ସୁବର୍ଣ୍ଣପୁର: ସୁବର୍ଣ୍ଣପୁର ଜିଲ୍ଲା ବିନିକା ବ୍ଳକରେ ପଦାରେ ପଡିଛି ପ୍ରଧାନମନ୍ତ୍ରୀ ଆବାସ ଯୋଜନାରେ ଦୁର୍ନୀତି । ବ୍ଳକ ଅଧିକାରୀଙ୍କ ନାଁରେ ଡ୍ରାଫ୍ଟ ଚାର୍ଜ କରାଯାଇଥିବାବେଳେ 5 ଜଣ ସରକାରୀ କର୍ମଚାରୀ ଓ 12 ଜଣ ହିତାଧିକାରୀଙ୍କ ନାଁରେ ବିନିକା ଥାନାରେ ମାମଲା ରୁଜୁ କରାଯାଇଛି । ବ୍ଳକର ଜୁଲୁଣ୍ଡା, ଭଣ୍ଡାର, ବାଉଁଶୁଣୀ ଓ ସିଂହିଯୁବା ପଞ୍ଚାୟତର 12 ଜଣ ଅଯୋଗ୍ୟ ହିତାଧିକାରୀଙ୍କୁ ବେଆଇନ ଭାବେ ସରକାରୀ ନୀତି ନିୟମ ଉଲଂଘନ କରି ଆବାସ ଯୋଜନାରେ ସାମିଲ କରାଯାଇଥିବା ଅଭିଯୋଗ ହୋଇଛି ।
ଏନେଇ ରାଜ୍ୟ ପଞ୍ଚାୟତିରାଜ ବିଭାଗ ପାଖରେ ଅଭିଯୋଗ ହୋଇଥିଲା । ଏହି ଯୋଜନାରେ ବ୍ୟାପକ ପିସି କାରବାର ହୋଇଥିବା ସହିତ ଅଯୋଗ୍ୟ ହିତାଧିକାରୀଙ୍କୁ ଘର ଯୋଗାଇ ଦିଆଯାଇଥିଲା । ପଞ୍ଚାୟତିରାଜ ବିଭାଗ ପକ୍ଷରୁ ପ୍ରଶାସନର ଅଗୋଚରରେ ଏକ ସ୍ବତନ୍ତ୍ର ଦଳ 4ଟି ପଞ୍ଚାୟତକୁ ପରିଦର୍ଶନରେ ଯାଇ ଅନିୟମିତତା ହୋଇଥିବା ପ୍ରମାଣ ପାଇଥିଲେ । ଅନୁସନ୍ଧାନକାରୀ ଦଳ ବିନିକା ବିଡିଓଙ୍କୁ 5 ଜଣ ସରକାରୀ କର୍ମଚାରୀ ଓ 12 ଜଣ ହିତାଧିକାରୀଙ୍କ ନାଁରେ ଥାନାରେ ଲିଖିତ ଏତଲା ପାଇଁ ନିର୍ଦ୍ଦେଶ ଦେଇଥିଲ ।
ତେବେ ବିଡିଓ ଏହି ଅନିୟମିତତାର ଅନୁସନ୍ଧାନ କରି ଆଇନଗତ କାର୍ଯ୍ୟାନୁଷ୍ଠାନ ନେବା ପାଇଁ ଲିଖିତ ଏତଲା ଦେଇଛନ୍ତି । ଏଥିସହ ପୋଲିସ ଏହି ଘଟଣାର ତଦନ୍ତ ଆରମ୍ଭ କରିଥିବା ବେଳେ ଏଯାଏଁ କେହି ଗିରଫ ହୋଇ ନାହାଁନ୍ତି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
