ସୁବର୍ଣ୍ଣପୁର: ସହରର ଶ୍ରୀବଡ଼ ଜଗନ୍ନାଥ ରବିବାର ଦିନ କୃଷ୍ଣ ବେଶରେ ଶ୍ରଦ୍ଧାଳୁଙ୍କୁ ଦର୍ଶନ ଦେଇଛନ୍ତି । ସେହିପରି ଶ୍ରୀବଳଭଦ୍ର ବଳରାମ ବେଶ ଧାରଣ କରିବେ । ସୋମବାର ଶ୍ରୀବଡ଼ ଜଗନ୍ନାଥ ବୁଦ୍ଧ ବେଶ ଧାରଣ କରି ଶ୍ରଦ୍ଧାଳୁଙ୍କୁ ଦର୍ଶନ ଦେବେ ।
ସୋନପୁର ଗଡଜାତ ଜଗନ୍ନାଥ ସଂସ୍କୃତି ଇତିହାସରେ ପ୍ରଥମ ଥର ପାଇଁ ବେନି ଭାଇ ଶ୍ରୀମନ୍ଦିର ପରିସରରେ ବିଭିନ୍ନ ବେଶ ଧାରଣ କରି ଶ୍ରଦ୍ଧାଳୁଙ୍କୁ ଦର୍ଶନ ଦେଉଛନ୍ତି । ପ୍ରତିବର୍ଷ ବିଗ୍ରହମାନେ ଶ୍ରୀଗୁଣ୍ଡିଚାରେ ବିଭିନ୍ନ ବେଶ ଧାରଣ କରି ଶ୍ରଦ୍ଧାଳୁମାନଙ୍କୁ ଦର୍ଶନ ଦେଇଥାନ୍ତି । ହେଲେ ଏଥର କୋରୋନା ପାଇଁ ଶ୍ରୀମନ୍ଦିରରେ ଏକ ନବ ନିର୍ମିତ ସିଂହାସନରେ ବେନି ଭାଇ ଭଉଣୀ ଦେବୀ ସୁଭଦ୍ରାଙ୍କ ସହିତ ଅବସ୍ଥାନ କରିଛନ୍ତି । ଦେବୋତ୍ତର ବିଭାଗ ପକ୍ଷରୁ ବେଶ ଦର୍ଶନ କରିବା ପାଇଁ ଭକ୍ତଙ୍କୁ ବାରଣ କରାଯାଇଛି । ହେଲେ ଭକ୍ତଙ୍କ ମନ ବୁଝୁନି । ପୂଜା ଥାଳି ଧରି ପହଞ୍ଚି ଯାଉଛନ୍ତି ବେନି ଭାଇଙ୍କ ବେଶ ଦର୍ଶନ କରିବା ପାଇଁ । ରବିବାର ଶ୍ରଦ୍ଧାଳୁମାନେ ସାମାଜିକ ଦୂରତ୍ବ ରକ୍ଷା କରି ବେଶ ଦର୍ଶନ କରିଥିଲେ । ସେହିପରି ସେବାୟତମାନେ ବି ସାମାଜିକ ଦୂରତ୍ବ ରକ୍ଷା ଓ ମାସ୍କ ଉପରେ ବେଶ ଯତ୍ନବାନ ଥିଲେ ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
