ସୁବର୍ଣ୍ଣପୁର: ଜିଲ୍ଲା ସରପଞ୍ଚ ସଂଘ ପକ୍ଷରୁ ସୁବର୍ଣ୍ଣପୁର ଜିଲ୍ଲାପାଳଙ୍କ କାର୍ଯ୍ୟାଳୟ ଆଗରେ ବିକ୍ଷୋଭ ପ୍ରଦର୍ଶନ କରାଯାଇଛି । ଜିଲ୍ଲା ସରପଞ୍ଚ ସଂଘର ସଭାପତି ଗଣନାଥ ସାହୁଙ୍କ ନେତୃତ୍ବରେ ଶତାଧିକ ପଞ୍ଚାୟତର ସରପଞ୍ଚମାନେ ଜିଲ୍ଲାପାଳଙ୍କ କାର୍ଯ୍ୟାଳୟ ଆଗରେ ଏକତ୍ରିତ ହୋଇ ଆନ୍ଦୋଳନ କରିଛନ୍ତି । ସରକାରୀ ଯୋଜନା ତୃଣମୂଳ ସ୍ତରରେ ସଫଳତାର ସହିତ କାର୍ଯ୍ୟକାରୀ କରିବା ପାଇଁ ଗ୍ରାମ ପଞ୍ଚାୟତଗୁଡିକୁ ସରକାର କ୍ଷମତା ପ୍ରଦାନ କରିଛନ୍ତି । କିନ୍ତୁ ଏଥିରେ ପଞ୍ଚାୟତ ସମିତିର ବ୍ଳକ ଉନ୍ନୟନ ଅଧିକାରୀଙ୍କ ହସ୍ତକ୍ଷେପ ଯୋଗୁଁ ଯୋଜନାଗୁଡ଼ିକ ହିତାଧିକାରୀଙ୍କ ପାଖରେ ପହଞ୍ଚି ପାରୁ ନଥିବା ଅଭିଯୋଗ ହେଉଛି ।
ତେବେ ଗ୍ରାମ ପଞ୍ଚାୟତ ସ୍ତରରେ ହେଉଥିବା ବିକାଶମୂଳକ କାର୍ଯ୍ୟର ଅନୁଦାନ ଖର୍ଚ୍ଚ ପାଇଁ ଗୋଷ୍ଠୀ ଉନ୍ନୟନ ଅଧିକାରୀଙ୍କ ସ୍ବାକ୍ଷରର ଆବଶ୍ୟକତା ରହିଛି ବୋଲି ଅଭିଯୋଗ କରିଛନ୍ତି । ଫଳରେ ବିଡିଓଙ୍କ ପରିଦର୍ଶନ ଓ ଫାଇଲରେ ସ୍ବାକ୍ଷର କରିବା ପରେ ହିଁ ଅନୁଦାନ ଖର୍ଚ୍ଚ ହୋଇ ପାରୁଛି । ସେହିପରି ଗରୀବ, ନିଷ୍ପେସିତ, ଅବହେଳିତ ତଥା ଭିନ୍ନକ୍ଷମ ହିତାଧିକାରୀମାନଙ୍କୁ ପ୍ରଧାନମନ୍ତ୍ରୀ ଆବାସ ଯୋଜନାରେ ସାମିଲ କରିବା ପାଇଁ ସରକାରଙ୍କ ସ୍ପଷ୍ଟ ନିର୍ଦ୍ଦେଶ ରହିଛି । ହେଲେ ଅନେକ ପ୍ରକୃତ ଓ ଯୋଗ୍ୟ ହିତାଧିକାରୀଙ୍କୁ ଗ୍ରାମସଭା ମାଧ୍ୟମରେ ଚୟନ କରାଯାଇ ଥିଲେ ମଧ୍ୟ ହିତାଧିକାରୀଙ୍କ ନାମ ଆର୍ଥିକ ଓ ସାମାଜିକ ପଛୁଆ ଶ୍ରେଣୀର ତାଲିକାରେ ନଥିବାରୁ ସେହି ଯୋଗ୍ୟ ହିତାଧିକାରୀଙ୍କୁ ବାସଗୃହ ଯୋଗାଇ ଦିଆଯାଇ ପାରୁନଥିବା ମଧ୍ୟ ଅଭିଯୋଗ ହେଉଛି ।
ଏହା ମଧ୍ୟ ପଢ଼ନ୍ତୁ...ଗୋଚର ଭୂମି ଜବରଦଖଲ ଉଚ୍ଛେଦ, ସୁବର୍ଣ୍ଣପୁର ଜିଲ୍ଲାପାଳଙ୍କ କାର୍ଯ୍ୟାଳୟ ଆଗରେ ବିକ୍ଷୋଭ
ଏହାସହ ସାମାଜିକ ଓ ଆର୍ଥିକ ତାଲିକା ପ୍ରସ୍ତୁତିରେ ଅନିୟମିତତା ରହିଥିବା ବେଳେ ଯୋଗ୍ୟ ହିତାଧିକାରୀଙ୍କୁ ଗ୍ରାମସଭାରେ ଚିହ୍ନଟ କରି ଅଗ୍ରାଧିକାର ଭିତ୍ତିରେ ସେମାନଙ୍କୁ ବାସଗୃହ ଯୋଗାଇ ଦେବା ପାଇଁ ନିୟମରେ ପରିବର୍ତ୍ତନ କରିବା ପାଇଁ ଦାବି କରିଛନ୍ତି । ସେହିପରି ଗ୍ରାମ ପଞ୍ଚାୟତରେ କାର୍ଯ୍ୟକାରୀ ହେଉଥିବା ବିଦ୍ୟୁତ ଓ ପାଣି ପ୍ରକଳ୍ପଗୁଡ଼ିକ ପାଇଁ ମିଳୁଥିବା ଅନୁଦାନକୁ ଅନ୍ୟ ପ୍ରକଳ୍ପଗୁଡ଼ିକରେ ଖର୍ଚ୍ଚ କରାଯାଉଥିବାରୁ ଜନସାଧାରଣଙ୍କ ମୌଳିକ ସମସ୍ୟାର ସମାଧାନ ହୋଇ ପାରୁନଥିବା ଅଭିଯୋଗ କରିଛନ୍ତି । ତେବେ ମୁଖ୍ୟତଃ ସରପଞ୍ଚଙ୍କ ଅନାସ୍ଥା ପ୍ରସ୍ତାବରେ ଥିବା ଜଟିଳତାକୁ ସୁଧାର କରିବା ପାଇଁ ମଧ୍ୟ ଦାବି କରିଛନ୍ତି । ଦାବି ପୂରଣ ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଉଦ୍ଦେଶ୍ୟରେ ସ୍ଥାନୀୟ ଜିଲ୍ଲା ପ୍ରଶାସନକୁ ଏକ ସ୍ମାରକପତ୍ର ମଧ୍ୟ ପ୍ରଦାନ କରିଛନ୍ତି । ତେବେ ତୁରନ୍ତ ଦାବି ପୂରଣ ନହେଲେ ଜିଲ୍ଲା ସରପଞ୍ଚ ସଂଘ ପକ୍ଷରୁ ପୁଣି ଏକ ବୈଠକ କରାଯାଇ ଆଗାମୀ ଆନ୍ଦୋଳନର ରୂପରେଖ ସ୍ଥିର କରିବେ ବୋଲି କହିଛନ୍ତି ।
ଇଟିଭି ଭାରତ, ସୁବର୍ଣ୍ଣପୁର
