ସୁବର୍ଣ୍ଣପୁର: ସାମ୍ବାଦିକଙ୍କୁ ଆକ୍ରମଣ ଘଟଣାରେ 2 ଯୁବକ ଗିରଫ । ସୁବର୍ଣ୍ଣପୁର ଜିଲ୍ଲା ସିଂହୀଯୁବା ଗାଁର ସାମ୍ବାଦିକ ବିପ୍ଳବ ରଞ୍ଜନ ଦାସଙ୍କୁ 2 ଜଣ ଯୁବକ ଆକ୍ରମଣ କରିଥିଲେ । ପୋଲିସ ଉଭୟଙ୍କୁ ଗିରଫ କରି କୋର୍ଟ ଚାଲାଣ କରିଥିଲା । ଗିରଫ ଅଭିଯୁକ୍ତ ହେଲେ ଅଶୋକ ପଣ୍ଡା ଓ ଶ୍ରୀକର ମେସୁଆ । ହେଲେ ବିନିକା କୋର୍ଟ ଉଭୟଙ୍କ ଜାମିନ ନାମଞ୍ଜୁର କରିବା ପରେ ପୋଲିସ ସେମାନଙ୍କୁ ଜେଲକୁ ପଠାଇଛି ।
ସୂଚନାନୁଯାୟୀ, ସାମ୍ବାଦିକ ବିପ୍ଳବ ରଞ୍ଜନ ଦାସଙ୍କ ବଡଭାଇ ଆଶିଷ ସହିତ ସିଂହୀଯୁବା ସମଲେଇ ମନ୍ଦିର ଆଗରେ ଅଶୋକ ଓ ଶ୍ରୀକର ପାଟିତୁଣ୍ଡ କରୁଥିଲେ । ବିପ୍ଳବ ଆସି ପଚାରିବାରୁ ଉଭୟ ତାଙ୍କୁ ଏକ ଧାରୁଆ ଅସ୍ତ୍ରରେ ଆକ୍ରମଣ କରି କ୍ଷତାକ୍ତ କରିଥିଲେ । ଏବେ ବିପ୍ଳବଙ୍କ ସ୍ୱାସ୍ଥ୍ୟ ଠିକ୍ ଥିବାବେଳେ ଆସାମୀ ଦ୍ବୟ ଜେଲ ହାଜତରେ ଅଛନ୍ତି ।
ସେପଟେ ସାମ୍ବାଦିକ ବିପ୍ଳବ ରଞ୍ଜନ ଦାସଙ୍କୁ ଆକ୍ରମଣ ଘଟଣାକୁ ବିନିକା, ବୀରମହାରାଜପୁର ଓ ଜିଲ୍ଲା ସାମ୍ବାଦିକ ସଂଘ ପକ୍ଷରୁ ତୀବ୍ର ନିନ୍ଦା କରାଯାଇଛି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା , ଇଟିଭି ଭାରତ
