ସୁବର୍ଣ୍ଣପୁର: ସହରର ବସଷ୍ଟାଣ୍ଡ ନିକଟ ଶୌଚାଳୟରୁ ଏକ ୧୦ ବର୍ଷୀୟ ନାବାଳକ ଉଦ୍ଧାର ହୋଇଛି । ମାଆର ଫେରିବା ବାଟକୁ ଚାହିଁ ଘଣ୍ଟା ଘଣ୍ଟା ବିତିଗଲା ହେଲେ ମାଆ ଫେରିଲା ନାହିଁ । ଦିନ ଯାଇ ରାତି ହେଲା କିନ୍ତୁ ମା ଆସିଲା ନାହିଁ । ବସଷ୍ଟାଣ୍ଡ ସ୍ଥିତ ଶୌଚାଳୟର ପ୍ରବେଶ ଦ୍ବାରରେ ଚାତକ ଭଳି ମାକୁ ଚାହିଁ ରହିଥିଲା ପୁଅ । ଏଭଳି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ସୁବର୍ଣ୍ଣପୁର ସହରରେ ।
ନାବାଳକର କହିବା ଅନୁସାରେ ତାଙ୍କ ଘର ବୌଦ୍ଧ ଜିଲ୍ଲା ସୁଲିଆ ଗାଁରେ। ପିଲାଟିର ମା ତାକୁ ଧରି ସମ୍ପକୀୟଙ୍କ ସହିତ ସୁବର୍ଣ୍ଣପୁର ସହରରେ ପହଞ୍ଚିଥିଲେ । ସେମାନେ ଏକ ସ୍କୁଟି ନମ୍ବର (OD27B5224)ରେ ଆସିଥିବା ଜଣାପଡିଛି । ଦୁହେଁ ମେଡିକାଲରୁ ଆସୁଛୁ କହି ପୁଅକୁ ଶୌଚାଳୟରେ ଛାଡି ମା’ କେଉଁ ଆଡେ ପଳାଇ ଯାଇଥିବା ଜଣାପଡିଛି । ରାତି ଯାଇ ସକାଳ ହୋଇଥିଲା ହେଲେ ପିଲାଟିର ମାଆ ଫେରି ନଥିଲେ ।
ରାତିରେ କିଛି ବୁଦ୍ଧିଜୀବୀ ଓ ଗଣମାଧ୍ୟମ ପ୍ରତିନିଧି ଘଟଣାସ୍ଥଳରେ ପହଞ୍ଚି ଚାଇଲ୍ଡ ଲାଇନକୁ ଖବର ଦେଇଥିଲେ । ଚାଇଲ୍ଡ ଲାଇନ କର୍ମକର୍ତ୍ତାଙ୍କ ସହ ସୋନପୁର ପୋଲିସ ପହଞ୍ଚି ଗାଡି ଜବତ କରିବା ସହ ବାଳକକୁ ଉଦ୍ଧାର କରିଛି । ନାବାଳକ ଜଣକ ଚତୁର୍ଥ ଶ୍ରେଣୀର ଛାତ୍ର । ନାବାଳକର କହିବା ଅନୁସାରେ ମାଙ୍କ ନାମ ଗୀତାଞ୍ଜଳି ମହାପାତ୍ର ଓ ବାପା ଡମ୍ବରୁ ଧର ସାହୁ ବୋଲି ଜଣାପଡିଛି ।
ସୁବର୍ଣ୍ଣପୁରରୁ ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା ,ଇଟିଭି ଭାରତ
