ସୁବର୍ଣ୍ଣପୁର: ଜିଲ୍ଲା ମୁଖ୍ୟ ଚିକିତ୍ସାଳୟରେ ବିପର୍ଯ୍ୟସ୍ତ ହୋଇପଡିଛି ସ୍ବାସ୍ଥ୍ୟସେବା । ବର୍ଷ ସାରା ଡାକ୍ତର ଓ ବିଶେଷଜ୍ଞ ଡାକ୍ତରଙ୍କ ଅଭାବ ସାଙ୍ଗକୁ ଷ୍ଟାଫ ନର୍ସ ଓ ଅନ୍ୟାନ୍ୟ ପଦପଦବୀ ଖାଲି ରହିଛି । ଆବଶ୍ୟକ ଭିତ୍ତିଭୂମି ନଥିବାରୁ ଚିକିତ୍ସାଳୟ ବାରଣ୍ଡାରେ ନବଜାତ ଶିଶୁ ଶୋଇଥିବା ଦେଖିବାକୁ ମିଳିଛି ।
ଚିକିତ୍ସାଳୟରେ ସବୁ ସମୟରେ ଶଯ୍ୟାର ଅଭାବ ପରିଲକ୍ଷିତ ହେଉଛି । ଫଳରେ ବାଧ୍ୟ ହୋଇ ରୋଗୀମାନେ ବାରଣ୍ଡାରେ ଚିକିତ୍ସିତ ହେଉଛନ୍ତି । ସେହିପରି ବିଶ୍ରାମ କକ୍ଷ ଅଭାବରୁ ରୋଗୀଙ୍କ ସମ୍ପର୍କୀୟମାନେ ଡାକ୍ତରଖାନା ବାରଣ୍ଡାରେ ବିଶ୍ରାମ ନେବାକୁ ବାଧ୍ୟ ହେଉଛନ୍ତି । ଖାଲି ଏତିକି ନୁହେଁ ଦିବ୍ୟାଙ୍ଗଙ୍କ ପାଇଁ ହ୍ବିଲ ଚେୟାର ଅଭାବ ରହିଛି । ଫଳରେ ଏଭଳି ରୋଗୀଙ୍କୁ ସେମାନଙ୍କ ସମ୍ପର୍କୀୟ ଡାକ୍ତରଖାନା ଭିତରକୁ ବୋହି ନେଉଛନ୍ତି । ଚିକିତ୍ସାଳୟରେ ଯେଉଁ ଦୁଇ ତିନୋଟି ହ୍ବିଲ ଚେୟାର ରହିଛି ସେସବୁ ମରାମତି ଅଭାବରୁ ବ୍ୟବହାର ହୋଇ ପାରୁନାହିଁ ।
ଅନ୍ୟପକ୍ଷେ ଚିକିତ୍ସାଳୟରେ ସାଲାଇନ ଷ୍ଟାଣ୍ଡର ବି ଅଭାବ ରହିଛି । ଫଳରେ ରୋଗୀଙ୍କ ଶଯ୍ୟା ନିକଟରେ କଣ୍ଟାରେ ଅବା ଝରକାରେ ସାଲାଇନ ବୋତଲ ଝୁଲେଇବାକୁ ପଡୁଛି । ଏନେଇ ରୋଗୀଙ୍କ ସମ୍ପର୍କୀୟମାନେ ଯେତେ ଯାହା ଆପତ୍ତି କଲେ ମଧ୍ୟ କେହି ଶୁଣୁ ନଥିବା ଅଭିଯୋଗ ହେଉଛି । ନିକଟରେ ଜିଲ୍ଲାପାଳ ମନୀଷା ବାନାର୍ଜୀ ମୁଖ୍ୟ ଚିକିତ୍ସାଳୟ ପରିଦର୍ଶନ ସମୟରେ ଗଣମାଧ୍ୟମ ପକ୍ଷରୁ ଏହି ସମସ୍ୟାର ଦୃଷ୍ଟି ଆକର୍ଷଣ କରାଯାଇଥିଲା । ତେବେ ଜିଲ୍ଲାପାଳଙ୍କ ନିର୍ଦ୍ଦେଶ ସତ୍ତ୍ବେ ଏଯାଏଁ ସମସ୍ୟାର ସମାଧାନ ହୋଇନାହିଁ ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା ,ଇଟିଭି ଭାରତ
