ସୁବର୍ଣ୍ଣପୁର: ସହରରେ ମହନଦୀରୁ ତେଲନଦୀ ଯାଏଁ ଚାଲିଥିବା ରିଙ୍ଗରୋଡ଼ କାମ ପାଇଁ ପ୍ରଶାସନ ପକ୍ଷରୁ ଜବରଦଖଲ ଉଚ୍ଛେଦ ଅଭିଯାନ ଆରମ୍ଭ ହୋଇଛି । ସରକାରୀ ସ୍ଥାନରେ ଦୀର୍ଘ ଦିନରୁ ଘର କରି ରହି ଆସୁଥିବା ପରିବାରଙ୍କ ବିରୋଧ ସତ୍ତ୍ବେ ପ୍ରଶାସନ ଏହି ଜବରଦଖଲ ଉଚ୍ଛେଦ କରିଛି । ପୂର୍ବରୁ ମହାନଦୀ ଭିତରେ ଜଳସେଚନ ବିଭାଗ ମାଟି ପକାଇ ରାସ୍ତା ତିଆରି କରୁଥିଲା । ହେଲେ ଏବେ ଜିଲ୍ଲା ଗୃହ ଓ ପୂର୍ତ୍ତ ବିଭାଗ ଏହି ରାସ୍ତା କାମ କରୁଥିବା ବେଳେ ମହାନଦୀ ଭିତରେ ମାଟି ପକାଇ ରାସ୍ତା ତିଆରି ନକରି ଢ଼ିପ ସ୍ଥାନରେ ରାସ୍ତା ତିଆରି ପାଇଁ ଜବରଦଖଲ ଉଚ୍ଛେଦ କରାଯାଉଛି।
ଜନସାଧାରଣଙ୍କ ବିରୋଧ ସତ୍ତ୍ବେ ପ୍ରଶାସନ ପକ୍ଷରୁ ବ୍ୟାପକ ପୋଲିସ ଓ ମାଜିଷ୍ଟ୍ରେଟଙ୍କ ଉପସ୍ଥିତିରେ ଉଚ୍ଛେଦ କରାଯାଇଛି। ସଦର ପୌରପରିଷଦ ଓ ତହସିଲଦାରଙ୍କ ଉପସ୍ଥିତିରେ ମହାନଦୀ କୂଳରୁ ଏହି ଉଚ୍ଛେଦ କରାଯାଉଥିବା ବେଳେ ଅପ୍ରୀତିକର ପରିସ୍ଥିତି ଏଡେଇବାକୁ ବ୍ୟାପକ ସୁରକ୍ଷା ଗ୍ରହଣ କରାଯାଇଛି । ଜବରଦଖଲରୁ ଉଚ୍ଛେଦ କରାଯାଉଥିବା ପରିବାରଙ୍କୁ 'ଜାଗା ମିଶନ' ଯୋଜନାରେ ପ୍ରଶାସନ ପକ୍ଷରୁ ଘର ପାଇଁ ଜାଗା ଯୋଗାଇ ଦିଆଯିବ ବୋଲି ରାଜସ୍ବ ବିଭାଗ ପକ୍ଷରୁ ସୂଚନା ମିଳିଛି।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
