ସମ୍ବଲପୁରରେ ଗଡ଼ିଲା ବରିଷ୍ଠ ନାଗରିକଙ୍କ ତୀର୍ଥଯାତ୍ରା ଟ୍ରେନ

ବରିଷ୍ଠ ନାଗରିକଙ୍କ ତୀର୍ଥଯାତ୍ରା ଟ୍ରେନକୁ ଶୁଭାରମ୍ଭ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । କ୍ଷେତରାଜପୁର ରେଳ ସବୁଜ ପତାକା ଦେଖାଇଲେ ଦୁଇ ମନ୍ତ୍ରୀ । ଅଧିକ ପଢନ୍ତୁ

ସମ୍ବଲପୁର: ଆଜି ସମ୍ବଲପୁରରୁ ଗଡ଼ିଲା ବରିଷ୍ଠ ନାଗରିକଙ୍କ ପାଇଁ ତୀର୍ଥଯାତ୍ରା ଟ୍ରେନ । ଆଜି କ୍ଷେତରାଜପୁର ରେଳ ଷ୍ଟେସନଠାରେ ଜିଲ୍ଲା ପ୍ରଶାସନ ପକ୍ଷରୁ ଆୟୋଜିତ ଏକ ସ୍ୱତନ୍ତ୍ର କାର୍ଯ୍ୟକ୍ରମରେ ପଶ୍ଚିମ ଓଡ଼ିଶାର ବରିଷ୍ଠ ନାଗରିକଙ୍କୁ ନେଇ ଯାଉଥିବା ସ୍ୱତନ୍ତ୍ର ଟ୍ରେନକୁ ସବୁଜ ପତାକା ଦେଖାଛନ୍ତି ମନ୍ତ୍ରୀ ନିରଞ୍ଜନ ପୂଜାରୀ ଓ ମନ୍ତ୍ରୀ ସାରଦା ନାୟକ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି କାର୍ଯ୍ୟକ୍ରମକୁ ଭର୍ଚୁଆଲ ମୋଡ଼ରେ ଯୋଗ ଦେଇ ଶୁଭାରମ୍ଭ କରିଥିଲେ l

ଆଜି ସମ୍ବଲପୁର କ୍ଷେତରାଜପୁର ଷ୍ଟେସନରୁ ଏକ ସ୍ୱତନ୍ତ୍ର ଟ୍ରେନ ପଶ୍ଚିମ ଓଡ଼ିଶାର 8 ଟି ଜିଲ୍ଲାର ପ୍ରାୟ 970 ଜଣ ବରିଷ୍ଠ ନାଗରିକଙ୍କୁ ନେଇ ବାହାରିଛି l ଏମାନଙ୍କ ସୁବିଧା ପାଇଁ ରହିଛନ୍ତି 30 ଜଣ ସପୋର୍ଟ ଷ୍ଟାଫ ଓ 2 ଜଣ ଡାକ୍ତର l ଏହାସହ ଏହି ଯାତ୍ରୀମାନଙ୍କ ପାଇଁ ପ୍ରତ୍ୟେକ କୋଚରେ ରହିଛନ୍ତି ଜଣେ ଲେଖାଏଁ ଆଟେଣ୍ଡଡେନ l ଏହି ଟ୍ରେନଟି କୋଲକାତା ଦେଇ ଆସାମ ପର୍ଯ୍ୟନ୍ତ ଯିବ l କୋଲକାତାର କାଳୀ ପୀଠ ଓ ଆସାମର କାମାକ୍ଷ୍ୟା ପୀଠର ଦର୍ଶନ କରିବେ ତୀର୍ଥଯାତ୍ରୀ l ଟ୍ରେନ ଭିତରେ ଥିବା ଯାତ୍ରୀମାନଙ୍କ ପାଇଁ ସମସ୍ତ ସୁବିଧା ଯୋଗାଇ ଦେଇଛନ୍ତି ସରକାର l ଚିକିତ୍ସା ସେବା ଠାରୁ ଆରମ୍ଭ କରି ପିଇବା ପାଣି, ଖାଦ୍ୟ, ଔଷଧ ସବୁ ଟ୍ରେନ ଉପଲବ୍ଧ l

