ସୁବର୍ଣ୍ଣପୁର: ବଙ୍ଗୋପସାଗରରେ ଲଘୁଚାପ ଫଳରେ ସୁବର୍ଣ୍ଣପୁରରେ ଢାଳୁଛି ବର୍ଷା । ଗତକାଲି ଠାରୁ ମଝିରେ ମଝିରେ ଘଡଘଡି ସହ ମୂଷଳ ଧାରାରେ ବର୍ଷା ଲାଗିରହିଛି । ତୁହାକୁ ତୁହା ହେଉଥିବା ଏହି ବର୍ଷାରେ ଜନଜୀବନ ସମ୍ପୂର୍ଣ୍ଣ ଅସ୍ତବ୍ୟସ୍ତ ହୋଇପଡିଛି । ଏହାସହ ସହରର ବିଭିନ୍ନ ତଳି ଅଞ୍ଚଳରେ ଆଣ୍ଠୁଏ ଲେଖାଏଁ ପାଣି ଜମି ରହିଛି ।
ବର୍ଷା ଓ ସହରରେ ଜମି ରହିଥିବା ପାଣି ପାଇଁ ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ଅନ୍ୟପଟେ ସହରର ପାତଭାଡ଼ି ,ବ୍ଲକ ଛକ ,ରିଂ ରୋଡ, କୁମ୍ଭାରପଡା ଆଦି ଅଞ୍ଚଳରେ ରାସ୍ତାରେ ପାଣି ଚାଲୁଛି । ଡ୍ରେନ ଗୁଡିକ ଜବରଦଖଲ ଓ ସଫା ହୋଇନଥିବାରୁ ବର୍ଷା ପାଣି ନିଷ୍କାସନ ହୋଇ ପାରୁନାହିଁ । ଡ୍ରେନର ଅପରିଷ୍କାର ପାଣି ମାଡ଼ି ଲୋକେ ବାଧ୍ୟ ହୋଇ ଯିବାଆସିବା କରୁଛନ୍ତି ।
ଏବେ ସୁଦ୍ଧା ଜିଲ୍ଲାର ସୋନପୁର ବ୍ଲକରେ 70 ମିଲିମିଟର, ବିନିକା ରେ 62,3 , ତରଭାରେ 79 ମିଲିମିଟର ବର୍ଷା ପାଣି । ସେହିପରି ଡୁଙ୍ଗୁରିପାଳିରେ 64 ମିଲିମିଟର,ବିରମହରାଜପୁରରେ 54 ଓ ଉଲୁଣ୍ଡା ବ୍ଲକରେ 61 ମିଲିମିଟର ବର୍ଷା ଜଳ ରେକର୍ଡ କରାଯାଇଛି । ବର୍ଷା ଯୋଗୁଁ ଜିଲ୍ଲାର ଆଟ,ବେରନା, ଓ ମାଲ କିସମର ଜମିରେ ବି ପାଣି ଲାଗିଛି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
