ସୁବର୍ଣ୍ଣପୁର: କେଉଁ ଅନାଦି କାଳରୁ ଅଷ୍ଟଚଣ୍ଡୀଙ୍କ ମଧ୍ୟରେ ମା’ ସୁରେଶ୍ବରୀଙ୍କର ପରୁହାଁ ଦେବୀ ଭାବରେ ଏକ ସ୍ବତନ୍ତ୍ର ସ୍ଥାନ ରହିଛି। ସୁବର୍ଣ୍ଣପୁର ଜିଲ୍ଲା ସମେତ ବୌଦ୍ଧ ଜିଲ୍ଲାର ପଞ୍ଚରା ଅଞ୍ଚଳରେ ଇଷ୍ଟଦେବୀ ଭାବେ ପ୍ରତିଟି ପର୍ବପର୍ବାଣୀ ଯାନିଯାତ୍ରାରେ ଅଗ୍ରଦେବୀ ରୂପରେ ପୂଜା ପାଆନ୍ତି ମା’ । ଅଷ୍ଟଚଣ୍ଡୀଙ୍କ ମଧ୍ୟରେ ଦକ୍ଷିଣମୁହାଁ ଭାବେ ପ୍ରତିଷ୍ଠିତା ଦେବୀଙ୍କର ଐତିହାସିକ ବଳିଯାତ୍ରାରେ ଏକ ପ୍ରମୁଖ ଭୂମିକା ରହିଛି। ପ୍ରତିବର୍ଷ ଆଶ୍ବିନ ମହାଳୟାରୁ ପୂର୍ଣ୍ଣିମା ଯାଏଁ 16 ଦିନ ଧରି ପାଳିତ ହେଉଥିବା ବଳିଯାତ୍ରାରେ ମହାଳୟାରୁ ପୂର୍ଣ୍ଣିମା ଯାଏଁ ବିଭିନ୍ନ ବେଶ ଧାରଣ କରି ଶ୍ରଦ୍ଧାଳୁମାନଙ୍କୁ ଦର୍ଶନ ଦେଇଥା’ନ୍ତି।
କିମ୍ବଦନ୍ତୀ ଅନୁସାରେ ଭଗବାନ ପର୍ଶୁରାମ କ୍ଷତ୍ରୀୟ ବଂଶ ନିପାତ କରି ସେ ରୁଧିର ସବୁ ମା ସୁରେଶ୍ବରୀଙ୍କ ଏହି ପୀଠର ଏକ ଗାତରେ ଅର୍ପଣ କରିଥିଲେ । ଯାହାର ପ୍ରମାଣ ବର୍ତ୍ତମାନ ମଧ୍ୟ ଖଉଲ ଗାତ ଭାବେ ଦେବୀଙ୍କ ପୀଠରେ ରହିଛି । ଯାହାକୁ ଦେଖିବା ପାଇଁ ହଜାର ହଜାର ଶ୍ରଦ୍ଧାଳୁଙ୍କ ଭିଡ ଜମିଥାଏ । ବରୁଆ ନାଭିରେ ଏହି ତାନ୍ତ୍ରିକ ମାଟିର ପ୍ରୟୋଗରେ ଦୈବୀ ଶକ୍ତି ପ୍ରକଟିତ ହୋଇଥାଏ । ରାଜ ପୁରୋହିତ ମା ସୁରେଶ୍ବରୀଙ୍କୁ ସ୍ମରଣ କରି ତାନ୍ତ୍ରିକ ପଦ୍ଧତିରେ ଯନ୍ତ୍ରାରୂଢ଼ ବରୁଆକୁ ମନ୍ତ୍ରପୁତ କରି ଦୈବୀ ଶକ୍ତି ପ୍ରକଟିତ କରିଥାନ୍ତି ବିଶ୍ବାସ ରହିଛି।
ଐତିହାସିକ ବଳିଯାତ୍ରା ସମୟରେ ଦେବୀଙ୍କ ଦର୍ଶନ ପାଇଁ ଭକ୍ତଙ୍କର ପ୍ରବଳ ସମାଗମ ହୋଇଥାଏ। ସନ୍ଧ୍ୟା ଆରତୀ ଦର୍ଶନ ସହିତ ଦେବୀ କୃପା ଲାଭ କରିବା ପାଇଁ ବହୁ ଦୂରଦୁରାନ୍ତରୁ ହଜାର ହଜାର ଭକ୍ତ ଛୁଟି ଆସିଥାନ୍ତି ଏହି ପୀଠକୁ। ସୋନପୁର ଗଡଜାତର ଚୌହାନ ଶାସକ ରାଜା ବିରମିତ୍ରଦୋୟ ସିଂହ ଦେବଙ୍କ ଅମଳରୁ ଏହି ଦେବୀ ପୀଠ ଭାରତର ଅନ୍ୟତମ ତନ୍ତ୍ରପୀଠ ଭାବେ ପ୍ରସିଦ୍ଧି ଲାଭ କରିଛି।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
