ସମ୍ବଲପୁର: ଜିଲ୍ଲାରେ ସକ୍ରିୟ ଜମି ମାଫିଆ । ପଶ୍ଚିମ ଓଡିଶା ପ୍ରାଣକେନ୍ଦ୍ର କୁହାଯାଉଥିବା ସମ୍ବଲପୁର ସହର ଏବେ ଜମି ମାଫିଆଙ୍କ କବଜାରେ ରହିଛି । ଜନସଂଖ୍ୟା ମଧ୍ୟ ବୃଦ୍ଧିର ସୁଯୋଗ ନେଇ କେତେକ ଜମି ମାଫିଆ କମ ସମୟରେ ମାଲେମାଲ ହେବା ପାଇଁ ବିଭିନ୍ନ ସ୍ଥାନରେ ଥିବା ଜମିକୁ କବଜାକୁ ନେଇ ପ୍ଲଟିଂ କରୁଛନ୍ତି। ଆଉ ଏହା ଦ୍ୱାରା ସବୁଠାରୁ ଅଧିକ କ୍ଷତିଗ୍ରସ୍ତ ହେଉଛନ୍ତି ସରଳ ଆଦିବାସୀ । ଏମିତି ଅଭିଯୋଗ ଆଣିଛି ସମ୍ବଲପୁର ଜିଲ୍ଲା ଓକିଲ ସଂଘ ।
ସମ୍ବଲପୁରରେ ଏବେ ବେଆଇନ ଜମି ଜବରଦଖଲକାରୀଙ୍କ ପ୍ରାଦୁର୍ଭାବ ବଢ଼ିବାରେ ଲାଗିଛି । କେତେକ ଦୁର୍ନୀତିଖୋର ଅଧିକାରୀ ଓ ଜିଲ୍ଲା ପ୍ରଶାସନର ନୀରବତା ଯୋଗୁଁ ଏଭଳି ମାଫିଆମାନେ ଆଦିବାସୀଙ୍କ ଜମିକୁ ଜବର ଦଖଲ କରୁଛନ୍ତି । ସମ୍ବଲପୁର ଜିଲ୍ଲାର ଧନୁପାଲି ଥାନା ଅନ୍ତର୍ଗତ କୁଳୁତକାନି ଅଞ୍ଚଳରେ ଜମି ମାଫିଆମାନେ ଆଦିବାସୀଙ୍କୁ ଧମକ ଚମକ ଦେଇ ସେମାନଙ୍କ ଜମି ହଡ଼ପ କରିଥିବା ଅଭିଯୋଗ କରିଛି ସମ୍ବଲପୁର ଜିଲ୍ଲା ଓକିଲ ସଂଘ ।
ଏନେଇ ଓକିଲ ସଙ୍ଘର ସାଧାରଣ ପରିଷଦ ବୈଠକର ନିଷ୍ପତ୍ତି କ୍ରମେ ସଙ୍ଘର ସଭାପତି ପ୍ରମୋଦ ରଥଙ୍କ ନେତୃତ୍ୱରେ ଏକ ଟିମ ଏହି ସମସ୍ୟା ଉପରେ ଦୃଷ୍ଟି ଦେବାକୁ ସମ୍ବଲପୁର ଜିଲ୍ଲାପାଳଙ୍କ ସହ ଆଲୋଚନା କରିଛି । ଅନ୍ୟପକ୍ଷେ ଏହିଭଳି ବେଆଇନ ଜମି ଜବରଦଖଲ ଜାରି ରହିଲେ ଆଗାମୀ ଦିନରେ ସମ୍ବଲପୁର ଓକିଲ ସଙ୍ଘ ଆନ୍ଦୋଳନ କରିବ ବୋଲି ଚେତାବନୀ ଦେଇଛି।
ସମ୍ବଲପୁରରୁ ବାଦଶାହ ଜୁସ୍ମନ ରଣା, ଇଟିଭି ଭାରତ
