ହାଇଦ୍ରାବାଦ: ବର୍ତ୍ତମାନ ସମୟରେ ଏସିଡିଟି ଏକ ସାଧାରଣ ସମସ୍ୟା ପାଲଟିଲାଣି । ପରିବର୍ତ୍ତିତ ଜୀବନଶୈଳୀ ଏବଂ କାର୍ଯ୍ୟ ବ୍ୟସ୍ତତା କାରଣରୁ ଭୋଜନରେ ଅନିୟମିତତା ଯୋଗୁଁ ଜଣେ ଏସିଡିଟିର ଶିକାର ହୋଇଥାଇ ପାରନ୍ତି । ବେଳେବେଳେ ଏହି ସମସ୍ୟା ଗମ୍ଭୀର ମଧ୍ୟ ହୋଇପାରେ । ତେବେ ଏହା ଏପରି ଏକ ସମସ୍ୟା ଯାହାକୁ ଏଡାଇବା ପାଇଁ କୌଣସି ନିର୍ଦ୍ଦିଷ୍ଟ ମେଡିସିନ୍ ସେବନ ଅପେକ୍ଷା ସତର୍କ ରହିବା ଆବଶ୍ୟକ । ଡାଏଟରେ କେତେକ ପରିବର୍ତ୍ତନ କରିପାରିଲେ ନିଶ୍ଚିତ ରୂପେ ଏସିଡିଟି ସମସ୍ୟାକୁ ରୋକାଯାଇ ପାରିବ । ଏନେଇ ନିମ୍ନରେ ବର୍ଣ୍ଣନା କରାଯାଇଛି...
ଯଦି ଅନୁଭବ କରୁଛନ୍ତି ଯେ, ଆପଣଙ୍କ ଗଳାର ମୂଳ ଭାଗରେ ଖାଦ୍ୟ ରହିଛି ଏବଂ ଛାତିରେ ଜ୍ବଳନ ହେଉଛି, ଏହାର ଅର୍ଥ ଆପଣଙ୍କର ଏସିଡ୍ ରିଫ୍ଲକ୍ସ ବା ଗ୍ୟାଷ୍ଟ୍ରୋସୋଫେଜ୍ ରିଫ୍ଲକ୍ସ(GER) ହୋଇଛି । ପେଟ ଏସିଡ୍ ଏସୋଫ୍ୟାଗସରେ ପ୍ରବାହିତ ହେଲେ ଏହା ହୁଏ । ଅନ୍ୟାନ୍ୟ ଲକ୍ଷଣ ଏବଂ କାରଣ ମଧ୍ୟରେ ପେଟ ଫୁଲିବା, ବାନ୍ତି, ଓଜନ ହ୍ରାସ, ଶୁଖିଲା କାଶ ଏବଂ ଗଳା ଯନ୍ତ୍ରଣା ହେବା ଅନ୍ତର୍ଭୁକ୍ତ । ଯଦି ଏପରି ଅଧିକ ସମୟ ଲାଗି ରହେ, ତେବେ ଡାକ୍ତରଙ୍କ ପରାମର୍ଶ ନେବା ଆବଶ୍ୟକ ।
ଗ୍ୟାଷ୍ଟ୍ରୋସୋଫେଜାଲ୍ ରିଫ୍ଲକ୍ସ ରୋଗ(GERD) ରିଫ୍ଲକ୍ସର ଏକ ଭୟଙ୍କର ରୂପ ଏବଂ ଏହାର ଚିକିତ୍ସା କରା ନ ଗଲେ ଏହା ଏସୋଫେଜ୍ କ୍ୟାନସର ମଧ୍ୟ କରାଇପାରେ । ତେଣୁ ପ୍ରାଥମିକ ପର୍ଯ୍ୟାୟରେ ଏହାକୁ ରୋକାଯିବା ଆବଶ୍ୟକ । ନିମ୍ନରେ ଆଲୋଚନା କରାଯାଇଥିବା ଏହି 5ଟି ସତର୍କତା ଉପରେ ବିଶେଷ ଧ୍ୟାନ ଦିଅନ୍ତୁ, ଯାହା ଆପଣଙ୍କର ଏସିଡିଟି ସମସ୍ୟାକୁ ଦୂର କରିପାରିବ(Avoid These Five Things If You Have Acid Reflux)...
