ସୁବର୍ଣ୍ଣପୁର: ମାଟି ଫାଟି ଆଁ କରିଛି । ମୁଣ୍ଡରେ ହାତ ମାରି ବସିଛି ଚାଷୀ । ଆଖି ଆଗରେ ସୁନାର ଫସଲ ମରିବାକୁ ବସିଲାଣି । ଆଉ ଏହା ସହ ଚାଷୀର ସୁନେଲି ସ୍ବପ୍ନ ଧିରେ ଧିରେ ଭାଙ୍ଗି ଚୁରମାର ହୋଇଯାଉଛି । କାଳେ ଫସଲ ବଞ୍ଚିଯିବ, ଏହା ଭାବି ନିଜ ସ୍ତରରେ ଉଦ୍ୟମ ବି କରୁଛନ୍ତି ଚାଷୀ ।
ସୁବର୍ଣ୍ଣପୁର ଜିଲ୍ଲାରେ ଚଳିତ ବର୍ଷ ଦେଖାଦେଇଛି ଏପ୍ରକାର ସ୍ଥିତି । ଆଷାଢ ଯାଇ ଶ୍ରାବଣ ହେଲାଣି । ହେଲେ ଟାଙ୍ଗରା ପଡିଛି ଜମି । ଯେଉଁ ସମୟରେ ତଳି ରୁଆ ହେବା କଥା, ଠିକ ସେହି ସମୟରେ ବର୍ଷା ହେବାର ନାଁ ଧରୁନି । ଆଜି ନହେଲେ କାଲି ବର୍ଷା ହେବ, ଏମିତି କିଛି ଆଶାରଖି ନିଜ ଫସଲ ବଞ୍ଚାଇ ରଖିବାକୁ ଚେଷ୍ଟା ଚଳାଇଛନ୍ତି ଚାଷୀ ।
ଚଳିତ ବର୍ଷ ଜିଲ୍ଲାରେ ଏପର୍ଯ୍ୟନ୍ତ 34 ପ୍ରତିଶତ କମ ବର୍ଷା ହୋଇଛି । ଫଳରେ ଅଣଜଳସେଚିତ ବ୍ଲକ ଗୁଡିକରେ ଭୟଙ୍କର ମରୁଡି ସ୍ଥିତି ଦେଖାଦେଲାଣି । ଆଉ ବୋଝ ଉପରେ ନଳିତା ବିଡା ସାଜିଛି ଅଚଳ ଜଳସେଚନ ପ୍ରକଳ୍ପ । ପଡିଆ ପଡିଛି ହେକ୍ଟର ହେକ୍ଟର ଜମି । ଆଗାମୀ 5/6 ଦିନ ଭିତରେ ବର୍ଷା ନହେଲେ ସ୍ଥିତି ସଙ୍ଗୀନ ହେବ ସ୍ବୀକାର କରିଛି ଜିଲ୍ଲା କୃଷି ବିଭାଗ ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