର ପ୍ରଫେସର ମାର୍କୋ ଭିନ୍ସେଟି କହିଛନ୍ତି ଯେ, "ଯେଉଁମାନେ ଦୈନିକ ମଦ୍ୟପାନ କରନ୍ତି, ସେମାନଙ୍କ ନିକଟରେ ଆମେ କୌଣସି ଲାଭଦାୟକ ପ୍ରଭାବ ପାଇଲୁ ନାହିଁ ।"
ଭିନ୍ସେଟି ଆହୁରି ମଧ୍ୟ କହିଛନ୍ତି ଯେ,"ଯେଉଁମାନ କମ ମଦ ପିଉଥିଲେ ସେମାନଙ୍କ ନିକଟରେ ମଧ୍ୟ ରକ୍ତଚାପରେ ପରିବର୍ତ୍ତନ ହେଉଥିବା ଦେଖାଯାଉଥିଲା । ଯାହାକି ଆମକୁ ଆଶ୍ଚର୍ଯ୍ୟ କରିଥିଲା । ଏହା ପୂର୍ବରୁ ବିଶ୍ୱ ସ୍ୱାସ୍ଥ୍ୟ ସଂଗଠନ (WHO) ମଧ୍ୟ ଚେତାବନୀ ଦେଇଛି ଯେ, ମଦର କୌଣସି ସୁରକ୍ଷିତ ମାତ୍ରା ବା ପରିମାଣ ନାହିଁ ଯାହା ସ୍ୱାସ୍ଥ୍ୟ ଉପରେ ପ୍ରଭାବ ପକାଇବ ନାହିଁ ।
ରୋଗ ପରିଚାଳନା ପାଇଁ କାର୍ଯ୍ୟନିର୍ବାହୀ ୟୁନିଟ୍ ଲିଡ୍ ତଥା ମଦ୍ୟପାନ ପାଇଁ ଆଞ୍ଚଳିକ ପରାମର୍ଶଦାତା ଡାକ୍ତର କାରିନା ଫେରେରା ବୋର୍ଗସ୍ କହିଛନ୍ତି, "ତଥାକଥିତ ସୁରକ୍ଷିତ ସ୍ତରର ମଦ୍ୟପାନ ବିଷୟରେ ଆମେ ଆଲୋଚନା କରିପାରିବୁ ନାହିଁ । ଜଣେ କେତେ ମଦ ପିଇଛି ସେଥିରେ କିଛି ଫରକ ପଡ଼ିବ ନାହିଁ । ପାନକାରୀଙ୍କ ସ୍ୱାସ୍ଥ୍ୟ ପ୍ରତି ବିପଦ ପ୍ରଥମ ଡ୍ରପରୁ ଆରମ୍ଭ ହୁଏ । ଆମେ ଏହା ବିଷୟରେ କେବଳ କହିପାରିବା ଯେ ଏହା ନିଶ୍ଚିତ ଯେ ଆପଣ ଯେତେ ଅଧିକ ପିଇବେ, ସେତେ ଅଧିକ କ୍ଷତିକାରକ କିମ୍ବା ଅନ୍ୟ ଅର୍ଥରେ ଆପଣ ଯେତେ କମ୍ ପିଇବେ, ସେତେ ନିରାପଦ ଅଟେ ।"
ଅନୁସନ୍ଧାନକାରୀମାନେ 1997ରୁ 2021 ମଧ୍ୟରେ 19,548 ବୟସ୍କଙ୍କ ସହିତ ଜଡିତ ସାତୋଟି ଅଧ୍ୟୟନରେ ସମସ୍ତ ଅଂଶଗ୍ରହଣକାରୀଙ୍କ ସ୍ୱାସ୍ଥ୍ୟ ତଥ୍ୟ ସମୀକ୍ଷା କରିଥିଲେ । ଅନୁସନ୍ଧାନରୁ ଜଣାପଡିଛି ଯେ ଦିନକୁ ହାରାହାରି 12 ଗ୍ରାମ ମଦ୍ୟପାନ କରୁଥିବା ବ୍ୟକ୍ତିମାନଙ୍କର ରକ୍ତଚାପ ଅଧିକ ବୃଦ୍ଧି ପାଉଥିଲା । ସେମାନଙ୍କର ସର୍ବୋଚ୍ଚ ରକ୍ତଚାପ 1.25 mm Hg ବୃଦ୍ଧି କରିଥିବାବେଳେ 48 ଗ୍ରାମ ମଦ୍ୟପାନ କରୁଥିବା ବ୍ୟକ୍ତି 4.9 mm Hg ବୃଦ୍ଧି ପାଇଥିବା ଦେଖାଯାଇଥିଲା । ଯଦି କହିବା ମଦ୍ୟପାନ ନିଶ୍ଚିତ ଭାବରେ ରକ୍ତଚାପର ବୃଦ୍ଧିର ଏକମାତ୍ର କାରଣ ନୁହେଁ, ତଥାପି ଅନୁସନ୍ଧାନ ନିଶ୍ଚିତ କରେ ଯେ ଏହା ଏକ କାରଣ ହୋଇପାରେ, ତେଣୁ ମଦ୍ୟପାନକୁ ସୀମିତ ରଖିବା ପରାମର୍ଶ ଦିଆଯାଇଛି । ମଦ୍ୟପାନ ଠାରୁ ସର୍ବଦା ଦୂରେଇ ରହିବା ଉଚିତ ।
ଏହା ମଧ୍ୟ ପଢନ୍ତୁ: Alcohol Side Effects: ଅତ୍ୟଧିକ ମଦ୍ୟପାନ ଛୋଟ କରିପାରେ ମସ୍ତିଷ୍କର ଆକାର
ବ୍ୟୁରୋ ରିପୋର୍ଟ, ଇଟିଭି ଭାରତ
