ସୁବର୍ଣ୍ଣପୁର: ଡ୍ୟାମ ନିର୍ମାଣ ପାଇଁ ଦାବି କଲେ ସୁବର୍ଣ୍ଣପୁର ଚାଷୀ । ସୁବର୍ଣ୍ଣପୁର ସଦର ବ୍ଲକର ରେଙ୍ଗାଲି, ଛୋକରମାଲ ଓ ଲଛିପୁର ପଞ୍ଚାୟତର ଚାଷୀମାନେ ଖୀରଶାଖାଇ ଡ୍ୟାମ ନିର୍ମାଣ ପାଇଁ ଦାବି କରିଛନ୍ତି। ଗତ ଜାନୁଆରୀ 3 ତାରିଖରେ କୃଷି ସମାବେଶରେ ନିଷ୍ପତ୍ତି ନେବା ପରେ ଗୁରୁବାର ଡ୍ୟାମ ନିର୍ମାଣ ପାଇଁ ଜିଲ୍ଲା ପ୍ରଶାସନ ପାଖରେ ଦାବି ଉପସ୍ଥାପନ କରିଛନ୍ତି।
ଏହି ଅଞ୍ଚଳରେ ଥିବା ଅଙ୍ଗ କେନାଲରୁ ପର୍ଯ୍ୟାପ୍ତ ଜଳସେଚନ ବ୍ୟବସ୍ଥା ହୋଇ ପାରୁ ନାହିଁ । ଫଳରେ ବାରପାହାଡ଼ ଜଙ୍ଗଲର ବିଜା ଡୁଙ୍ଗୁରି ଓ ସୁରୁ ଡୁଙ୍ଗୁରିକୁ ନେଇ ଏକ ଜଳସେଚନ ପ୍ରକଳ୍ପ ତିଆରି କଲେ ଆଞ୍ଚଳିକ ଜଳସେଚନ ସମସ୍ୟାର ସମାଧାନ ହୋଇ ପାରିବ ବୋଲି ଚାଷୀମାନେ କହିଛନ୍ତି ।
ଏହି ଜଳସେଚନ ପ୍ରକଳ୍ପରୁ 17 ଖଣ୍ଡ ମୌଜାର ଚାଷ ଜମିକୁ ପାଣି ମଡା ଯାଇ ପାରିବ ବୋଲି ଚାଷୀମାନେ ଆକଳନ କରିଛନ୍ତି । ତେବେ ଚାଷୀଙ୍କ ସ୍ଵାର୍ଥ ଦୃଷ୍ଟିରୁ ଏହି ପ୍ରକଳ୍ପ ପାଇଁ ଜିଲ୍ଲା ପ୍ରଶାସନ ସରକାରଙ୍କ ପାଖରେ ଦାବି କରି ଆବଶ୍ୟକ ପ୍ରଶାସନିକ ପଦକ୍ଷେପ ନେବା ପାଇଁ ଜିଲ୍ଲାପାଳ ମନୀଷା ବାନାର୍ଜୀଙ୍କୁ ଏକ ସ୍ମାରକପତ୍ର ପ୍ରଦାନ କରିଛନ୍ତି।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
