ସୁବର୍ଣ୍ଣପୁର: ସହରର ଭଗବତୀପ୍ଳଟ ପଡାବାସୀ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଛନ୍ତି । ଅଜିତ କୁମାର ମିଶ୍ରଙ୍କ ନେତୃତ୍ବରେ ଶତାଧିକ ଜନସାଧାରଣ ଏକ ଶୋଭାଯାତ୍ରାରେ ବାହାରି ସହର ପରିକ୍ରମା କରି ଜିଲ୍ଲାପାଳଙ୍କ କାର୍ଯ୍ୟାଳୟରେ ପହଞ୍ଚିଥିଲେ । ଭଗବତୀ ମନ୍ଦିର ସମ୍ମୁଖରେ ଥିବା ୱାର୍ଡ ନଂ-14 ର ପୁରାତନ ବସ୍ତି ବାସିନ୍ଦାଙ୍କୁ ବାସଗୃହ ପଟ୍ଟା ଓ ଉନ୍ନତ ବାସଗୃହ ଯୋଗାଇ ଦେବା ପାଇଁ ଏହି ଆନ୍ଦୋଳନ କରିଛନ୍ତି ।
ଓଡିଶା ଭୂସଂସ୍କାର ଆଇନ 2017 ଅନୁଯାୟୀ ଏହି ବସ୍ତି ବାସିନ୍ଦାଙ୍କ ଦାବି ପୂରଣ କରିବା ପାଇଁ ଭଗବତୀପ୍ଲଟର ଜନସାଧାରଣ ଜିଲ୍ଲା ପ୍ରଶାସନର ଦୃଷ୍ଟି ଆକର୍ଷଣ କରିଛନ୍ତି । ଗତ ତିନି ଦଶନ୍ଧିରୁ ଅଧିକ ସମୟ ଧରି ଭଗବତୀ ମନ୍ଦିର ସାମ୍ନାରେ ଥିବା ସରକାରୀ ଯାଗାରେ କିଛି ପରିବାର ରହି ଆସୁଛନ୍ତି । ସରକାରଙ୍କ ଦ୍ବାରା ନିଯୁକ୍ତ ଉଷା ସର୍ଭେ ବସ୍ତି ଅଞ୍ଚଳକୁ ସର୍ଭେ କରିବା ସହିତ ବାସଗୃହ ନମ୍ବରିଂ କରି ଜମି ମାପ କରିଥିଲେ ।
ପଟ୍ଟା ପ୍ରଦାନ ପାଇଁ ଭଗବତୀପ୍ଲଟର ଜନସାଧାରଣ ପୌର ପରିଷଦ କାର୍ଯ୍ୟ ନିର୍ବାହୀ ଅଧିକାରୀଙ୍କ ବାରମ୍ବାର ଦୃଷ୍ଟି ଆକର୍ଷଣ କରିଛନ୍ତି । ଏପରିକି ରାଜ୍ୟ ସରକାରଙ୍କ ଜାଗା ମିଶନ ଯୋଜନାରେ ଏମାନଙ୍କୁ ପଟ୍ଟା ପ୍ରଦାନ କରିବା ପାଇଁ ପୌର ପରିଷଦ ଜନସାଧାରଣ ଦାବୀ ଉପସ୍ଥାପନ କରିଥିଲେ । ହେଲେ ପୌର ପରିଷଦ କର୍ତ୍ତୃପକ୍ଷ ଆବଶ୍ୟକ କାର୍ଯ୍ୟାନୁଷ୍ଠାନ ନ ନେବାରୁ ବାଧ୍ୟହୋଇ ଜନସାଧାରଣ ରାଜରାସ୍ତାକୁ ଓହ୍ଲାଇଛନ୍ତି । ବସ୍ତି ବାସିନ୍ଦାଙ୍କୁ ଏଲ ଆର ସି ପଟ୍ଟା ପ୍ରଦାନ କରିବା ସହିତ ପି ଏମ ଏ ୱାଇ ଯୋଜନାରେ ବାସଗୃହ ଯୋଗାଇ ଦେବା ପାଇଁ ଦାବୀ କରିଛନ୍ତି । ଜମିହୀନ ଏହି ପରିବାର ଗୁଡିକୁ ତୁରନ୍ତ ବାସଗୃହ ପଟ୍ଟା ପ୍ରଦାନ କରିବା ପାଇଁ ଜନସାଧାରଣ ଜିଲ୍ଲାପାଳଙ୍କୁ ଏକ ସ୍ମାରକ ପତ୍ର ପ୍ରଦାନ କରିଛନ୍ତି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା , ଇଟିଭି ଭାରତ
