ସୁବର୍ଣ୍ଣପୁର: ସହରର ସମଲେଶ୍ବରୀ ପୀଠରେ ଦେବୋତ୍ତର ବିଭାଗର ନିର୍ଦ୍ଦେଶରେ ଦଶମୀ ବଳୀ ଆୟୋଜିତ ହୋଇ ଯାଇଛି । ସୋମବାର ଇଟିଭି ଭାରତରେ ଦଶମୀ ବଳି ପାଳନ କରାଯାଇନଥିବା ଖବର ପ୍ରସାରିତ ହୋଇଥିଲା। ଦଶମୀ ବଳୀ ବନ୍ଦ ହେବା ସହିତ ବଳିଯାତ୍ରାର ପରମ୍ପରା ଭାଙ୍ଗିଥିବା ନେଇ ଉପ ଜିଲ୍ଲାପାଳ ତଥା ଦେବୋତ୍ତର ଅଧିକାରୀ ବଳରାମ ମଲ୍ଲିକଙ୍କ ଦୃଷ୍ଟି ଆକର୍ଷଣ କରାଯାଇଥିଲା । ଦେବୋତ୍ତର ଅଧିକାରୀ ଏହାର ତଦନ୍ତ କରିବା ସହିତ ବରୁଆର ସ୍ବାସ୍ଥ୍ୟଗତ ସମସ୍ୟା ପାଇଁ ବଳି ପାଳନ ନହେବା ଜାଣିବାକୁ ପାଇଥିଲେ।
ତେବେ ଦେବୋତ୍ତର ଅଧିକାରୀଙ୍କ ନିର୍ଦ୍ଦେଶରେ ପୁଣି ଦଶହରା ବଳି କାର୍ଯ୍ୟ ଦେବୀ ମା ସମଲେଶ୍ବରୀଙ୍କ ପୀଠରେ ପାଳନ କରାଯାଇଥିଲା। ଦେବୋତ୍ତର ଅଧିକାରୀଙ୍କ ନିର୍ଦ୍ଦେଶରେ ସେବାୟତ ମାନେ ସମଲେଶ୍ବରୀ ମନ୍ଦିରକୁ ପହଞ୍ଚି ବଳିଯାତ୍ରା ପାଳନ କରିଥିଲେ । ହେଲେ ସୋମବାର ରାତିରେ ଦଶହରା ବଳି ପାଳନ ହୋଇ ନଥିବାରୁ ଶ୍ରଦ୍ଧାଳୁ ମାନେ ବଳି ଦର୍ଶନ କରିବାର ସୌଭାଗ୍ୟରୁ ବଞ୍ଚିତ ହୋଇଥିଲେ । ସେପଟେ ଦେବୋତ୍ତର ଅଧିକାରୀ ବଳରାମ ମଲ୍ଲିକ ଏହି ଐତିହାସିକ ବଳିଯାତ୍ରାର ସମସ୍ତ କାର୍ଯ୍ୟ ଯଥା ସମ୍ଭବ ରୀତିରେ ପାଳନ କରିବା ପାଇଁ ଚେଷ୍ଟା କରୁଥିବା କହିଛନ୍ତି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
