ରାଉରକେଲା: ସୁନ୍ଦରଗଡ ଜିଲ୍ଲା କୋଇଡାରୁ କାଲଟା ମଧ୍ୟରେ ଏକ ଅସ୍ଥାୟୀ ପୋଲ ଭାସି ଯିବାରୁ 215 ନମ୍ବର ଜାତୀୟ ରାଜପଥରେ ଯାତାୟାତ ପ୍ରଭାବିତ ହୋଇଛି । ଶନିବାର ରାତି ପର୍ଯ୍ୟନ୍ତ କୋଇଡା ଓ ଏହାର ପାର୍ଶ୍ଵବର୍ତ୍ତୀ ଅଞ୍ଚଳରେ ପ୍ରବଳ ବର୍ଷା କାରଣରୁ ବନ୍ୟା ସ୍ଥିତି ଉପୁଜିଛି । ପାହାଡ ଉପରୁ ପ୍ରବଳ ସ୍ରୋତ ସହ ପାଣି ଆସିଯିବାରୁ କୋଇଡା ଠାରୁ କାଲଟା ଓ ଲହୁଣୀପଡାକୁ ସଂଯୋଗ କରୁଥିବା 215 ନମ୍ବର ଜାତୀୟ ରାଜପାଥର ନାରାୟଣପୋଷ, କମାଣ୍ଡଛକ ନିକଟରେ ଥିବା ଅସ୍ଥାୟୀ ପୋଲ ବର୍ଷା ଜଳର ସ୍ରୋତରେ ଭାସିଯାଇଛି ।
ଫଳରେ ରାସ୍ତାର ଉଭୟ ପାର୍ଶ୍ବରେ ଶହ ଶହ ଲୁହା ପଥର ବୋଝେଇ ଟ୍ରକ ସମେତ ଚାରିଚାକିଆ ଯାନ ଗୁଡିକ ଫସି ରହିଛି ଓ ରାସ୍ତା ଜାମ୍ ହୋଇଛି । ଏପଟେ 215 ନମ୍ବର ଜାତୀୟ ରାଜପଥର ନିର୍ମାଣ ଓ ପୋଲ ନିର୍ମାଣ କାର୍ଯ୍ୟ ଚାଲିଥିବାରୁ କାର୍ ନଦୀର ଉପରେ ଏକ ଅସ୍ଥାୟୀ ପୋଲ ନିର୍ମାଣ କରାଯାଇଥିଲା । ପୋଲ ଭାସି ଯିବାରୁ ଏବେ କୋଇଡାରୁ କାଲଟା ଯୋଗାଯୋଗ ସମ୍ପୂର୍ଣ୍ଣ ବିଚ୍ଛିନ୍ନ ହୋଇଚି ।
ଅନ୍ୟପକ୍ଷେ ରାସ୍ତା ଜାମ ହେବା ଫଳରେ 24 ଘଣ୍ଟାରୁ ଅଧିକ ସମୟ ଧରି ଏହି ରାସ୍ତାରେ ଅଟକି ରହିଥିବା ଗାଡି ଚାଳକ ମାନେ ଭୋକ ଉପାସରେ ପଡି ରହିଛନ୍ତି । ଅନ୍ୟପଟେ ଜାମକୁ ଆଖି ଆଗରେ ରଖି ସ୍ଥାନୀୟ ପ୍ରଶାସନ ପକ୍ଷରୁ ଯୁଦ୍ଧକାଳୀନ ଭିତ୍ତିରେ ଅସ୍ଥାୟୀ ପୋଲ ପୁନଃ ନିର୍ମାଣ କରିବା ପାଇଁ ଉଦ୍ୟମ ଜାରି ରହିଛି।
ରାଉରକେଲାରୁ ରାଜେନ୍ଦ୍ର ନାଥ ମିଶ୍ର, ଇଟିଭି ଭାରତ
