ସୁବର୍ଣ୍ଣପୁର: ପାତାଳୀ ଶ୍ରୀକ୍ଷେତ୍ର ଭାବରେ ପରିଚିତ ସୁବର୍ଣ୍ଣପୁରର ଶ୍ରୀ ବଡ ଜଗନ୍ନାଥ ଓ ଶ୍ରୀ ବଳଭଦ୍ର ବେନିଭାଇ ରବିବାର ବାମନ ଓ ପର୍ଶୁରାମ ବେଶରେ ଶ୍ରଦ୍ଧାଳୁଙ୍କୁ ଦର୍ଶନ ଦେବେ । ଶନିବାର ଶ୍ରୀ ବଡ ଜଗନ୍ନାଥ ନୃସିଂହ ଓ ଶ୍ରୀ ବଳଭଦ୍ର ବରାହ ବେଶ ଧାରଣ କରି ଶ୍ରଦ୍ଧାଳୁଙ୍କୁ ଦର୍ଶନ ଦେଇଥିଲେ । ଏହି ବେଶ ଦେଖିବା ପାଇଁ ଶ୍ରୀ ଗୁଣ୍ଡିଚା ମନ୍ଦିରରେ ଭକ୍ତଙ୍କର ବେଶ ସମାଗମ ଦେଖିବାକୁ ମିଳିଥିଲା ।
ସୂଚନା ଅନୁଯାୟୀ, ଗତ ଶୁକ୍ରବାର ସନ୍ଧ୍ୟାରେ ତିନିଠାକୁର ଶ୍ରୀ ଗୁଣ୍ଡିଚା ମନ୍ଦିର ପହଞ୍ଚିବା ପରେ ପାରମ୍ପରିକ ରୀତିନିତୀରେ ପୂଜା ଆରାଧନା ସମ୍ପନ୍ନ କରାଯାଇଥିଲା । ଏହାପରେ ବିଗ୍ରହଙ୍କୁ ଗର୍ଭଗୃହ ସ୍ଥିତ ସିଂହାସନରେ ବିରାଜମାନ କରାଯାଇଥିଲା ।
ଶନିବାର ମହାପ୍ରଭୁଙ୍କ ଶ୍ରୀ ନୃସିଂହ ଦେବ ସହିତ ବେନି ଭାଇଙ୍କ ବେଶ ଦେଖିବାକୁ ଓ ଦେବୀ ସୁଭଦ୍ରାଙ୍କୁ ଦର୍ଶନ କରିବା ସହିତ ବିଭୂକୃପା ପାଇବାକୁ ସନ୍ଧ୍ୟାରୁ ଭକ୍ତଙ୍କର ଲମ୍ବାଧାଡି ଲାଗିଥିଲା । ଏଥିସହ ସନ୍ଧ୍ୟା ଆରତୀ ଦର୍ଶନ କରିବା ପାଇଁ ଶ୍ରଦ୍ଧାଳୁଙ୍କ ସମାଗମରେ ଲୋକାରଣ୍ୟ ହୋଇ ପଡିଥିଲା ଶ୍ରୀଗୁଣ୍ଡିଚା ମନ୍ଦିର ପରିସର । ଶାନ୍ତି ଶୃଙ୍ଖଳାର ସହିତ ଦର୍ଶନ ପାଇଁ ଜିଲ୍ଲା ପୋଲିସ ପକ୍ଷରୁ ଗୁଣ୍ଡିଚା ମନ୍ଦିର ଗର୍ଭଗୃହରେ ସୁରକ୍ଷା କର୍ମୀଙ୍କୁ ମୁତୟନ କରାଯାଇଥିଲା ।
ତେବେ ଦର୍ଶନାର୍ଥୀଙ୍କ ମନୋରଞ୍ଜନ ପାଇଁ ଶ୍ରୀଗୁଣ୍ଡିଚା ମନ୍ଦିର କମିଟି ପକ୍ଷରୁ ସାଂସ୍କୃତିକ କାର୍ଯ୍ୟକ୍ରମର ଆୟୋଜନ ମଧ୍ୟ କରାଯାଇଥିଲା । ଆଜି ପ୍ରଥମ ସନ୍ଧ୍ୟାରେ ରାଜ୍ୟ ବାଣିଜ୍ୟ ଓ ପରିବହନ ମନ୍ତ୍ରୀ ପଦ୍ମନାଭ ବେହେରା ଯୋଗ ଦେଇ ସାଂସ୍କୃତିକ କାର୍ଯ୍ୟକ୍ରମକୁ ଉଦଘାଟନ କରିବା ସହିତ ସଂଗୀତ ସନ୍ଧ୍ୟାରେ ପ୍ରଥମ ଭଜନ ପରିବେଷଣ କରିଥିଲେ । ମନ୍ତ୍ରୀଙ୍କ କଣ୍ଠରୁ ଶ୍ରୀ ଜଗନ୍ନାଥଙ୍କ ଭଜନ ଶୁଣି ଦେଖଣାହାରୀଙ୍କ କରତାଳିରେ ଉଛୁଳି ପଡିଥିଲା ଶ୍ରୀ ଗୁଣ୍ଡିଚା ମନ୍ଦିର ପରିସର ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
