ସୁବର୍ଣ୍ଣପୁର: ପୂଜା ନାଁରେ ଦିନ ଦ୍ବିପ୍ରହରରେ ଠକେଇ ଘଟଣା । ସମ୍ପୃକ୍ତ ଘଟଣାରେ ଅଭିଯୁକ୍ତକୁ ଗିରଫ କରିବାରେ ସଫଳ ହୋଇଛି ସୁବର୍ଣ୍ଣପୁର ଜିଲ୍ଲା ଟାଉନ ଥାନା ପୋଲିସ । ସୂଚନା ଅନୁଯାୟୀ ହରଡଖୋଲ ଗାଁର ସୁକଦେବ କର୍ଣ୍ଣଙ୍କ ଘରେ ଜଣେ ପୂଜକ ପୂଜା କରି ଟଙ୍କା ଓ ସୁନା ଗହଣା ଠକେଇ କରିଥିଲା । ବଲାଙ୍ଗୀର ଜିଲ୍ଲାର ଲୋଇସିଂହା ଥାନା ଅନ୍ତର୍ଗତ କେନ୍ଦୁମୁଣ୍ଡା ଗାଁର ପ୍ରଦୀପ ନାଏକ ଏହି ଠକେଇ କରିଥିବା ଜଣାପଡିଥିଲା ।
ତେବେ ଅଭିଯୋଗକାରୀଙ୍କ ଘରେ ଗଣ୍ଡଗୋଳ ଲାଗି ରହିଥିବାରୁ ଅଭିଯୁକ୍ତ ପ୍ରାୟ 20 ଦିନ ରହି ପୂଜାର୍ଚ୍ଚନା କରିଥିଲା । ଶେଷରେ ସୁବର୍ଣ୍ଣପୁର ରାମେଶ୍ବର ମନ୍ଦିରରେ ଘରେ ଥିବା 6 ଭରି ସୁନା ଗହଣା ଓ 1 ଲକ୍ଷ 20 ହଜାର ଟଙ୍କା ଥୋଇ ପୂଜା କରିଥିଲା । ପରେ ସୁଯୋଗ ନେଇ ପୂଜା ହୋଇଥିବା ସମସ୍ତ ସୁନା ଗହଣା ଓ ଟଙ୍କା ଧରି ଚମ୍ପଟ ମାରିଥିଲା ଠକ ପ୍ରଦୀପ।
ପରେ ଘଟଣା ସମ୍ପର୍କରେ ସୁକଦେବ ପୋଲିସ ପାଖରେ ଲିଖିତ ଭାବେ ଅଭିଯୋଗ କରିଥିଲେ । ଯାହାର 10 ଦିନ ପରେ ଅଭିଯୁକ୍ତକୁ ପୋଲିସ ଗିରଫ କରିବା ସହିତ ସୁନା ଗହଣା ଉଦ୍ଧାର କରିଛି । ସେପଟେ ଅଭିଯୁକ୍ତ ଠକି ନେଇଥିବା ସମସ୍ତ ଟଙ୍କା ଖର୍ଚ୍ଚ କରିଥିବା ବେଳେ କେବଳ ସୁନା ଗହଣା ଉଦ୍ଧାର କରିବାରେ ସଫଳ ହୋଇଛି ପୋଲିସ ।
ଅଭିଯୁକ୍ତ ନିଜ ପରିଚୟ ଗୋପନ ରଖି ସୁକଦେବ ଘରେ ପହଞ୍ଚି ଏସବୁ କାର୍ଯ୍ୟ କରିଥିବା ପୋଲିସ କହିଛି । ଶନିବାର ଅଭିଯୁକ୍ତ ପ୍ରଦୀପକୁ କୋର୍ଟ ଚାଲାଣ କରାଯିବ ବୋଲି ଜିଲ୍ଲା ଆରକ୍ଷୀ ଅଧିକ୍ଷକ ଦେବୀ ପ୍ରସାଦ ଦାସ ସୂଚନା ଦେଇଛନ୍ତି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