ଆଜି ଦିନ ପ୍ରାୟ ସାଢେ 12 ଟା ସମୟରେ ଏହି ଟ୍ରେନ ସମ୍ବଲପୁର ଷ୍ଟେସନରୁ ବାହାରି ଥିଲା l ଏହି ଟ୍ରେନଟି ଆସନ୍ତା 11 ତାରିଖରେ ଯାତ୍ରା ସାରି ଫେରିବ l ବରିଷ୍ଠ ନାଗରିକମାନଙ୍କୁ ସରକାର ମାଗଣା ତୀର୍ଥ କରାଇବାପାଇଁ ନେଉଥିବାରୁ ଯାତ୍ରୀମାନେ ମଧ୍ୟ ଖୁସି ବ୍ୟକ୍ତ କରିଛନ୍ତି l ସମ୍ବଲପୁର ଜିଲ୍ଲା ସମେତ ଅନୁଗୋଳ, ବରଗଡ଼,ବଲାଙ୍ଗୀର, ଦେବଗଡ଼, ଝାରସୁଗୁଡା, ସୁବର୍ଣ୍ଣପୁର ଓ ସୁନ୍ଦରଗଡ଼ ଅଞ୍ଚଳର ବରିଷ୍ଠ ନାଗରିକ ମାନେ ଆଜି ଏହି ତୀର୍ଥ ଯାତ୍ରାରେ ସମ୍ବଲପୁର ରେଳଷ୍ଟେସନରୁ କୋଲକାତା ଓ ଆସାମ ଅଭିମୁଖେ ବାହାରିଛନ୍ତି l

ଏହା ମଧ୍ୟ ପଢନ୍ତୁ....ବରିଷ୍ଠ ନାଗରିକଙ୍କ ତୀର୍ଥ ଯାତ୍ରା: ୬ ଜିଲ୍ଲାରୁ ଗଲେ ୯୭୦ଜଣ, ଯାତ୍ରୀଙ୍କ ପାଇଁ ସ୍ୱତନ୍ତ୍ର ସୁବିଧା

ଯେ ଯେକୌଣସି ଲୋକ ହେଉନା କାହିଁକି ପରିଣତ ବୟସରେ ତୀର୍ଥ କରିବାର ଇଚ୍ଛା ମନ ଭିତରେ ଜାଗ୍ରତ ହୋଇଥାଏ l ଏହାକୁ ଦୃଷ୍ଟିରେ ରଖି ରାଜ୍ୟର ବରିଷ୍ଠ ନାଗରିକଙ୍କ ପାଇଁ ତୀର୍ଥଯାତ୍ରା ନେଇ 2016 ମସିହାରୁ ସୁବିଧା ଯୋଗାଇ ଦେଇ ଆସୁଛନ୍ତି ରାଜ୍ୟ ସରକାର l ମୁଖ୍ୟତଃ 2016 ମସିହାରୁ ବରିଷ୍ଠ ନାଗରିକ ତୀର୍ଥ ଯାତ୍ରା ଟ୍ରେନ ସେବା ଆରମ୍ଭ କରିଛନ୍ତି ସରକାର l

ଏଥିପାଇଁ ସମ୍ବଲପୁର ରେଳ ଷ୍ଟେସନରେ ଭବ୍ୟ ସ୍ୱାଗତ ସମ୍ବର୍ଦ୍ଧନାର କାର୍ଯ୍ୟକ୍ରମ ଆୟୋଜନ କରାଯାଇଥିଲା l ଏହି ଉତ୍ସବରେ ବରିଷ୍ଠ ନାଗରିକ ମାନଙ୍କୁ ଫୁଲ ଚନ୍ଦନ ଦେଇ ତାଙ୍କୁ ସ୍ୱାଗତ କରି ଟ୍ରେନରେ ବସାଯାଇଥିଲା l ଏହି କାର୍ଯ୍ୟକ୍ରମରେ ମନ୍ତ୍ରୀ ନିରଞ୍ଜନ ପୂଜାରୀ, ମନ୍ତ୍ରୀ ସାରଦା ନାୟକ, ରେଢ଼ାଖୋଲ ବିଧାୟକ ରୋହିତ ପୂଜାରୀ, ସମ୍ବଲପୁର ଅତିରିକ୍ତ ଜିଲ୍ଲାପାଳ ପ୍ରଦୀପ କୁମାର ସାହୁ, ସମ୍ବଲପୁର ଜିଲ୍ଲା ପରିଷଦ ଅଧ୍ୟକ୍ଷ କୁମୋଦିନୀ ନାୟକ ପ୍ରମୁଖ ଯୋଗ ଦେଇଥିଲେ l ପରିଣତ ବୟସରେ ତୀର୍ଥ କରିବା ପାଇଁ ସମସ୍ତଙ୍କ ଇଛା ଓ ଆଶା ଥାଏ l ଏହି ଆଶାକୁ ରାଜ୍ୟ ସରକାର ପୂରଣ କରିଥିବାରୁ ତୀର୍ଥଯାତ୍ରୀମାନେ ବେଶ ଖୁସି ଥିବା ପ୍ରକାଶ କରିଛନ୍ତି l


ଇଟିଭି ଭାରତ ,ସମ୍ବଲପୁର