ବହୁତ ଅଧିକ ଖାଇବାଠାରୁ ଦୂରେଇ ରୁହନ୍ତୁ:-
ଏସିଡ୍ ରିଫ୍ଲକ୍ସ ରୋଗର ବିକାଶ ପାଇଁ ଏହା ଏକ ସାଧାରଣ ବିପଦ କାରଣ । ଏହା ବଦଳରେ ଦିନସାରା ଛୋଟ ଛୋଟ ଖାଦ୍ୟ ଖାଆନ୍ତୁ । ଅର୍ଥାତ୍ କମ୍ ପରିମାଣର ଖାଦ୍ୟ ଖାଆନ୍ତୁ । ମାତ୍ର ପେଟକୁ ଖାଲି ରଖିବାକୁ ଦିଅନ୍ତୁ ନାହିଁ । ଖାଇବାର ବହୁତ ସମୟ ବ୍ୟବଧାନ ପରେ କୌଣସି ଭାରି ଖାଦ୍ୟ ଖାଇବା ପୂର୍ବରୁ ନିଶ୍ଚିତ ରୂପେ ହାଲୁକା ଖାଦ୍ୟ କିମ୍ବା କମ୍ ପାଣି ପିଅନ୍ତୁ ।
ଭୋଜନର ଠିକ୍ ପରେ ଶୋଇବା:-
ଖାଦ୍ୟ ଖାଇବା ପରେ ଅତି କମରେ 2ରୁ 3 ଘଣ୍ଟା ଶୋଇବାଠାରୁ ଦୂରେଇ ରୁହନ୍ତୁ ଏବଂ ଶୋଇବା ସମୟରେ କୌଣସି ପ୍ରକାରର ସ୍ନାକ୍ସ ସେବନ ଠାରୁ ଦୂରେଇ ରହନ୍ତୁ ।
ମସଲାଯୁକ୍ତ କିମ୍ବା ଚର୍ବିଯୁକ୍ତ ଖାଦ୍ୟ:-
ମସଲାଯୁକ୍ତ କିମ୍ବା ଚର୍ବିଯୁକ୍ତ ଖାଦ୍ୟ ବ୍ୟତୀତ, ଡାକ୍ତରମାନେ କଫିନ୍, ମଦ୍ୟପାନ, ଚକୋଲେଟ୍, କାର୍ବୋନେଟେଡ୍ ପାନୀୟ ଏବଂ ଏସିଡ୍ ଜୁସ୍, ଟମାଟୋ ଏବଂ ଟମାଟୋ ସସ୍ଠାରୁ ଦୂରେଇ ରହିବାକୁ ପରାମର୍ଶ ଦେଇପାରନ୍ତି କାରଣ ଏହା ଏସିଡ୍ ରିଫ୍ଲକ୍ସ ସହିତ ସଂଯୁକ୍ତ । ତେଣୁ ଏହିସବୁ ଖାଦ୍ୟଠାରୁ ଦୂରେଇ ରୁହନ୍ତୁ ।
ଧୂମପାନ:-
ବିଶେଷଜ୍ଞମାନେ କହିଛନ୍ତି ଯେ, ସିଗାରେଟ୍ ଟାଣିବା ଗ୍ୟାଷ୍ଟିକ୍ ଲକ୍ଷଣକୁ ବଢାଇପାରେ । ଅଧ୍ୟୟନରୁ ଏହା ମଧ୍ୟ ଦର୍ଶାଯାଇଛି ଯେ, ଧୂମପାନକାରୀମାନଙ୍କର ଧୂମପାନ କରୁନଥିବା ବ୍ୟକ୍ତିଙ୍କ ଅପେକ୍ଷା ଏସିଡ୍ ରିଫ୍ଲକ୍ସ ହେବାର ସମ୍ଭାବନା ଅଧିକ ।
ଟାଇଟ୍ ପୋଷାକ ପିନ୍ଧିବା:-
ଟାଇଟ୍ ପ୍ୟାଣ୍ଟ କିମ୍ବା ଟାଇଟ୍ ବେଲ୍ଟ ପିନ୍ଧିବା ଦ୍ୱାରା ପେଟ ଚାପି ହୋଇରହିଥାଏ । ଏହା ଫଳରେ ଏସିଡ୍ ରିଫ୍ଲକ୍ସ ମଧ୍ୟ ବଢିପାରେ । ତେଣୁ, ଟାଇଟ୍ ପ୍ୟାଣ୍ଟ ପିନ୍ଧିବା ଏବଂ ବେଲ୍ଟକୁ ଟାଇଟ୍ କରି ବାନ୍ଧିବାଠାରୁ ଦୂରେଇ ରୁହନ୍ତୁ ।
Disclaimer: ଉପରିସ୍ଥ ସମସ୍ତ ବିବରଣୀ କେବଳ ସାଧାରଣ ପରାମର୍ଶ ନିମନ୍ତେ । ଜଟିଳ ରୋଗ ସମସ୍ୟା ପାଇଁ ସର୍ବଦା ଡାକ୍ତରଙ୍କ ପରାମର୍ଶ ଗ୍ରହଣୀୟ ।
