ସୁବର୍ଣ୍ଣପୁର: ମାଟ୍ରିକ ପରୀକ୍ଷା ଫଳାଫଳ ପ୍ରକାଶ ପାଇବା ପରେ ସୁବର୍ଣ୍ଣପୁର ଜିଲ୍ଲାରେ ମଧ୍ୟ ଅସନ୍ତୋଷ ପ୍ରକାଶ ପାଇଥିବା ଦେଖିବାକୁ ମିଳିଛି । ବିଦ୍ୟାଳୟରେ ହୋଇଥିବା ପୂର୍ବବର୍ତ୍ତୀ ପରୀକ୍ଷାର ମାର୍କ ବୋର୍ଡ କର୍ତ୍ତୃପକ୍ଷଙ୍କ ପାଖରେ ତ୍ରୁଟି ବିହୀନ ଭାବେ ସ୍କୁଲ କର୍ତ୍ତୃପକ୍ଷ ଦାଖଲ କରି ନ ଥିବା ଅଭିଯୋଗ କରିଛନ୍ତିି ଅଭିଭାବକ ।
ଚଳିତ ବର୍ଷ ମାଟ୍ରିକ ପରୀକ୍ଷାରେ ଉତ୍ତୀର୍ଣ୍ଣ ହୋଇଥିବା ଅସନ୍ତୁଷ୍ଟ ଛାତ୍ରଛାତ୍ରୀ ଜିଲ୍ଲା ଶିକ୍ଷାଧିକାରୀଙ୍କ ଆଗରେ ନିଜ ଦାବି ଉପସ୍ଥାପନ କରିଛନ୍ତି । ଚଳିତ ବର୍ଷ ମହାମାରୀ କୋରୋନା ଯୋଗୁଁ ଛାତ୍ରଛାତ୍ରୀ ମାଟ୍ରିକ ପରୀକ୍ଷା ଦେଇପାରି ନ ଥିବାବେଳେ ଗତ ବର୍ଷର ସ୍କୁଲ ପରୀକ୍ଷାରେ ପ୍ରଦର୍ଶନ ଆଧାରରେ ପିଲାମାନଙ୍କୁ ମାଟ୍ରିକ ଫଳାଫଳ ପ୍ରଦାନ କରାଯାଇଛି । ତେବେ ଛାତ୍ରଛାତ୍ରୀଙ୍କୁ ମିଳିଥିବା ମାର୍କରେ ସେମାନେ ସନ୍ତୁଷ୍ଟ ନ ଥିବାରୁ ଅଧିକ ମାର୍କ ପାଇଥାନ୍ତେ ବୋଲି ଅଭିଯୋଗ କରିଛନ୍ତି ।
ତେବେ ଅସନ୍ତୁଷ୍ଟ ଛାତ୍ରଛାତ୍ରୀ ଆଗକୁ ପରୀକ୍ଷା ଦେଇ ପାରିବେ ବୋଲି ଘୋଷଣା ହେବା ପରେ ମଧ୍ୟ ଛାତ୍ରଛାତ୍ରୀ ଓ ଅଭିଭାବକଙ୍କ ଅସନ୍ତୋଷ କମ ନାହିଁ । ବିଦ୍ୟାଳୟରେ ହୋଇଥିବା ପୂର୍ବ ପରୀକ୍ଷାର ମାର୍କ ତ୍ରୁଟି ବିହୀନ ଭାବେ ବୋର୍ଡ କର୍ତ୍ତୃପକ୍ଷଙ୍କ ପାଖରେ ପୁଣିଥରେ ଦାଖଲ କରିବାକୁ ଦାବି କରିଛନ୍ତି ଉଭୟ ଛାତ୍ରଛାତ୍ରୀ ଓ ଅଭିଭାବକ । ଜିଲ୍ଲା ଶିକ୍ଷାଧିକାରୀ ଅସନ୍ତୁଷ୍ଟ ଛାତ୍ରଛାତ୍ରୀ ଆଗକୁ ପରୀକ୍ଷା ଦେଇ ପାରିବେ ଓ ପୁରୁଣା ମାର୍କ ତ୍ରୁଟି ବିହୀନ ଭାବେ ଦାଖଲ କରାଯାଇଥିବା ଛାତ୍ରଛାତ୍ରୀଙ୍କୁ ସ୍ପଷ୍ଟୀକରଣ ଦେବା ପରେ ମଧ୍ୟ ଛାତ୍ରଛାତ୍ରୀ ଓ ଅଭିଭାବକମାନେ ମାଧ୍ୟମିକ ଶିକ୍ଷା ବୋର୍ଡର ଏପରି ନିଷ୍ପତ୍ତିକୁ ଗ୍ରହଣ କରି ପାରି ନାହାନ୍ତି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା,ଇଟିଭି ଭାରତ
