ସୁବର୍ଣ୍ଣପୁର: ଓଡ଼ିଶାର ବିପର୍ଯ୍ୟସ୍ତ ଶିକ୍ଷା, ସୁରକ୍ଷା, ଆଇନ ଶୃଙ୍ଖଳାକୁ ବିରୋଧ କରି ବିକ୍ଷୋଭ ପ୍ରଦର୍ଶନ କରିଛି ଏଭିବିପି । ସରକାର ଶିକ୍ଷାର ଉନ୍ନତି ଘଟିଥିବା ନେଇ ଢିଣ୍ଡିମ ପିଟୁଥିବା ବେଳେ ପ୍ରକୃତରେ ଏହା ଛାତ୍ରଛାତ୍ରୀଙ୍କ ନିକଟରେ ପହଞ୍ଚି ପାରୁନି । ସରକାରୀ କଲେଜମାନଙ୍କରେ ଅଣଛାତ୍ରଙ୍କ ପ୍ରଭାବ ବେଶି ରହୁଥିବା ଅଭିଯୋଗ କରିଛି ଏଭିବିପି । ଯାହାକୁ ନେଇ ସୁବର୍ଣ୍ଣପୁର ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ ସୁବର୍ଣ୍ଣପୁର ଜିଲ୍ଲା ଶାଖା ପକ୍ଷରୁ ଜିଲ୍ଲାପାଳଙ୍କ କାର୍ଯ୍ୟାଳୟ ଆଗରେ ଧାରଣା ଦିଆଯାଇଛି । ଅଖିଳ ଭାରତୀୟ ବିଦ୍ୟାର୍ଥୀ ପରିଷଦର ରାଷ୍ଟ୍ରୀୟ କାର୍ଯ୍ୟକାରିଣୀ ସଦସ୍ୟ ନିକୁଞ୍ଜ ବିହାରୀ ପଣ୍ଡାଙ୍କ ନେତୃତ୍ବରେ ଶତାଧିକ ଛାତ୍ର ଏହି ଆନ୍ଦୋଳନରେ ସାମିଲ ହୋଇଛନ୍ତି । ଶିକ୍ଷା,ସୁରକ୍ଷା ଓ ରୋଜଗାରକୁ ନେଇ ଏହି ଆନ୍ଦୋଳନ କରାଯାଇଛି ।
ନିକୁଞ୍ଜ ବିହାରୀ ପଣ୍ଡା କହିଛନ୍ତି, ‘‘ଶିକ୍ଷା ବ୍ୟବସ୍ଥାରେ ବିଭିନ୍ନ ବ୍ୟତିକ୍ରମ ଦେଖା ଦେଲାଣି । ମାଟ୍ରିକ୍ ପରୀକ୍ଷାରେ ୧୫ ହଜାରରୁ ଊର୍ଦ୍ଧ୍ବ ପିଲା ପରୀକ୍ଷା ନଦେବା ରାଜ୍ୟ ସରକାରଙ୍କ ବିଫଳତାକୁ ନେଇ ସଙ୍କେତ ଦେଉଛି । ରାଜ୍ୟରେ ଶତାଧିକ ଅଧ୍ୟାପକ ପଦବୀ ଖାଲି ରାଜ୍ୟର ବିପର୍ଯ୍ୟସ୍ତ ଶିକ୍ଷା ସ୍ଥିତିକୁ ଦର୍ଶାଉଛି । ସୁବର୍ଣ୍ଣପୁରରେ ଜିଲ୍ଲାର ଏକମାତ୍ର ମହାବିଦ୍ୟାଳୟକୁ ସ୍ବୟଂ ଶାସିତ ମହାବିଦ୍ୟାଳୟରେ ପରିଣତ କରିବା ସରକାରୀ ମାନ୍ୟତା ପ୍ରଦାନ କରିବା ଆମ ପ୍ରମୁଖ ଦାବି ରହିଛି । ଏହାସହ ମହାବିଦ୍ୟାଳୟ ଗୁଡିକରେ ଖାଲି ପଡିଥିବା ପଦପଦବୀ ପୂରଣ କରିବା, ପିଇବା ପାଣି,ସାଇକେଲଷ୍ଟାଣ୍ଡ, କମନରୁମ ଆଦି ତିଆରି କରି ସ୍ବୟଂ ସଂପୂର୍ଣ୍ଣ ମହାବିଦ୍ୟାଳୟରେ ପରିଣତ କରିବା ଉପରେ ପ୍ରାଧାନ୍ୟ ଦିଆଯିବ । ଛାତ୍ରଛାତ୍ରୀମାନଙ୍କୁ କ୍ୟାମ୍ପସ ବାହରେ ଓ କ୍ୟାମ୍ପସ ପରିସରରେ ସୁରକ୍ଷା ପ୍ରଦାନ କରିବା ଆଦି ଦାବି କରିଛନ୍ତି ।’’
ଏବିଭିପିର ଅନ୍ୟ ଏକ ସଦସ୍ୟ କହିଛନ୍ତି,‘‘ ସରକାର ଗୋଟିଏ ଗୋଟିଏ ଜିଲ୍ଲାରେ ଚାରୋଟି ପାଞ୍ଚଟି ସ୍ବୟଂ ଶାସିତ ମହାବିଦ୍ୟାଳୟ ଓ ବିଶ୍ବ ବିଦ୍ୟାଳୟ ଖୋଲା ଯାଇଛି । ମାତ୍ର ସୁବର୍ଣ୍ଣପୁର ପରି ଏକ ଅନୁନ୍ନତ ଓ ଅନଗ୍ରସର ଜିଲ୍ଲାରେ ଗୋଟିଏ ବି ମହାବିଦ୍ୟାଳୟକୁ ସରକାରୀ ମାନ୍ୟତା ପ୍ରଦାନ ନ କରିବା ରାଜ୍ୟ ସରକାରଙ୍କ ବିଫଳତା । ଯାହା ରାଜ୍ୟ ସରକାରଙ୍କ ସୁବର୍ଣ୍ଣପୁର ପ୍ରୀତିକୁ ପଦାରେ ପକାଇଛି ବୋଲି ଅଭିଯୋଗ କରିଛନ୍ତି । ଦାବି ପୂରଣ ପାଇଁ ରାଜ୍ୟପାଳଙ୍କ ଉଦ୍ଦେଶ୍ୟରେ ଏକ ସ୍ମାରକପତ୍ର ପ୍ରଦାନ କରାଯାଇଛି । ତେବେ ଏହି ସବୁ ବିଷୟକୁ ନିଜେ ମୁଖ୍ୟମନ୍ତ୍ରୀ ଧ୍ୟାନ ଦେଇ ସମାଧାନ କରନ୍ତୁ ନହଲେ ଗାଦି ଛାଡିଦିଅନ୍ତୁ ।’’ ଅନ୍ୟଥା ସରକାରଙ୍କ ବିରୋଧରେ ରାଜ୍ୟର ବିଭିନ୍ନ ସ୍ଥାନରେ ଆନ୍ଦୋଳନ କରାଯିବ ବୋଲି ଚେତାବନୀ ଦେଇଛି ସଂଘ।
ଇଟିଭି ଭାରତ, ସୁବର୍ଣ୍ଣପୁର
