ହାଇଦ୍ରାବାଦ: ବର୍ତ୍ତମାନ ସମୟରେ ଜନ୍ମ ନିୟନ୍ତ୍ରଣର ବିଭିନ୍ନ ପଦ୍ଧତି ସହଜରେ ଉପଲବ୍ଧ । କିନ୍ତୁ ବହୁ ସଂଖ୍ୟକ ମହିଳା ବଟିକା ବା ଔଷଧ ଉପରେ ନିର୍ଭର କରନ୍ତି । ବରିଷ୍ଠ ସ୍ତ୍ରୀ ରୋଗ ବିଶେଷଜ୍ଞ ଡକ୍ଟର ବିଜୟଲକ୍ଷ୍ମୀ କହିଛନ୍ତି ଯେ, ଅଧିକାଂଶ କ୍ଷେତ୍ରରେ ଯେଉଁ ମହିଳାମାନେ ଅବାଞ୍ଛିତ ଗର୍ଭଧାରଣକୁ ଏଡାଇବାକୁ ଚାହାଁନ୍ତି ସେମାନେ ସହଜ ଓ ସରଳ ଉପାୟ ଆପଣାଇ ପାରିବେ । ତେବେ ସଚେତନତା ଅଭାବରୁ ଗର୍ଭନିରୋଧକ ବଟିକା ବ୍ୟବହାର କରିବାକୁ ଅନେକ ପ୍ରାଥମିକତା ଦେଇଥାନ୍ତି । ମାତ୍ର ଗର୍ଭନିରୋଧକର ଅନ୍ୟ କିଛି ପଦ୍ଧତି ଅଛି ଯାହା ସହାୟକ ହୋଇପାରେ । ତେବେ ଆସନ୍ତୁ ଜାଣିବା ସେ ସମ୍ପର୍କରେ କଣ କହୁଛନ୍ତି ଡାକ୍ତର ।
- କଣ୍ଡୋମ(Condoms):-
ଗର୍ଭନିରୋଧ ପାଇଁ କଣ୍ଡୋମ ବ୍ୟବହାର କରିବା ଅତି ସାଧାରଣ କଥା । ମହିଳା ଓ ପୁରୁଷଙ୍କ ପାଇଁ ଏହା ଭିନ୍ନ ଧରଣର ମିଳିଥାଏ । ଅବାଞ୍ଛିତ ବା ସନ୍ତାନ ଚାହୁଁନଥିବା ଦମ୍ପତି ଏହାର ବ୍ୟବହାର କରିଥାନ୍ତି । ଅବାଞ୍ଛିତ ଗର୍ଭଧାରଣ ବ୍ୟତୀତ sexually transmitted disease ବା STD ରୋଗରୁ ରକ୍ଷା ପାଇବା ପାଇଁ ମଧ୍ୟ ଏହାର ବହୁଳ ବ୍ୟବହାର କରାଯାଏ । ତେବେ ଏହାର ଅନୁପଯୁକ୍ତ ବ୍ୟବହାର ବା ଅସାବଧାନତା ଯୋଗୁଁ କଣ୍ଡୋମ ନଷ୍ଟ ହୋଇଥାଏ । ଫଳରେ ମହିଳାମାନେ ଅସାବଧାନତା କାରଣରୁ ଗର୍ଭବତୀ ହେବାର ଆଶଙ୍କା ବଢିଥାଏ ।
ଏହା ବ୍ୟତୀତ ଅନେକ ଲୋକ ବିଶ୍ବାସ କରନ୍ତି ଯେ କଣ୍ଡୋମ କେବଳ ପୁରୁଷଙ୍କ ପାଇଁ ଉପଲବ୍ଧ ରହିଥାଏ । କିନ୍ତୁ ବାସ୍ତବରେ ବଜାରରେ ମହିଳାଙ୍କ ପାଇଁ କଣ୍ଡୋମ ମଧ୍ୟ ଉପଲବ୍ଧ ରହିଛି । କଣ୍ଡୋମ ଏକ ସହଜ ବ୍ୟବହାର-ଗର୍ଭନିରୋଧକ ଏବଂ ଶରୀର ଉପରେ ଏଗୁଡ଼ିକର କୌଣସି ପାର୍ଶ୍ବ ପ୍ରତିକ୍ରିୟା ପଡିନଥାଏ । ମହିଳା କଣ୍ଡୋମଗୁଡିକ ହାଇପୋ ଆଲର୍ଜେନିକ୍ ହୋଇଥାଏ । ଏହାର ଅର୍ଥ ହେଉଛି ଏଗୁଡ଼ିକ ବ୍ୟବହାର ଦ୍ବାରା ଆଲର୍ଜି ହେବାର ସମ୍ଭାବନା କମ ରହିଥାଏ । ପୁରୁଷ ଓ ମହିଳାଙ୍କ ମଧ୍ୟର ଯୌନ ସମ୍ପର୍କ ପରେ ମଧ୍ୟ ଏଗୁଡିକ ନିଜ ସ୍ଥାନରୁ ହଟିନଥାନ୍ତି ।
- ବଟିକା ବା ଟାବଲେଟର ବ୍ୟବହାର
