ସୁବର୍ଣ୍ଣପୁର: ଜିଲ୍ଲାରେ ମହାମାରୀ କୋରୋନା ଦିନକୁ ଦିନ ତାର କାୟା ବିସ୍ତାର କରିବାରେ ଲାଗିଛି । ପ୍ରଶାସନ ପକ୍ଷରୁ ଏହାକୁ ରୋକିବା ପାଇଁ ଲକଡାଉନ, ସଟଡାଉନ ଓ ରାତ୍ରୀକାଳୀନ କର୍ଫ୍ୟୁ ଜାରି କରାଯାଇଛି । ଏପରିକି ସରକାରୀ କାର୍ଯ୍ୟାଳୟ ଗୁଡିକର ଫାଟକଗୁଡିକୁ ବନ୍ଦ ରଖାଯିବା ସହିତ ଜନସାଧାରଣ ଅନଲାଇନ ମାଧ୍ୟମରେ ଅବା କାର୍ଯ୍ୟାଳୟ ଆଗରେ ଥିବା ଅଭିଯୋଗ ବାକ୍ସରେ ଅଭିଯୋଗ ପତ୍ର ଦାଖଲ କରିବା ପାଇଁ ପ୍ରଶାସନିକ ନିର୍ଦ୍ଦେଶ ରହିଛି । ତେବେ ପ୍ରତି 48 ଘଣ୍ଟାରେ ଅଭିଯୋଗ ବାକ୍ସରୁ ଅଭିଯୋଗ ପତ୍ର ସବୁ ସଂଗ୍ରହ କରି ଆବଶ୍ୟକ ପଦକ୍ଷେପ ନେବାକୁ ଜିଲ୍ଲାପାଳ ମନୀଷା ବାନାର୍ଜୀ ଜିଲ୍ଲାର ସମସ୍ତ ବିଭାଗର ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି ।
କିନ୍ତୁ ଏଠାରେ ଜନସାଧାରଣଙ୍କ ଅଭିଯୋଗ ପତ୍ର ଉପରେ କାର୍ଯ୍ୟାନୁଷ୍ଠାନ ହେଉ ନ ଥିବା ଦେଖିବାକୁ ମିଳିଛି । ଲୋକେ ନିଜ ଅଭିଯୋଗ ପତ୍ର ବିଷୟରେ ପଚାରିଲେ ସରକାରୀ କାର୍ଯ୍ୟାଳୟ ପକ୍ଷରୁ, କାହାକୁ ଅଭିଯୋଗ ପତ୍ର ଦେଇଥିଲେ ବୋଲି ଉତ୍ତର ମିଳୁଛି । ଏପଟେ ଅଭିଯୋଗ ପତ୍ରଗୁଡିକୁ ରଦି କାଗଜ ପରି ଫିଙ୍ଗି ଦିଆଯାଉଥିବା ଲୋକେ ଅଭିଯୋଗ କରିଛନ୍ତି ।
ଅନ୍ୟପଟେ ରାଜସ୍ବ ବିଭାଗଗୁଡିକରେ ଲୋକେ ରାଜସ୍ବ ଅଧିକାରୀଙ୍କ ପାଖକୁ ଯାଇ ନ ପାରି ଅନେକ ସମସ୍ୟାର ସମ୍ମୁଖୀନ ହେଉଥିବା ଦେଖିବାକୁ ମିଳୁଛି । ତେବେ ଜନସାଧାରଣଙ୍କ ଅଭିଯୋଗ ଉପରେ ଜିଲ୍ଲା ପ୍ରଶାସନ ଯତ୍ନବାନ ହେବାକୁ ବରିଷ୍ଠ ଆଇନଜୀବୀ ଶ୍ୟାମା ଓଁ ପ୍ରସାଦ ମିଶ୍ର ଅନୁରୋଧ କରିଛନ୍ତି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
