ରାଉରକେଲା: ସୁନ୍ଦରଗଡ଼ ସଦର ଥାନା ସୁବୁଲିଆ ଗାଁରେ ଅଘଟଣ । ସାପ କାମୁଡ଼ାରେ ଦୁଇ ଭାଇ ଭଉଣୀଙ୍କର ମୃତ୍ୟୁ ଘଟିଛି । ଆଉ ଦିନ କେଇଟା ପରେ ଭାଇ ହାତରେ ରାକ୍ଷୀ ବାନ୍ଧିଥାନ୍ତା ଭୟଣୀ । ଭାଇ- ଭଉଣୀର ପବିତ୍ର ବନ୍ଧନ ପୂର୍ବରୁ ବିଧାତା ସାଜିଲା ବଇରି । ପ୍ରଦୀପ ଦଣ୍ଡସେନାଙ୍କ ବଡ଼ ଝିଅ ବର୍ଷା ଦଣ୍ଡସେନା(13) ଏବଂ ସାନ ପୁଅ ଅଭିନାଶ ଦଣ୍ଡସେନା(8) ରାତିରେ ଶୋଇଥିବା ବେଳେ ସର୍ପ ଦଶଂନରେ ଉଭୟଙ୍କର ମୃତ୍ୟୁ ଘଟିଥିବା ଜଣାପଡ଼ିଛି ।
ଘଟଣା ଅନୁସାରେ ସୁବୁଲିଆ ଗ୍ରାମର ପ୍ରଦୀପ ଦଣ୍ଡସେନାଙ୍କ ପୁଅ ଓ ଝିଅ ରାତିରେ ଖାଇସାରିବା ପରେ ବିଛଣାରେ ଶୋଇଥିଲେ । ଆଜି ସକାଳ ପ୍ରାୟ ୮ ଟା ସେମାନେ ନଉଠିବାରୁ ତାଙ୍କୁ ପରିବାର ଲୋକେ ଉଠାଇବା ବେଳକୁ ଉଭୟେ ନିସ୍ତେଜ ହୋଇପଡ଼ିଥିଲେ । ତେଣୁ ପରିବାର ଲୋକେ ତୁରନ୍ତ ଭାଇ- ଭଉଣୀଙ୍କୁ ସୁନ୍ଦରଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ ।
ସେମାନଙ୍କ ସ୍ବାସ୍ଥ୍ୟବସ୍ଥା ଗୁରୁତର ହେବାରୁ ଜିଲ୍ଲା ମୁଖ୍ୟ ଚିକିତ୍ସାଳୟରୁ ବୁର୍ଲା ମେଡ଼ିକାଲକୁ ସ୍ଥାନାନ୍ତର କରାଯାଇଥିଲା । କିନ୍ତୁ ପରିବାର ଲୋକେ ସେମାନଙ୍କୁ ରାଉରକେଲା ଆଇଜିଏଚ ନେବା ବାଟରେ ଭାଇ- ଭଉଣୀଙ୍କର ମୃତ୍ୟୁ ହୋଇଥିବା ଜଣାପଡ଼ିଛି ।
ରାଉରକେଲାରୁ ରାଜେନ୍ଦ୍ର ନାଥ ମିଶ୍ର, ଇଟିଭି ଭାରତ