ସକାଳ ପରେ ବଟିକା ବା ମର୍ଣ୍ଣିଂ ଆଫ୍ଟର ପିଲ୍ସ ଜରୁରୀକାଳୀନ ଗର୍ଭନିରୋଧକ ବଟିକା ଭାବରେ ଜଣାଶୁଣା । ଅସୁରକ୍ଷିତ ଯୌନ ସମ୍ପର୍କ, ଗର୍ଭଧାରଣ ସମୟରେ କଣ୍ଡୋମ ନଷ୍ଟ ହେବା ଭଳି ସମସ୍ୟା ମଧ୍ୟରୁ ଏହା ଗର୍ଭଧାରଣକୁ ରୋକିବାରେ ସାହାଯ୍ୟ କରିଥାଏ । ଅବାଞ୍ଛିତ ଗର୍ଭଧାରଣକୁ ଏଡାଇବା ପାଇଁ ଏହି ବଟିକା ଯୌନ ସମ୍ପର୍କ ପରେ 72 ଘଣ୍ଟା ମଧ୍ୟରେ ଗ୍ରହଣ କରାଯାଇପାରେ । ଏହାକୁ ସେବନ କରିବା ବିଳମ୍ବ କରିବା ଦ୍ବାରା ଗର୍ଭଧାରଣର ସମ୍ଭାବନା ବଢିପାରେ । ଯଦିଓ ଜରୁରୀକାଳୀନ ପରିସ୍ଥିତିରେ ଏହି ଔଷଧଗୁଡ଼ିକ ଅତ୍ୟନ୍ତ ଲାଭଦାୟକ ହୋଇପାରେ ତଥାପି ଏହାର କିଛି ପାର୍ଶ୍ବ ପ୍ରତିକ୍ରିୟା ରହିଛି । ଯେପରିକି ବାନ୍ତି, ମୁଣ୍ଡବିନ୍ଧା, ସ୍ତନ ଯନ୍ତ୍ରଣା, ପେଟ ଯନ୍ତ୍ରଣା ଆଦି ଅନ୍ତର୍ଭୁକ୍ତ ।
- କପର ଟି (Copper T)
କପର ଟି ହେଉଛି ଏକ ଇଂରାଜୀ ଅକ୍ଷର ‘ଟି’ ଆକୃତିର ଉପକରଣ । ଯାହାର ଚାରିପାଖରେ ଏକ ତମ୍ବା ତାର ଥାଏ, ଯାହା ଗର୍ଭଧାରଣକୁ ଏଡାଇବାରେ ସାହାଯ୍ୟ କରିଥାଏ । ଏହି ଉପକରଣଟି ସ୍ବାସ୍ଥ୍ୟ ଚିକିତ୍ସକଙ୍କ ଦ୍ବାରା ଗର୍ଭାଶୟରେ ଭର୍ତ୍ତି କରାଯାଇଥାଏ ଏବଂ ଯେତେବେଳେ ଜଣେ ମହିଳା ଗର୍ଭବତୀ ହେବାକୁ ପ୍ରସ୍ତୁତ ହୁଅନ୍ତି ସେତେବେଳେ ଏହାକୁ ବାହାର କରାଯାଇପାରିବ । ଏହା ଏକ ଦୀର୍ଘକାଳୀନ କାର୍ଯ୍ୟ କରୁଥିବା ଗର୍ଭନିରୋଧକ ଭାବେ ବ୍ୟବହାର କରାଯାଏ
- ଜନ୍ମ ନିୟନ୍ତ୍ରଣ ସଟ୍(Birth control shot)
ଏହି ଗର୍ଭନିରୋଧକ ପ୍ରୋଜେଷ୍ଟିନ ହରମୋନରେ ନିର୍ମିତ । ଏହାକୁ ଇଞ୍ଜେକ୍ସନ ମାଧ୍ୟମରେ 3-4 ମାସର ବ୍ୟବଧାନରେ ଦିଆଯାଇପାରେ । ଏହା ମହିଳାମାନଙ୍କଠାରେ ଅଣ୍ଡାଦାନ ପ୍ରକ୍ରିୟାକୁ ରୋକିବାରେ ସାହାଯ୍ୟ କରିଥାଏ । ଜନ୍ମ ନିୟନ୍ତ୍ରଣ ବଟିକା ଅପେକ୍ଷା ଏହା ଭଲ ଭାବରେ ବିବେଚନା କରାଯାଏ କାରଣ ଏହାର ଅପେକ୍ଷାକୃତ କମ ପାର୍ଶ୍ବ ପ୍ରତିକ୍ରିୟା ରହିଥାଏ । ନୂତନ ଏବଂ ସ୍ତନ୍ୟପାନ କରାଉଥିବା ମାଆମାନେ ପ୍ରାୟତଃ ଏହି ପଦ୍ଧତିକୁ ପସନ୍ଦ କରନ୍ତି ।
- ଭେଜାଇନାଲ ରିଙ୍ଗ(Vaginal Ring)
ଏହି କୌଶଳରେ ଏକ ନମନୀୟ ପ୍ଲାଷ୍ଟିକ୍ ରିଙ୍ଗ ରହିଥାଏ, ଯାହା ମହିଳାଙ୍କ ପ୍ରଜନନ ଅଙ୍ଗ(Vagina) ମଧ୍ୟରେ ଭର୍ତ୍ତି କରାଯାଇଥାଏ । ଏହା ଗର୍ଭାବସ୍ଥାକୁ ଏଡାଇବା ପାଇଁ କ୍ରମାଗତ ଭାବରେ ହରମୋନ୍ କ୍ଷରଣ କରିଥାଏ । ଏହାକୁ ତିନି ସପ୍ତାହ ପର୍ଯ୍ୟନ୍ତ ଭେଜାଇନା ମଧ୍ୟରେ ରଖାଯିବା ଉଚିତ । ଏହା ପରେ ସାତ ଦିନର ବିରତି ନିଆଯାଇପାରେ । ରିଙ୍ଗ ଇଷ୍ଟ୍ରୋଜେନ୍ ଏବଂ ପ୍ରୋଜେଷ୍ଟେରନ୍ ହରମୋନ୍ କ୍ଷରଣ କରେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
