ସୁବର୍ଣ୍ଣପୁର: ସହରର ଇଷ୍ଟ ଦେବୀ ମା' ସୁରେଶ୍ବରୀ ଆଜି ବିଜୟା ଦଶମୀରେ ରାଜ ରାଜେଶ୍ବରୀ ବେଶରେ ଦର୍ଶନ ଦେଇଛନ୍ତି । ଆଜି ସକାଳୁ ଏହି ଦେବୀ ପୀଠରେ ଶ୍ରଦ୍ଧାଳୁଙ୍କ ଭିଡ ଦେଖିବାକୁ ମିଳିଥିଲା । ଶୃଙ୍ଖଳିତ ଦର୍ଶନ ପାଇଁ ମନ୍ଦିର କମିଟି ଓ ଦେବୋତ୍ତର ବିଭାଗ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଥିଲା ।
ଦେବୀ ମା'ଙ୍କ ବେଶ ଦର୍ଶନ କରିବା ସହିତ ସନ୍ଧ୍ୟା ଆରତୀ ଦେଖିବାକୁ ଲୋକାରଣ୍ୟ ହୋଇ ପଡ଼ିଥିଲା ମନ୍ଦିର ପରିସର । ଦେବୀମା' ଆଜି ସୋମବାର ରାଜରାଜେଶ୍ବରୀ ବେଶ ଧାରଣ କରି ଶ୍ରଦ୍ଧାଳୁଙ୍କୁ ଦର୍ଶନ ଦେଇଥିବା ବେଳେ ମହାଳୟାରୁ ଆରମ୍ଭ କରି ଆଜିଯାଏଁ ବିଭିନ୍ନ ବେଶ ଧାରଣ କରିଥିଲେ । ପ୍ରଥମେ ଦେବୀ ଧବଳମୁଖୀ ବେଶରେ ଦର୍ଶନ ଦେବା ପରେ ଆଜିଯାଏଁ ଦେବୀଙ୍କ ତାରା, ଷୋଡଶୀ, ଭୈରବୀ, କାଳୀ ,ଭୁବନେଶ୍ଵରୀ, ଧୂମାବତୀ, ମହିଷମର୍ଦ୍ଦିନୀ, ଜୟଦୁର୍ଗା ଆଦି ବେଶରେ ଦର୍ଶନ ଦେଇଛନ୍ତି ।
ଦେବୀଙ୍କ ବେଶ ଦେଖିବା ପାଇଁ ଆଜି ଲକ୍ଷାଧିକ ଭକ୍ତଙ୍କର ସମାଗମ ହୋଇଥିଲା । ନବମୀ ବଳୀରେ ସାମିଲ ହେବା ସହିତ ଦେବୀଙ୍କ ବେଶ ଦର୍ଶନ ପାଇଁ ଶ୍ରଦ୍ଧାଳୁମାନେ ବହୁ ଦୂର ଦୁରାନ୍ତରୁ ଏହି ଦେବୀ ପୀଠରେ ପହଞ୍ଚିଥିଲେ ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
