ଜିଲ୍ଲାର ସୋନପୁର ବିଧାନସଭା ନିର୍ବାଚନ ମଣ୍ଡଳୀର ବିଜେପି ବିଧାୟକ ପ୍ରାର୍ଥୀ ଅଶୋକ ପୂଜାରୀ ସୋମବାର ସହରର ପ୍ରତିଟି ୱାର୍ଡରେ ଡୋର ଡୁ ଡୋର କ୍ୟାମ୍ପେନ କରିଥିବା ବେଳେ ପ୍ରଧାନମନ୍ତ୍ରୀଙ୍କ ଗସ୍ତ କାର୍ଯ୍ୟକ୍ରମ ଓ କେନ୍ଦ୍ର ସରକାରଙ୍କ ବିକାଶମୂଳକ ଯୋଜନା ସମ୍ପର୍କରେ ଜନସାଧାରଣଙ୍କୁ ଅବଗତ କରିଥିଲେ। ସଦର ପୌର ପରିଷଦ ଅଧିନରେ ଥିବା ଆମ୍ବେଦକର ଛକ , ଥନାପତି ପଡା ଛକ , ଭଗବତୀ ପ୍ଲଟ ତଥା ବ୍ଳକ ଛକ ଆଦି ସ୍ଥାନ ଗୁଡିକରେ ନିର୍ବାଚନୀ ସଭା କରି ବିଜେପିର ଲୋକସଭା ପ୍ରାର୍ଥୀନୀ ସଂଗୀତା ସିଂ ଦେଓ ଓ ତାଙ୍କ ପାଇଁ ଭୋଟ ଭିକ୍ଷା କରିଥିଲେ ।
ମନ୍ଦିର ମାଳିନୀ ସୁବର୍ଣ୍ଣପୁର ସହରକୁ ଆକର୍ଷଣୀୟ ଭାବେ ଗଢିବା ସହିତ ସହରର ପର୍ଯ୍ୟଟନୀୟ ବୈଭବର ବିକାଶ ତାଙ୍କ ପ୍ରାଥମିକତା ହେବ ବୋଲି କହିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଶାସନରେ ଦେଶ ସୁରକ୍ଷିତ ରହିବା ସହିତ ବିକାଶ ପ୍ରକ୍ରିୟା ଜାରି ରହିଛି ବୋଲି ଜନସାଧାରଣଙ୍କୁ ବିଭିନ୍ନ ନିର୍ବାଚନୀ ସଭାରେ ଉଦବୋଧନ ଦେଇଛନ୍ତି। ବିଜେଡି ପ୍ରାର୍ଥୀ ତଥା ନଗର ଉନ୍ନୟନ ଓ ଜଳସେଚନ ମନ୍ତ୍ରୀ ନିରଞ୍ଜନ ପୂଜାରୀ 4 ଥର ବିଧାୟକ ଭାବେ ନିର୍ବାଚିତ ହୋଇଥିବା ବେଳେ ଦୀର୍ଘ ଦୁଇ ଦଶନ୍ଧି ଧରି କଂଗ୍ରେସ ରାଜନୀତି କରିବା ପରେ ବିଜେପି ଦଳରେ ସାମିଲ ହୋଇ ଅଶୋକ ପୂଜାରୀ ବିଜେଡି ପ୍ରାର୍ଥୀଙ୍କୁ କଡା ଟକ୍କର ଦେଉଛନ୍ତି।
ବିକାଶଶୀଳ ସୁବର୍ଣ୍ଣପୁର ଜିଲ୍ଲାକୁ ବିକଶିତ ଜିଲ୍ଲାରେ ପରିଣତ କରିବା ପାଇଁ ଏଥର ଭୋଟର ମାନେ ତାଙ୍କୁ ଆଶୀର୍ବାଦ କରିବେ ବୋଲି ଅଶୋକ ତାଙ୍କ ପ୍ରତିକ୍ରିୟାରେ କହିଛନ୍ତି।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
