ସୁବର୍ଣ୍ଣପୁର: ଉଲୁଣ୍ଡା ବ୍ଲକ କୋଟସମଲାଇ ପ୍ରାଥମିକ ସମବାୟ ସମିତିରୁ ରବି ଋତୁର ଧାନ ଉଠୁ ନ ଥିବାରୁ ଚାଷୀମାନେ ଆନ୍ଦୋଳନ ଆରମ୍ଭ କରଛନ୍ତି । ଆଜି ଚାଷୀମାନେ ଜିଲ୍ଲା ପ୍ରଶାସନ ନିକଟରେ ଧାନ ଉଠାଇବାକୁ ଦାବି କରିଛନ୍ତି । ଚାଷୀମାନେ ନିଜ ଉତ୍ପାଦିତ ରବି ଋତୁର ଧାନ ସମିତିରେ ବିକ୍ରି କରିବା ପାଇଁ ଆଣୁଛନ୍ତି । ହେଲେ ପୂର୍ବରୁ କିଣାଯାଇ ଥିବା ଧାନ ଉଠୁ ନ ଥିବାରୁ ସମିତି କର୍ତ୍ତୃପକ୍ଷ ଚାଷୀଙ୍କ ଧାନ ଆଉ କିଣୁ ନାହାନ୍ତି । ଫଳରେ ଚାଷୀମାନେ ଦଲାଲ ପାଖରେ ଧାନ ବିକ୍ରି କରିବା ପାଇଁ ବାଧ୍ୟ ହେଉଛନ୍ତି।
ଆଜି ଚାଷୀମାନେ ଜିଲ୍ଲାପାଳଙ୍କ ସହିତ ସାକ୍ଷାତ କରି ନ ପାରିବାରୁ ଜିଲ୍ଲା ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ଅଧିକାରୀଙ୍କୁ ସାକ୍ଷାତ କରି ନିଜ ଦାବି ଜଣାଇଥିଲେ । ଧାନକୁ ସୁରକ୍ଷା ଦେବା ପାଇଁ ଚାଷୀମାନଙ୍କୁ ପଲିଥିନ ଯୋଗାଇ ଦେବା ପାଇଁ ଦାବି କରିଥିଲେ । ମିଲର୍ସମାନଙ୍କ ଅବହେଳା ଯୋଗୁଁ ଚାଷୀ ନିଜ ଧାନ ବିକ୍ରି କରି ପାରୁନାହାନ୍ତି ବୋଲି ସେମାନେ ଅଭିଯୋଗ କରିଛନ୍ତି ।
ଅପରପକ୍ଷରେ ସମ୍ବଲପୁରର ତିନୋଟି ମିଲର୍ସଙ୍କୁ କୋଟସମଳାଇ ସମିତିର ଧାନ ଉଠାଇବାକୁ ନିର୍ଦ୍ଦେଶ ଦେଇଥିବା ଜିଲ୍ଲା ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ଅଧିକାରୀ କହିଛନ୍ତି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
