ହାଇଦ୍ରାବାଦ: ବର୍ତ୍ତମାନ ସମୟରେ ଅମ୍ଳତା ବା ଏସିଡିଟି ଏକ ସାଧାରଣ ସମସ୍ୟା ହୋଇଗଲାଣି । ଅଧିକାଂଶ ଲୋକେ ଏହି ସମସ୍ୟାର ସମ୍ମୁଖୀନ ହେଉଛନ୍ତି । ଅନେକ ଲୋକ ଅଛନ୍ତି, ଯେଉଁମାନଙ୍କର ଏସିଡିଟି ହେବା ମାତ୍ରେ ଆଣ୍ଟାସିଡ୍ ଖାଇ ଦିଅନ୍ତି । ବିବାହ କିମ୍ବା କୌଣସି ଭୋଜି ଯିବା ପୂର୍ବରୁ ମଧ୍ୟ ଅନେକ ଲୋକ ଘରୁ ଆଣ୍ଟାସିଡ୍ ଖାଇକି ଯାଇଥାନ୍ତି । ଅଧିକାଂଶ ଲୋକ ଭାବନ୍ତି ଯେ, ଆଣ୍ଟାସିଡ୍ ଏକ ନିରାପଦ ଔଷଧ ଏବଂ ଏହାକୁ ଯେକୌଣସି ସମୟରେ ଗ୍ରହଣ କରାଯାଇପାରେ । ଆପଣ ଯଦି ଏପରି ଭାବୁଛନ୍ତି କିମ୍ବା ନିୟମିତ ଭାବେ ଆଣ୍ଟାସିଡ୍ ଗ୍ରହଣ କରୁଛନ୍ତି ତେବେ ସାବଧାନ ହୋଇଯାଆନ୍ତୁ ।
ଆଣ୍ଟାସିଡ୍ର ଅତ୍ୟଧିକ ଏବଂ ଅନାବଶ୍ୟକ ବ୍ୟବହାର କିଡନୀ ଫେଲ୍ ସହ କ୍ୟାନସର ଭଳି ଜଟିଳ ରୋଗ ସମସ୍ୟା କରିପାରେ । ବିଶ୍ବର ଅନେକ ଅନୁସନ୍ଧାନରେ ଏହା ଉଲ୍ଲେଖ କରାଯାଇଛି ଯେ, ଆଣ୍ଟାସିଡ୍ର ନିରନ୍ତର ବ୍ୟବହାର ହଜମ ପ୍ରକ୍ରିୟାକୁ କ୍ଷତି ପହଞ୍ଚାଇବା ସହିତ କିଡନୀ ଜନିତ ସମସ୍ୟା, ହୃଦ୍ରୋଗ, ଉଚ୍ଚ ରକ୍ତଚାପ, ଅନ୍ତଃନଳୀ ରୋଗ ଏବଂ ଅନ୍ତଃନଳୀ କର୍କଟ ମଧ୍ୟ ସୃଷ୍ଟି କରିପାରେ ।
ବାସ୍ତବରେ, ଆମ ଶରୀରର ଅଧିକାଂଶ ସମସ୍ୟା ଏବଂ ରୋଗ ହଜମ ପ୍ରକ୍ରିୟା ସହିତ ଜଡିତ । ସାଧାରଣତଃ, ଅନେକ କାରଣରୁ, ଯେତେବେଳେ ଖାଦ୍ୟ ହଜମ ପାଇଁ ଆବଶ୍ୟକ ହେଉଥିବା ଏସିଡ୍ ପେଟରେ ଅଧିକ ଉତ୍ପାଦନ ହୁଏ ଏବଂ ଯେତେବେଳେ ଗ୍ୟାସ୍ଟିକ୍ କିମ୍ବା ଅମ୍ଳତା ଭଳି ସମସ୍ୟା ଆରମ୍ଭ ହୁଏ, ଲୋକମାନେ ଆଣ୍ଟାସିଡ୍ ଖାଇ ଦିଅନ୍ତି । ଏହି ଔଷଧ ସମସ୍ୟା ଦୂର କରିଥାଏ ସତ, ହେଲେ ନିୟମିତ ବ୍ୟବହାର ସ୍ବାସ୍ଥ୍ୟକୁ ସାଙ୍ଘାତିକ କ୍ଷତି ପହଞ୍ଚାଏ ।
ଆଣ୍ଟାସିଡ୍ର ଅତ୍ୟଧିକ ବ୍ୟବହାର ହଜମ ହାରକୁ ମନ୍ଥର କରିଥାଏ, କାରଣ ଏହା ଖାଦ୍ୟ ହଜମ କରିବା ପାଇଁ ଆବଶ୍ୟକ ହେଉଥିବା ଏସିଡ୍ର ତୀବ୍ରତାକୁ ହ୍ରାସ କରିଥାଏ । ଏହା ସହ ଖାଦ୍ୟରୁ ପୋଷକ ତତ୍ତ୍ୱର ଅବଶୋଷଣ ପ୍ରକ୍ରିୟାକୁ ମଧ୍ୟ ପ୍ରଭାବିତ କରିଥାଏ । ଯେଉଁ କାରଣରୁ ଶରୀରରେ ବିଷାକ୍ତ ପଦାର୍ଥ ବୃଦ୍ଧି ପାଇବା ଆରମ୍ଭ କରେ ଏବଂ ଅତ୍ୟାବଶ୍ୟକ ପୁଷ୍ଟିକର ଖାଦ୍ୟ ମଧ୍ୟ ଶୋଷିତ ହୋଇପାରେ ନାହିଁ । ଯେତେବେଳେ ହଜମ ପ୍ରକ୍ରିୟା ସଠିକ୍ ହୋଇନଥାଏ, ସେତେବେଳେ ଡାଇରିଆ ଏବଂ କୋଷ୍ଠକାଠିନ୍ୟ ଭଳି ସମସ୍ୟା ହେବାର ଆଶଙ୍କା ବଢିଯାଏ । ଯେଉଁ କାରଣରୁ ଶରୀର କେବଳ ଶକ୍ତି ଅଭାବ ଅନୁଭବ କରେ ନାହିଁ, ବରଂ ଥକ୍କା, ବାନ୍ତି ଲାଗିବା ଭଳି ହେବା, ମୁଣ୍ଡ କାନ୍ଧ ଏବଂ ବାହୁରେ ଯନ୍ତ୍ରଣା ସହ ପରିସ୍ରା କରିବାରେ ମଧ୍ୟ ସମସ୍ୟା ଦେଖାଯାଏ ।
ଆଣ୍ଟାସିଡ୍ର ଅତ୍ୟଧିକ ବ୍ୟବହାର କିଡନୀ ନଷ୍ଟ କରିପାରେ । ବାସ୍ତବରେ, କେତେକ ଆଣ୍ଟାସିଡରେ ଯୌଗିକ ରହିଥାଏ ଯାହା କିଡନୀ ପାଇଁ କ୍ଷତିକାରକ ହୋଇପାରେ ଏବଂ ଯଦି ଦୀର୍ଘ ସମୟ ଧରି ଏହି ଔଷଧ ସେବନ କରାଯାଏ ତେବେ କିଡନୀ ଫେଲ୍ ହୋଇପାରେ । କିଛି ବର୍ଷ ପୂର୍ବେ ଏକ ବିଶ୍ବସ୍ତରୀୟ ଅଧ୍ୟୟନରେ ଉଲ୍ଲେଖ କରାଯାଇଥିଲା ଯେ "ଗ୍ୟାସ୍" ଏବଂ ହୃଦଘାତର ଚିକିତ୍ସା ପାଇଁ ପିପିଏ(ପ୍ରୋଟୋନ୍ ପମ୍ପ ଇନହେବିଟର୍ସ) ବର୍ଗ ଅନ୍ତର୍ଗତ ଆଣ୍ଟି-ଏସିଡିଟି ଔଷଧର ଦୀର୍ଘକାଳୀନ ବ୍ୟବହାର ଦ୍ୱାରା କିଡନୀ ନଷ୍ଟ ହୋଇପାରେ କିମ୍ବା ଅନ୍ୟାନ୍ୟ ଜଟିଳତା ହୋଇପାରେ । ନଚେତ୍ ଅଧିକ ଗୁରୁତର ସମସ୍ୟାର ସମ୍ଭାବନା, ଗ୍ୟାଷ୍ଟ୍ରିକ୍ କର୍କଟ, ଦୁର୍ବଳତା ଏବଂ ଅଷ୍ଟିଓପୋରୋସିସ୍ ଭଳି ସମସ୍ୟାର ଆଶଙ୍କା ଯଥେଷ୍ଟ ବୃଦ୍ଧି ପାଇଥାଏ । ପ୍ରକୃତରେ PPI ଔଷଧଗୁଡିକ ଅର୍ଥୋପେଡିକ୍ସ, କାର୍ଡିଓଲୋଜି, ଏସିଡ୍ ରିଫ୍ଲକ୍ସ ବ୍ୟତୀତ ଅସ୍ତ୍ରୋପଚାରରେ ମଧ୍ୟ ଦିଆଯାଏ ।
କେବଳ ହଜମ ପ୍ରକ୍ରିୟାରେ ସମସ୍ୟା ହେତୁ ନୁହେଁ, ବେଳେବେଳେ ଆସ୍ପିରିନ୍ ଧାରଣ କରିଥିବା ଆଣ୍ଟାସିଡ୍ ବ୍ୟବହାର ମଧ୍ୟ ହୃଦୟ ସମ୍ବନ୍ଧୀୟ ସମସ୍ୟା ସୃଷ୍ଟି କରିଥାଏ ଏବଂ ଉଚ୍ଚ ରକ୍ତଚାପ ବଢାଇଥାଏ । ଅନେକ ଅନୁସନ୍ଧାନରେ ରାଣ୍ଟିଡାଇନ୍ ଧାରଣ କରିଥିବା ଆଣ୍ଟାସିଡ୍ ବ୍ୟବହାର କର୍କଟ କରାଇଥାଏ ବୋଲି ଉଲ୍ଲେଖ କରାଯାଇଛି । ବାସ୍ତବରେ ରାଣ୍ଟିଡାଇନ୍ରେ ନାଇଟ୍ରେଟ୍ ମିଥାଇଲ୍ ମାଇନ୍(NDMA) ନାମକ ଏକ ଉପାଦାନ ରହିଥାଏ, ଯାହା କର୍କଟ ରୋଗ କରାଇଥାଏ । ଏହି କାରଣରୁ ଜିଣ୍ଟେକ, ପେପ୍ଲୋକ, ଆକିଲୋକ ଏବଂ ରାଣ୍ଟେକ ଇତ୍ୟାଦି ନାମରେ ବିକ୍ରି ହୋଇଥିବା ରାଣ୍ଟିଡାଇନ୍ ଔଷଧର ବ୍ୟବହାର ଭାରତରେ ନିଷିଦ୍ଧ । ତେଣୁ ଏସବୁ ଔଷଧର ସେବନରୁ ନିବୃତ୍ତ ରୁହନ୍ତୁ ।
