ସୁନ୍ଦରଗଡ: ହୋଲି ପାଇଁ ସକାଳଠାରୁ ପେଟ୍ରୋଲିଂକୁ କଡାକଡି କରିଥିଲା ଟାଉନ ପୋଲିସ । ରାତିରେ ପୋଲିସକୁ ମିଳିଛି ବଡ ଧରଣର ସଫଳତା । ସହରର ଏକ ନିର୍ଦ୍ଦିଷ୍ଟ ସ୍ଥାନରେ କେତେକ ଅସାମାଜିକ ବ୍ୟକ୍ତି ଏକତ୍ରିତ ହୋଇ କିଛି ଅପରାଧ ଘଟାଇବାକୁ ଯୋଜନା କରୁଥିବା ବେଳେ ପୋଲିସ ନଜରରେ ପଡିଥିଲେ ।
ପୋଲିସଗାଡିକୁ ଦେଖି ଦୁର୍ବୃତ୍ତମାନେ ଗାଡି ଛାଡି ଖସି ପଳାଇଥିଲେ । ତେବେ ପୋଲିସ ଘଟଣାସ୍ଥଳରୁ ଗୋଟିଏ କାର ସହ କିଛି ଆପତ୍ତି ଜନକ ଜିନିଷ ଜବତ କରି ଥାନାକୁ ଆଣିଛି । କାରରେ ପୋଲିସ ପରି ବିଭିନ୍ନ ସରକାରୀ ପ୍ରତୀକ ଲାଗିବା ଓ ଅପରାଧିକ କାଣ୍ଡ ଘଟାଇବା ନେଇ ଯୋଜନା ଚାଲିବା କଥା ପୋଲିସର ଚିନ୍ତା ବଢାଇଛି ।
ପୋଲିସ ସକାଳ ଠାରୁ ଏ ପର୍ଯ୍ୟନ୍ତ କେବଳ ସହର ମଧ୍ୟରୁ 10ଟି ବାଇକ ଜବତ କରିଥିବା ବେଳେ ଏବେ ଏହି କାରକୁ ଜବତ କରିଛି । ତେବେ ପୋଲିସ ଅଧିକ ଖୋଳତାଡ ଆରମ୍ଭ କରିବା ସହ ସମସ୍ତ ଅପରାଧିଙ୍କୁ ଯେପରି କାବୁ କରିପାରିବ ସେ ନେଇ ଆଲର୍ଟ ରହିଛି । କାରଟି ବାହାର ରାଜ୍ୟର ନମ୍ବରରେ ପଞ୍ଜିକୃତ ହୋଇଥିବା ଓ ସନ୍ଦିଗ୍ଧ ଅବସ୍ଥାରେ ଥିବାରୁ ଏହା ପୋଲିସର ମୁଣ୍ଡ ବ୍ୟଥାର କାରଣ ହୋଇଛି ।
ସୁନ୍ଦରଗଡରୁ ହରିହର ଦାସ ମହାପାତ୍ର, ଇଟିଭି ଭାରତ
