ରାଉରକେଲା: ବିଶ୍ବକପରେ ବାଜି ଲଗାଇବା (ବେଟିଂ) ମାମଲାରେ ସୋମବାର ରାଉରକେଲାରୁ ଗିରଫ ହୋଇଥିବା ନଗରମାଲ ଅଗ୍ରୱାଲ ଘରେ ବୁଧବାର ଚଢାଉ କରିଛି ପୋଲିସ । ଚଢାଉ ବେଳେ ତାଙ୍କ ଘରୁ 3 ହଜାର ଡଲାର ଓ ପାସପୋର୍ଟ ଜବତ ହୋଇଛି । ଏପଟେ ଗିରଫ 2 ଅଭିଯୁକ୍ତଙ୍କୁ ବୁଧବାର ପୋଲିସ କୋର୍ଟ ଚାଲାଣ କରିଛି ।
ସୋମବାର ରାଉରକେଲା ସହରରେ ବିଶ୍ବକପ୍ ବେଟିଂର ପର୍ଦ୍ଦାଫାସ୍ କରିଥିଲା ପୋଲିସ । ଏଥିରେ 2 ଜଣଙ୍କୁ ଗିରଫ କରାଯାଇଥିଲା । ଗିରଫ ନେଇ ରାଉରକେଲା ଏସପି ସାର୍ଥକ ଷଡଙ୍ଗୀ ସୂଚନା ଦେଇଥିଲେ । ଆବଶ୍ୟକ ପଡିଲେ ଘଟଣାର ମୁଖ୍ୟ ଅଭିଯୁକ୍ତକୁ ଧରିବା ପାଇଁ ପୋଲିସ ଅନ୍ୟ ରାଜ୍ୟକୁ ଯିବ ବୋଲି ସେ କହିଥିଲେ ।
ବିଶ୍ବକପ ବେଟିଂ ମାମଲାରେ ପୋଲିସ ରାଉରକେଲାର ନଗରମାଲ ଅଗ୍ରୱାଲ ଓ ଦେବଗାଓଁର ସୁନୀଲ କୁମାର ସିଂହଳକୁ ଗିରଫ କରିଥିଲା । ସେମାନଙ୍କ ନିକଟରୁ ନଗଦ 31 ଲକ୍ଷ 17 ହଜାର 570 ଟଙ୍କା ସହ 17ଟି ମୋବାଇଲ, 3ଟି କାଲକ୍ୟୁଲେଟର ଏବଂ ଗୋଟିଏ ଏଲଇଡି ଟିଭି ଜବତ ହୋଇଛି ।
ରାଉରକେଲାରେ ଦିନକୁ ଦିନ କ୍ରିକେଟ ବେଟିଂ ବଢିଚାଲିଛି । ବିଭିନ୍ନ ହୋଟେଲରୁ ଏହାର ପରିଚାଳନା କରାଯାଉଥିବା ଅଭିଯୋଗ ହେଉଛି ।
ରାଉରକେଲାରୁ ରାଜେନ୍ଦ୍ରନାଥ ମିଶ୍ର, ଇଟିଭି ଭାରତ
